ലാലിസം വിവാദമാകുമ്പോൾ..

35 ആം ദേശീയ ഗെയിംസ് തിരുവനന്തപുരത്ത് കൊടിയേറിയപ്പോൾ ഇന്ത്യയിലെ ഏറ്റവും വലിയ കായിക മാമാങ്കത്തിന് മാത്രമല്ല, ഒരു പിടി വിവാദങ്ങൾക്ക് കൂടിയാണ് അതിനൊപ്പം തുടക്കം കുറിച്ചത്. മാസങ്ങൾക്ക് മുന്നേ തന്നെ അഴിമതി ആരോപണങ്ങളിൽ കുടുങ്ങിയ സംഘാടകർ ഒരുക്കിയ ഉദ്ഘാടന പരിപാടിയിലെ കല്ലുകടിയായിരുന്നു ലാലിസം. മാസങ്ങൾക്ക് മുന്നേ തന്നെ മോഹൻ ലാൽ ഒരു മ്യൂസിക് ബാൻഡ് തുടങ്ങുന്നുവെന്നും സംഗീത സംവിധായകൻ രതീഷ്‌ വേഗയുമായി സഹകരിച്ചാണ് ഇത്തരം ഒരു സംരംഭത്തിനു തുടക്കം കുറിക്കുന്നതെന്നും മാധ്യമങ്ങളിൽ വാർത്തകൾ വന്നിരുന്നു. ദേശീയ ഗെയിംസിന്റെ ഉദ്ഘാടനത്തോടനുബന്ധിച്ച് ലാലിസം എന്ന് പേരുള്ള ഈ ബാൻഡിന്റെ ആദ്യ പെർഫോർമൻസ് നടക്കും എന്ന വാർത്ത പുറത്ത് വന്നപ്പോൾ, വാനോളം പ്രതീക്ഷകളായിരുന്നു മോഹൻലാലിന്റെ ആരാധകർക്ക്. എന്നാൽ ഉദ്ഘാടന ദിവസം എല്ലാം കൈവിട്ടു പോകുന്ന ഒരു കാഴച്ചയാണ് നാമെല്ലാം കണ്ടത്. വ്യത്യസ്തമായി അവതരിപ്പിക്കാനുള്ള ശ്രമം അവരുടെ ഭാഗത്ത് നിന്നുണ്ടായെങ്കിലും, പലവുരു പിഴവുകൾ കൊണ്ട് റെക്കോർഡ് ചെയ്ത പാട്ടുകൾക്ക് ചുണ്ടനക്കുക എന്ന അധര വ്യായാമം മാത്രമായിരുന്നു അവരുടെ പ്രകടനം എന്ന് ജനങ്ങൾ തിരിച്ചറിഞ്ഞു. അദ്ദേഹത്തിന്റെ പരിപാടി തീരുന്നതിനു മുന്നേ തന്നെ കാണികൾ ഒഴിഞ്ഞു പോയതും ആ പരിപാടിയുടെ ശോഭ കെടുത്തി. ഈ പ്രോഗ്രാമിന്റെ പരാജയം സോഷ്യൽ മീഡിയയിൽ വലിയൊരു ചർച്ചക്ക് കളമൊരുക്കുകയാണ് ചെയ്തത്. കെട്ടടങ്ങി എന്ന് കരുതിയ 2 കോടിയുടെ വിവാദം ഉടൻ തന്നെ തലപൊക്കുകയും ലാലിസത്തെ തലനാരിഴ കീറി വിശകലം ചെയ്ത് വിമർശനത്തിന്റെ പരകോടിയിൽ നിൽക്കുന്ന അഭിപ്രായ പ്രകടനങ്ങളാണ് പിന്നീട് നാം കണ്ടത്. സോഷ്യൽ മീഡിയയിൽ വിവാദങ്ങൾ കത്തി നിൽക്കുമ്പോൾ ലാലിസം ബാൻഡ് പിരിച്ചു വിട്ടതായി ചില മാധ്യമങ്ങൾ റിപ്പോർട്ട് ചെയ്യുകയും രതീഷ്‌ വേഗ അത് നിഷേധിച്ചു കൊണ്ട് കടന്നു വരികയും ചെയ്തിരുന്നു. സോഷ്യൽ മീഡിയയിലെ വിവാദങ്ങൾ കത്തിപ്പടരുമ്പോൾ തന്നെ കലാ-സാംസ്കാരിക രംഗത്ത് കാര്യമായ ഒരു ചർച്ച പരസ്യമായി ഉണ്ടായില്ല എന്ന് തന്നെ പറയാം, എന്നാൽ പാലക്കാട് ശ്രീറാം ലാലിസത്തെ വിമർശിച്ച് മുന്നോട്ട് വന്നതോടെ, പല ഭാഗങ്ങളിൽ നിന്നും വിമർശനങ്ങൾ ഉയർന്നു തുടങ്ങി. രാഷ്ട്രീയക്കാരും അതിലേക്ക് കടന്നതോടെ വിമർശങ്ങൾ ചെറിയ തോതിലെങ്കിലും വ്യക്തിഹത്യയിലേക്ക് നീങ്ങി.

ഇതെഴുതുന്ന അവസരത്തിൽ മോഹൻലാൽ പണം തിരികെ നൽകാമെന്ന് സർക്കാരിനെ അറിയിക്കുകയും, അത് തിരിച്ചു വാങ്ങാൻ കഴിയില്ല എന്ന് സർക്കാർ അറിയിക്കുകയും ചെയ്തു കഴിഞ്ഞു. ഈ വിവാദത്തിന്റെ ഭാവി എന്ത് എന്ന് പ്രവചിക്കാൻ കഴിയില്ല. ഒരു പക്ഷേ ഒരു വിവാദത്തിനപ്പുറം നമ്മളോ, സോഷ്യൽ മീഡിയയോ, മാധ്യമങ്ങളോ ചർച്ച ചെയ്യപ്പെടാതെ  പോയ കുറെ അധികം വശങ്ങൾ ഇതിനുണ്ടായിട്ടുണ്ട്. ഒരു ന്യൂനപക്ഷമെങ്കിലും അത് ഉയർത്തി കൊണ്ടു വരുവാൻ ശ്രമിച്ചിരുന്നെങ്കിലും പ്രസ്താവനകളുടെയും ചെളിവാരിയെറിയലിന്റെയും കുത്തൊഴുക്കിൽ അതാരും ശ്രദ്ധിക്കപ്പെടാതെ പോയി എന്ന് വേണം കരുതാൻ. അതിലേക്ക് വിരൽ ചൂണ്ടുവാനുള്ള ഒരു എളിയ ശ്രമം മാത്രമാണിത്.

ലാലിസം പാളിയതെവിടെ?

ലാലിസം എന്ന ബാൻഡിനു രണ്ടു കോടി രൂപ പ്രതിഫലം വാങ്ങുന്നു എന്ന വാർത്ത പുറത്ത് വന്നതോടെ ആദ്യം പ്രതിഷേധവുമായി എത്തിയത് സംവിധായകൻ വിനയനായിരുന്നു. സൂപ്പർ താരങ്ങളോട് സന്ധിയില്ലാ സമരം പ്രഖ്യാപിച്ചിരിക്കുന്ന അദ്ദേഹത്തിന്റെ ആരോപണം പ്രത്യക്ഷത്തിൽ സത്യവുമായിരുന്നു. ദേശീയ ഗെയിംസിന്റെ പ്രചരണ പരിപാടികളിൽ സച്ചിൻ ടെണ്ടൂൽക്കർ പ്രതിഫലം വാങ്ങാതെ പങ്കെടുക്കുമ്പോൾ ലാൽ 2 കോടി വാങ്ങുന്നതിലെ അനൗചിത്യമാണ് അദ്ദേഹം ചൂണ്ടിക്കാട്ടിയത്. ആ വിമർശനത്തിലെ യുക്തി നമുക്ക് മനസ്സിലാക്കാമെങ്കിലും, ലാൽ മാത്രമല്ല, ഇന്ത്യയിലെ തന്നെ പല ഗായകരും അതിൽ പങ്കെടുക്കുന്നുവെന്നും അവരുടെ പ്രതിഫലവുംപരിപാടിയുടെ തയ്യാറെടുപ്പുകൾക്കുമായാണ് രണ്ടു കോടിയെന്നും വിശദീകരണം വന്നപ്പോൾ, അത് പൊതുവെ സ്വീകാര്യമാകുന്ന ഒന്നായി. ഒരാഴ്ചയിലധികം നീണ്ട റിഹേഴ്സലിനൊടുവിൽ ലാലിസം തട്ടിൽ കയറിയപ്പോൾ അമ്പേ പാളി എന്ന് പറയാം. പ്രഗത്ഭാരായ പലരും പിന്നണിയിൽ പ്രവർത്തിച്ചുവെങ്കിലും അവതരണത്തിൽ ഒരു തരത്തിലും പുതുമ പകരുവാൻ പരിപാടിക്ക് കഴിഞ്ഞില്ല. മുന്നേ തന്നെ റെക്കോർഡ് ചെയ്ത പാട്ടുകൾ, പോസിറ്റീവ് ട്രാക്കിട്ട് പ്ലേ ചെയ്ത ശേഷം വരികൾക്കനുസരിച്ച് ചുണ്ടനക്കുക മാത്രമാണ് ചെയ്തത്. പരിശീലത്തിന്റെ കുറവ് കൊണ്ടോ അതോ ആസൂത്രണത്തിലെ പിഴവ് കൊണ്ടോ, ലിപ് സിങ്കിങ്ങ് ഗാനപരിപാടി ഗംഭീരമായി തന്നെ പാളി. പലപ്പോഴും പാട്ട് തുടങ്ങിട്ടും അതൊന്നുമറിയാതെ നിൽക്കുന്ന മോഹൻലാലിനെയും, മറ്റ് ചില അവസരങ്ങളിൽ പാട്ട് തീർന്നിട്ടും പാടിക്കൊണ്ടിരിക്കുന്ന മോഹൻലാലിനെയും നാം കണ്ടു. ലാലിസത്തിന്റെ ഭാഗമായി പങ്കെടുത്ത മറ്റ് ഗായകർക്കാവട്ടെ കാര്യമായ റോൾ ഒന്നും ഉണ്ടായിരുന്നില്ല. പേരിനു മാത്രമായി ഒന്നോ രണ്ടോ പാട്ടുകൾ പാടി, ചുണ്ടനക്കൽ പരിപാടിയിൽ തങ്ങൾക്കുള്ള റോൾ ഭംഗിയായി നിർവഹിച്ചു. ഒരു ബാൻഡിന്റെ പ്രകടനം കാണാനെത്തിയവർക്ക് റെക്കോർഡ് ചെയ്ത് വേദിയിൽ അവതരിപ്പിച്ച ഒരു ബാലെ പോലെയായിരുന്നു ലാലിസം. വമ്പിച്ച ജനാവലിക്ക് മുന്നിൽ അവതരിപ്പിക്കാൻ തുടങ്ങിയ പരിപാടി തീരാറായപ്പോഴേക്കും കാണികൾ ഭൂരിഭാഗവും കൊഴിഞ്ഞു പോയ അവസ്ഥയിലുമായിരുന്നു. വളരെ ഗംഭീരമായി തുടക്കം കുറിക്കേണ്ട ഒരു ബാൻഡ്, ഒന്നുമല്ലാതെ അവസാനിക്കുന്ന കാഴ്ചയാണ് നാം കണ്ടത്.

കലയുടെ മൂല്യമെന്ത്?

'കലയ്ക്ക് നമുക്കൊരു വിലയിടാനാവില്ല' എന്ന് നമ്മുടെ കായിക മന്ത്രി പറയുകയുണ്ടായി. ലാലിസമെന്ന ബാൻഡിനു 2 കോടി രൂപ പ്രതിഫലമായി നൽകുന്നു എന്ന വിവാദം പൊട്ടിപ്പുറപ്പെട്ട അവസരത്തിൽ നടത്തിയ പത്രസമ്മേളനത്തിലാണ് മന്ത്രി ഈ കാര്യം മാധ്യമങ്ങളോട് പറഞ്ഞത്. മന്ത്രി പറഞ്ഞത് വലിയൊരു തത്വമാണെങ്കിലും ഈ കാലഘട്ടത്തിൽ എല്ലാത്തിനും ഒരു വില നിശ്ചയിക്കപ്പെട്ടിട്ടുണ്ട്. ഒരു സിനിമ കാണണമെങ്കിൽ അതിനൊരു നിശ്ചിത തുക നിശ്ചയിച്ചിട്ടുണ്ട്. സിനിമയിൽ അഭിനയിക്കുന്ന നടീ-നടന്മാർക്ക്, അതിലെ അണിയറ പ്രവർത്തകർക്ക് എല്ലാം ഒരു പ്രതിഫലം നിശ്ചയിചിട്ടുണ്ട്. അത് പോലെ തന്നെയാണ് ഒരു ഒരു ബാൻഡും അവരുടെ സമയത്തിന്, അവരുടെ പ്രകടനത്തിന് ഒരു മൂല്യം അവർ തന്നെ നിർണ്ണയിക്കുകയും സംഘാടകർ അത് നൽകുവാൻ ബാധ്യസ്ഥരാകുകയും ചെയ്യും. ലാലിസത്തിനു 2 കോടി എന്നത് മോഹൻലാൽ അദ്ദേഹത്തിന്റെ സമയത്തിനും പ്രതിഭയുടെ മൂല്യത്തിനുമിട്ട വിലയാകാം. ഗെയിംസിന്റെ സംഘാടകർ അദ്ദേഹവുമായി പറഞ്ഞുറപ്പിച്ച തുകയാണത്. ഇനി ഗെയിംസ് സംഘാടകർ മറ്റു ചില കലാകാരന്മാർക്ക് നൽകിയ തുക നമുക്കൊന്ന് പരിശോധിക്കാം. മട്ടന്നൂർ ശങ്കരങ്കുട്ടി ആശാനും അദ്ദേഹത്തിന്റെ നൂറോളം വരുന്ന വാദ്യമേളക്കാർക്കും പ്രതിഫലമായി നൽകിയത് 5.5 ലക്ഷം രൂപയാണ്. പോണ്ടിച്ചേരിയിൽ നിന്നുള്ള തവിൽ വാദ്യ വിദഗ്ദ്ധനായ കരുണാമൂർത്തിയുടെ നേതൃത്വത്തിലുള്ള സംഘത്തിനു പ്രതിഫലമായി നിശ്ചയിക്കപ്പെട്ടത് 2.10 ലക്ഷം രൂപ മാത്രമാണ്. ശോഭനയുടെ നൃത്തസംഘത്തിനും (40 പേർ) ഓർക്കസ്ട്രക്കുമായി നിശ്ചയിക്കപ്പെട്ട പ്രതിഫലം 25 ലക്ഷം രൂപ. കുഞ്ഞാലിമരയ്ക്കാർ എന്ന പരിപാടിക്കായി സംഗീതമൊരുക്കിയ സംഗീത സംവിധായകൻ ശരത്തിന്റെ പ്രതിഫലം, എല്ലാ ചിലവുകളുമടക്കം 12 ലക്ഷം രൂപ.  സംഘാടന സമിതിയിൽ കോഴിക്കോട് അംഗമായിരുന്ന ഗായകൻ വി.ടി മുരളിക്ക്‌ കോഴിക്കോടിന്റെ പാരമ്പര്യം നിറയുന്ന സംഗീത പരിപാടി അവതരിപ്പിക്കുവാൻ അനുവദിച്ച തുക വെറും 20000 രൂപ മാത്രം. കലയ്ക്ക്‌ മൂല്യം നിശ്ചയിക്കാനാവില്ല എന്ന തത്വം പറയാമെങ്കിലും മോഹൻലാലിന്റെ പ്രൊഫഷണൽ പോലുമല്ലാത്ത ബാൻഡിനു, അതും ആദ്യമായി തട്ടിൽ കയറുന്ന ബാൻഡിനു 1.8 കോടി രൂപ പ്രതിഫലമായി നിശ്ചയിക്കപ്പെട്ടപ്പോൾ മറ്റുള്ള കലാകാരന്മാർക്ക് പ്രതിഫലമായി നൽകിയത് തുലോം തുച്ഛമായ സംഖ്യയാണെന്ന് പറയാതെ വയ്യ. കലാ സാംസ്കാരിക രംഗത്ത് നിന്നും പ്രതിഷേധവുമായി മുന്നിട്ടു വന്നവർ ഉയർത്തിയ പ്രധാന വാദഗതി ഈ പ്രതിഫലത്തിലെ വൈരുധ്യമാണ്.  ലാലിസത്തിനു പ്രതിഫലം നിശ്ചയിക്കുന്ന അവസരത്തിൽ അത് മോഹൻലാലും ബാൻഡിന്റെ ഭാഗമായ മറ്റു ചില ഗായകരും മാത്രമാണ് ഇതിൽ ഉണ്ടായിരുന്നത്. പ്രതിഫലത്തെ ചൊല്ലി വിവാദമുയർന്നപ്പോഴാണ് ഹരിഹരൻ, കാർത്തിക്, എം ജി ശ്രീകുമാർ, സുജാത തുടങ്ങിയ ഗായകരെ ഇതിൽ ഉൾപ്പെടുത്തിയത്. അവർക്ക് നാമമാത്രമായ ഗാനങ്ങൾ നൽകി, ഭൂരിഭാഗം പാട്ടുകളും പാടിയത് ലാൽ തന്നെയായിരുന്നു. അതിൽ പങ്കെടുത്ത വിവിധ ഗായകർക്കും അവർക്കുള്ള മറ്റു സൗകര്യങ്ങൾക്കുമായി 2 കോടി രൂപ ആവശ്യമായി വരും എന്ന് പറഞ്ഞത്തിലെ യുക്തിരാഹിത്യം അവരുടെ പ്രകടനത്തിൽ നിന്ന് തന്നെ വെളിവായി എന്ന് വേണം കരുതാൻ. ഒരു നടന്റെ ബാൻഡിനെ ലോഞ്ച് ചെയ്യാൻ പൊതുജനങ്ങളുടെ പണം മുടക്കി അവസരം ഉണ്ടാക്കണമായിരുന്നോ എന്നൊരു ചോദ്യം കൂടി അവിടെ അവശേഷിപ്പിക്കുന്നു ഈ വിവാദങ്ങൾ.

ലാലിസത്തെ പ്രതിരോധിച്ചാൽ...

ഏകദേശം 27 വർഷത്തെ ഇടവേളക്ക് ശേഷമാണ് ദേശീയ ഗെയിംസ് കേരളത്തിൽ എത്തുന്നത്.  അതിനു വേണ്ട സംവിധാനങ്ങൾ ഒരുക്കുന്നതിൽ പരാജയപ്പെട്ടു എന്ന് പഴി കേൾക്കുന്ന അവസരത്തിലാണ് സംഘാടകർ ലാലിസത്തെ ഉദ്ഘാടനത്തിലേക്ക് കൊണ്ടു വരുന്നത്. എ ആർ രഹ്മാനെയായിരുന്നു അവർ ആദ്യം ഉദ്ദേശിച്ചിരുന്നതെന്നും അദ്ദേഹത്തിന്റെ പ്രതിഫലം താങ്ങാൻ വയ്യത്തതിനാൽ മോഹൻലാലിനോട് ഇതിൽ പങ്കെടുക്കാൻ ആവശ്യപ്പെടുകയായിരുന്നു. ലാലിസം എന്ന ബാൻഡിനെ കുറിച്ചുള്ള  വാർത്തകൾ പുറത്ത് വന്നിട്ട് കുറച്ചു നാളുകൾ ആയി എങ്കിലും ഈ ഒരു പ്രോഗ്രാമിന് വേണ്ടിയാകണം ആദ്യമായി അവർ റിഹേഴ്സൽ ചെയ്തിട്ടുണ്ടാകുക. കുറഞ്ഞ സമയത്തിൽ തട്ടിക്കൂട്ടിയെടുത്ത ഒരു പ്രോഗ്രാം തന്നെയാണിത് എന്ന് വ്യക്തം. ഇന്നത്തെ പല ഗാനമേളകളും പോലെ പാട്ടുകൾ റെക്കോർഡ് ചെയ്ത്, സ്റ്റേജിൽ പോസ്റ്റീവ് ട്രാക്ക് തന്നെ പ്ലേ ചെയ്ത് ചുണ്ടനക്കുക എന്ന വഴി തന്നെയാണ് അവരും സ്വീകരിച്ചത്. പലപ്പോഴും കാണികൾ അറിയുന്നില്ലെങ്കിലും, കേരളത്തിലെ ഒട്ടുമിക്ക ഗായകരും അവലംബിക്കുന്ന ഒരു രീതിയാണിത്. അവർക്കതിൽ വിജയിക്കാൻ കഴിയുന്നു എന്നിടത്താണ് ഗാനമേളയുടെ വിജയം. പഴയകാലത്ത് ഓർക്കസ്ട്രയുടെ അഭാവത്തിൽ, ഗാനമേളകളിൽ മൈനസ് ട്രാക്കിട്ട് പാട്ടുകൾ പാടിയിരുന്നു. ഇന്നത് സാങ്കേതികത വളർന്നതിനാൽ പോസിറ്റീവ് ട്രാക്ക് തന്നെ ഇട്ട് അധരവ്യായാമം നടത്തുന്ന പ്രവണതയാണ് കൂടുതലും. പല റിയാലിറ്റി ഷോകളിൽ വരെ ഇത് സംഭവിക്കുന്നു എന്ന് പാലക്കാട് ശ്രീറാം വെളുപ്പെടുത്തിയത് നമുക്ക് മുന്നിൽ നിൽക്കുന്നു. കുറഞ്ഞ സമയത്തിനുള്ളിൽ പരിപാടികൾ ആസൂത്രണം ചെയ്ത് നടത്തിയത്തിലെ പിഴവുകളാണ് ഈ പരിപാടി പരാജയപ്പെടാനുള്ള കാരണം എന്നാണ് ഞാൻ കരുതുന്നത്. തന്റെ ബാൻഡിന്റെ ആദ്യ പെർഫോർമൻസിനു അദ്ദേഹം തിരഞ്ഞെടുത്ത വേദി തെറ്റായി പോയി എന്ന് തോന്നുന്നു. ഇതൊരു പൊതു പരിപാടിയായിരുന്നു, അത്തരം ഒരു വേദി തന്റെ ബാൻഡ് തുടക്കം കുറിക്കാൻ അനുയോജ്യമാണോ എന്നൊരു സംശയമുണ്ട്, പ്രത്യേകിച്ചും ആസൂത്രണത്തിലും ആവിഷ്കാരത്തിലും പല തരം ന്യൂനതകളെ മറികടന്നാണ് തങ്ങൾ ഈ പരിപാടി അവതരിപ്പിച്ചത് എന്ന് രതീഷ്‌ വേഗ തന്നെ സമ്മതിക്കുമ്പോൾ. അവർക്ക് 100 ശതമാനം സ്വാതന്ത്ര്യത്തോടെ ആസൂത്രണം നടത്തി കൂടുതൽ ആത്മവിശ്വാസത്തോടെ നടത്താൻ കഴിയുന്ന ഒരു വേദി, അതായിരുന്നു ഉചിതമായ ഒരു വേദി. ആ തിരഞ്ഞെടുപ്പിലെ വീഴ്ചയും ആ പരാജയത്തിന്റെ ആക്കം കൂട്ടി എന്ന് നിസ്സംശയം പറയാം.

ലാലിസമായിരുന്നോ ഉചിതം?

ബാൻഡുകൾക്ക് ഒരു പഞ്ഞവുമില്ലാത്ത ഒരു നാടാണ് കേരളം. അവിയൽ, തൈക്കുടം ബ്രിഡ്ജ്, ആഗം, മദർ ജെയിൻ തുടങ്ങി ജനപ്രീതി ആർജ്ജിച്ച ഒട്ടേറെ ബാൻഡുകൾ നമുക്കുണ്ട്. പല വേദികളിലായി നിരവധി ലൈവ് പ്രോഗ്രാമുകൾ അവതരിപ്പിക്കുകയും വിജയിപ്പിക്കുകയും ചെയ്ത ബാൻഡുകളാണവ.  ഒരു പക്ഷേ അവർക്ക് ലഭിക്കേണ്ടിയിരുന്ന ഒരു അവസരമായിരുന്നു ലാലിസത്തിനു ലഭിച്ചത് എന്ന് കൂടി പറയാം. മോഹൻലാൽ എന്ന നടന്റെ താരമൂല്യം കൊണ്ടാകാം ലാലിസത്തിനു നറുക്ക് വീണത്, പക്ഷേ ഇതിനേക്കാൾ നല്ലൊരു പ്രകടനം കാഴ്ചവയ്ക്കുവാൻ ആ ബാൻഡുകൾക്ക് കഴിയുമായിരുന്നു എന്നത് ഒരു വസ്തുതയായി അവശേഷിക്കുന്നു.  ദേശീയ ഗെയിംസ് ആയതിനാൽ നമ്മുടെ രാജ്യത്തിന്റെ വിവിധ ഭാഗത്ത് നിന്നുള്ള കലാകാരന്മാരെ ഉൾപ്പെടുത്തിയുള്ള കലാരൂപങ്ങൾ അവതരിപ്പിക്കുവാനുള്ള ഒരു ശ്രമം സംഘാടകരുടെ ഭാഗത്ത് നിന്നുമുണ്ടായില്ല. തനി കേരളീയമായ പരിപാടികൾ മാത്രമാണുണ്ടായിരുന്നത് എന്ന വിമർശനവും ഉയർന്നു കേൾക്കുന്നു.

മോഹൻലാൽ ഒരു മികച്ച നടൻ, പക്ഷേ ബാൻഡ്...?

കഴിഞ്ഞ 36 വർഷമായി മലയാള സിനിമയിൽ നിറഞ്ഞു നിൽക്കുന്ന നടന വൈഭവം അതാണ്‌ മോഹൻലാൽ. പല പല വേഷങ്ങളിൽ, ഭാവങ്ങളിൽ നമ്മെ ചിരിപ്പിക്കുകയും ചിന്തിപ്പിക്കുകയും, കരയിക്കുകയും ഒക്കെ ചെയ്ത നടൻ. രണ്ട് ദേശീയ പുരസ്കാരം, ഒട്ടനവധി സംസ്ഥാന പുരസ്കാരങ്ങൾ, പത്മശ്രീ, അദ്ദേഹത്തെ തേടിയെത്താത്ത ആദരങ്ങൾ ചുരുക്കം. ഒരു നടൻ എന്ന നിലയിൽ മലയാളികൾ അദ്ദേഹത്തെ ആദരിക്കുകയും സ്നേഹിക്കുകയും ചെയ്യുന്നു. ചില സിനിമകളിൽ അദ്ദേഹം പാടിയിട്ടുമുണ്ട്. ലാലിസത്തിൽ അദ്ദേഹത്തിന്റെ പങ്കാളിയായ രതീഷ്‌ വേഗ ഈണം പകർന്ന ആറ്റുമണൽ പായയിൽ എന്ന ഗാനം കൊച്ചു കുട്ടികൾ വരെ ഏറ്റുപാടിയതുമാണ്. പക്ഷേ ഒരു പ്രൊഫഷണൽ ബാൻഡ് തുടങ്ങുക, അതിലെ പ്രധാന ഗായകനായി താൻ തന്നെ മാറുക എന്നത് എത്രത്തോളം യുക്തിപരമായ തീരുമാനമാണെന്ന് ഇപ്പോഴെങ്കിലും അദ്ദേഹം ചിന്തിക്കുന്നുവെങ്കിൽ നല്ലത് എന്ന് ഞാൻ കരുതുന്നു. ആ ബാൻഡിനു ലാലിസം എന്ന പേരിട്ടത് തന്നെ ആത്മരതിപരമായ ഒരു മനോഭാവത്തിന്റെ ദൃഷ്ടാന്തമായി വേണം കരുതാൻ. സംഗീതത്തെ കുറിച്ച് പറയുവാൻ ഞാൻ ആളല്ല, എന്നിരുന്നാലും ഒരു സിനിമക്ക് വേണ്ടി, സംഗീത സംവിധായകന്റെ നിർദ്ദേശത്തിൽ മ്യൂസിക് കണ്‍സോളിൽ നിന്ന് പാടുന്നതു പോലെയല്ല ഒരു വേദിയിൽ ലൈവായി പാടുന്നത്. കൊടികെട്ടിയ ഗായകർ വരെ സമ്മതിച്ചു തരുന്ന ലളിതമായൊരു സത്യമാണത്. പണ്ടത്തെ പോലെ ഓർക്കസ്ട്രക്കൊപ്പം ലൈവ് പാടി പാട്ടുകൾ റിക്കോർഡ് ചെയ്യുന്ന സംവിധാനം മണ്‍മറഞ്ഞിട്ട് വർഷങ്ങളാകുന്നു. കണ്‍സോളിൽ ഗാനത്തിന്റെ ഒരോ ഭാഗങ്ങളും പഞ്ച് ചെയ്തെടുത്ത് മിക്സ്‌ ചെയ്താണ് നാമിന്നു കേൾക്കുന്ന ഗാനങ്ങൾ നമുക്ക് മുന്നിൽ എത്തുന്നത്. ഫാൻസിനു ദഹിക്കുമെങ്കിലും സംഗീത പ്രേമികളെ ആനന്ദിപ്പിക്കുന്ന ഒന്നല്ല അദ്ദേഹത്തിന്റെ ഗാനങ്ങൾ. അത് കൊണ്ടു തന്നെ മോഹൻലാൽ ഒരു ബാൻഡ് തുടങ്ങുന്നു എന്ന വാർത്ത കേട്ടപ്പോൾ മനസ്സിലേക്ക് ഓടിയെത്തിയ ആശങ്കയും അത് തന്നെയായിരുന്നു.

വിമർശനങ്ങൾക്കു പിന്നിൽ...

ലാലിസത്തിന്റെ ആദ്യ പ്രകടനം പ്രേക്ഷകരെ നിരാശപ്പെടുത്തി എന്നത് സത്യം. ആരാധകരെ വരെ മുഷിപ്പിച്ചു അതെന്ന് പ്രതികരണങ്ങൾ വ്യക്തമാക്കുന്നു. കലാ സാംസ്കാരിക രംഗത്തുള്ളവർ ഈ വിവാദത്തിലേക്ക് കടക്കാതെ മാറി നിന്നപ്പോൾ, ഗായകൻ വി ടി മുരളിയും പാലക്കാട് ശ്രീരാമുമാണ് വിമർശനങ്ങളുമായി ആദ്യം കടന്നു വന്നത്. പക്ഷേ ആ ഊർജ്ജം സംഭരിച്ച് മോഹൻലാലിനെതിരെ ആഞ്ഞടിച്ചത് ചില രാഷ്ട്രീയക്കാരായിരുന്നു. ചാനലുകൾക്ക് നൽകിയ അഭിമുഖങ്ങളിലും ചാനൽ ചർച്ചയിലും മോഹൻലാലിനെതിരെ ഒളിഞ്ഞും തെളിഞ്ഞും അവർ അമ്പെയ്യുന്നത് നമ്മൾ കണ്ടതാണ്. ലാലിസത്തിന് മാത്രമല്ല, അതിനു മുന്നേ അവതരിപ്പിച്ച കുഞ്ഞാലി മരയ്ക്കാർ അനുസ്മരണ പരിപാടിക്കും നിലവാരമില്ലയിരുന്നുവെന്നും ചിലർ ചാനൽ ചർച്ചയിൽ വാശിയോടെ വാദിക്കുന്നത് കണ്ടു. ഭരണ പക്ഷത്ത് നിന്നവർ മന്ത്രിമാരെയും സംഘാടകരേയും സംരക്ഷിച്ചു കൊണ്ട് മോഹൻലാലിനെ ഒറ്റപ്പെടുത്തി ആക്രമിക്കുവാനാണ് ശ്രമിച്ചത്. പ്രതിപക്ഷമോ കിട്ടിയ അവസരം മുതലാക്കി രാഷ്ട്രീയമായ വിരോധം തീർക്കുകയാണ് ചെയ്തത്. പക്ഷേ ഇതിലെല്ലാം അന്തർലീനമായ ഒരു വസ്തുത ലാലിസത്തിന്റെ പേരിൽ അദ്ദേഹത്തെ താറടിക്കുന്നുവെങ്കിലും, യഥാർഥ കാരണം മറ്റൊന്നാണെന്നതാണ്. ദി കംപ്ലീറ്റ്‌ ആക്ടർ എന്ന സൈറ്റിലെ ബ്ലോഗിലൂടെ മോഹൻലാൽ സ്ഥിരമായി ആരാധകരുമായി സംവദിക്കുന്നുണ്ട്. കഴിഞ്ഞ കുറച്ചു കാലമായി അദ്ദേഹത്തിന്റെ വാക്കുകൾ പലതും കുത്തി നോവിച്ചത് ഇവിടെ വികസനത്തിന്റെ സാരഥികളായി സ്വയം വാഴ്ത്തുകയും എന്നാൽ നാടിനു വേണ്ടി കാര്യമായൊന്നും ചെയ്യാതെ അധികാര ദുർവിനയോഗം ചെയ്യുന്ന ചില രാഷ്ട്രീയക്കാരെയാണ്. അദ്ദേഹത്തിന്റെ വാക്കുകളുടെ മൂർച്ഛ കൊണ്ട് അദ്ദേഹത്തിന്റെ ബ്ലോഗുകൾ പലതും ചർച്ചയായിരുന്നു.  അദ്ദേഹം ഫോർ എ ബെറ്റർ ടുമോറോ എന്ന തലക്കെട്ടിൽ അന്റാർട്ടിക്കയിൽ നിന്നുമെഴുതിയ ലേഖനം അവയിലൊന്നായിരുന്നു. മാധ്യമങ്ങളും നവ മാധ്യമങ്ങളും അത് ഉയർത്തിക്കാട്ടി നമ്മുടെ രാഷ്ട്രീയക്കാരെ പ്രതിക്കൂട്ടിലാക്കുകയും ചെയ്തിരുന്നു. അധ്യാപക ദിനത്തിൽ പ്രധാനമന്ത്രി കുട്ടികളോടായി പറഞ്ഞ വാക്കുകളെ പ്രകീർത്തിച്ചെഴുതിയ ബ്ലോഗും രാഷ്ട്രീയക്കാരെ ചൊടിപ്പിച്ചു എന്ന് കണ്ടതാണ്. തനിക്ക് വിവിധ സ്ഥാനമാനങ്ങൾ നേടാനായി മോഹൻലാൽ എന്ന 'നായർ' നടത്തുന്ന പ്രീണനമാണത് എന്ന് ഒരു യുവ എം എൽ എ തന്റെ ഫേസ്ബുക്കിൽ കുറിച്ചതും നാം കണ്ടു. ഇങ്ങനെ പലതരത്തിൽ അഭിമാനം വൃണപ്പെട്ട് നിന്നവർ ഒരവസരം കിട്ടിയപ്പോൾ ഒന്നിച്ചൊന്നായി വളഞ്ഞിട്ട് ലാലിനെ ആക്രമിക്കുവാൻ കിട്ടിയ സമയം നന്നായി ഉപയോഗപ്പെടുത്തി എന്ന് വേണം കരുതാൻ. സർക്കാരിന്റെ പണം മോഹൻലാൽ അടിച്ചു മാറ്റി എന്നൊരു വികാരം സൃഷ്ടിക്കുന്നതിൽ അവർ വിജയിച്ചു എന്ന് ഞാൻ വിശ്വസിക്കുന്നു. അത് വഴി ഇനി ലാലിന്റെ ഭാഗത്ത് നിന്ന് ഇനിയുണ്ടാകുന്ന വിമർശനങ്ങളെ ഒരു മറുവാദത്തിലൂടെ പ്രതിരോധിക്കാൻ കഴിയുമെന്ന ഒരു തന്ത്രം. സന്ദേശം സിനിമയിൽ ശങ്കരാടി ഉപദേശിക്കുന്ന അതേ രാഷ്ട്രീയ കുബുദ്ധി. ഈ ആരോപണങ്ങൾ അദ്ദേഹത്തെ സ്പർശിക്കും എന്ന് ഞാൻ കരുതുന്നില്ല. എന്നാൽ ഇത്തരം ആരോപണങ്ങൾ അദ്ദേഹത്തെ നോവിച്ചിട്ടുണ്ടാകാം. തനിക്ക് ചിലവായ പണം ഒരു ചെക്കിലൂടെ മടക്കി നൽകി ആ ഉദ്യമത്തെ മുളയിലെ നുള്ളിയിരിക്കുകയാണ് മോഹൻലാൽ. അഴിമതിയും സ്വജനപക്ഷപാതവും നടത്തിയിട്ടും കോഴ വാങ്ങിയിട്ടും ഒരുളുപ്പുമില്ലാതെ മന്ത്രിക്കസേരയിലിരുന്ന് നമ്മെ ഭരിക്കുന്ന അഴിമതി വീരന്മാരുടെയും ചാനലുകളിൽ വന്നിരുന്ന് ലാലിസത്തെ കുറിച്ച് ഘോരഘോരം പ്രസ്ഥാവനകൾ നടത്തിയ അവരുടെ ഇറാൻമൂളികളുടേയും മുഖത്തേക്കാണ് താങ്കൾ ആ പണം പിച്ചക്കാശു പോലെ എറിഞ്ഞു കൊടുത്തത്. ആ ആർജ്ജവത്തെ,  അഭിനന്ദിക്കാതെ വയ്യ. അതിനൊരു സല്യൂട്ട്.

സോഷ്യൽ മീഡിയയിൽ തിളങ്ങിയ ലോലിസം

എന്തിനും ഏതിനും അഭിപ്രായം പ്രകടിപ്പിക്കുവാൻ നമുക്ക് ലഭിച്ച ഒരു വേദിയാണ് നവമാധ്യമങ്ങൾ. ഇത്തരം ഒരു വേദിയുടെ അഭാവത്തിൽ, കാമ്പസുകളിൽ ഈ ആശയങ്ങൾ പരസ്പരം പങ്കു വച്ചിരുന്ന ഒരു യുവ തലമുറ നമുക്കുണ്ടായിരുന്നു. എന്നാൽ നവമാധ്യമങ്ങളുടെ രംഗപ്രവേശത്തോടെ 'വിർച്വൽ' ആയെങ്കിലും പ്രതികരിക്കുവാൻ ആളുകൾക്ക് കഴിയുന്നു എന്ന് മനസ്സിലാക്കാം. പക്ഷേ അഭിപ്രായ പ്രകടനങ്ങൾക്കും വിമർശനങ്ങൾക്കുമപ്പുറം വ്യക്തിഹത്യയിലേക്കും ശബ്ദതാരവലിയിൽ പോലുമില്ലാത്ത പദങ്ങളിലൂടെ ആളുകളെ, പ്രത്യേകിച്ചും  സെലിബ്രിട്ടികളേയും ആക്ഷേപിക്കുകയും അധിക്ഷേപിക്കുകയും ചെയ്യൂന്ന ഒരു പ്രവണത നാം കണ്ടിട്ടുണ്ട്. സച്ചിനെ അറിയില്ല എന്ന് പറഞ്ഞ ഷറപ്പോവക്കു ലഭിച്ച പ്രതികരണവും മോഹൻലാലിന്റെ സൈറ്റ് ഹാക്ക് ചെയ്തതിനെ തുടർന്ന് പാക്കിസ്ഥാൻ ആർമിയുടെ ഫേസ്ബുക്ക് പേജിൽ നടത്തിയ കോലാഹലങ്ങളുമെല്ലാം നാം കണ്ടതാണ്. ലാലിസത്തെയും നവമാധ്യമങ്ങൾ വെറുതെ വിട്ടില്ല എന്ന് പറയാം. ലാലിസം ദൂരദർശനിൽ സംപ്രേക്ഷണം ചെയ്തു തുടങ്ങിയതു മുതൽ ഫേസ്ബുക്കിലും ട്വിറ്റരിലും അതിനെക്കുറിച്ചുള്ള കമന്റുകൾ വന്നു തുടങ്ങിയിരുന്നു. പരിപാടി ഒരു പരാജയത്തിലേക്ക് കൂപ്പു കുത്തിയതോടെ വിമർശനങ്ങൾ എല്ലാ പരിധികളും ലംഘിച്ചു മുന്നേറി. കഴിഞ്ഞ 36 വർഷമായി അഭ്രപാളികളിൽ നമ്മെ വിസ്മയിപ്പിച്ച ഒരു നടനെന്ന പരിഗണന പോലുമില്ലാതെയാണ് പല വിമർശനങ്ങളും ഉയർന്നു വന്നത്. സൂപ്പർ താരങ്ങളുടെ ഫാൻസ്‌ തമ്മിലുള്ള മത്സരം എന്നാൽ അധോലോക രാജാക്കന്മാർക്കിടയിലുള്ള കുടിപ്പകയേക്കാൾ രൂക്ഷമാണ്. വർഷങ്ങളായി തുടരുന്ന ഈ നിഴൽയുദ്ധത്തിലെ അവസാന കണ്ണിയായി ലാലിസത്തെ കുറിച്ചുള്ള വിമർശനങ്ങൾ. ഒരു സൂപ്പർസ്റ്റാറിന്റെ വീഴ്ച മറ്റേ സൂപ്പർ സ്റ്റാറിന്റെ ഫാൻസ്‌ നന്നായി ആസ്വദിച്ചു. ട്രോളെന്ന പേരിൽ ഫേസ്ബുക്കിലും വാട്ട്സാപ്പിലും പടച്ചു വിട്ട തമാശകൾ പലപ്പോഴും എല്ലാ സീമകളും ലംഘിച്ചവയായിരുന്നു. സാധാരണ ഇത്തരം കാര്യങ്ങളിൽ മുന്നിട്ടിറങ്ങുന്ന മോഹൻലാൽ ഫാൻസ്‌ ഇത്തവണ ഒന്നും ചെയ്യാനാകാതെ, ഒരു ന്യായീകരണവും പറയാനില്ലാതെ വിഷണ്ണരായി നിൽക്കുന്ന കാഴ്ചയും കണ്ടു. മോഹൻലാലിന്റെ കത്ത് പുറത്ത് വരുന്നത് വരെ ഈ കോലാഹലങ്ങൾ തുടർന്നു. മോഹൻലാൽ എന്ന അഭിനയ പ്രതിഭയെ മറന്നു കൊണ്ട് നടത്തിയ ഇത്തരം പ്രചാരണങ്ങൾ അപ്പോഴെങ്കിലും കെട്ടടങ്ങിയതിൽ നമുക്ക് ആശ്വസിക്കാം. ഒരു പക്ഷേ ഇത്തരം ഒരു പ്രതികരണം മോഹൻലാൽ ഒരിക്കലും പ്രതീക്ഷിച്ചിട്ടുണ്ടാവില്ല. അദ്ദേഹത്തിന്റെ കത്തിൽ നിന്നും അത് വ്യക്തമാണ്. സോഷ്യൽ മീഡിയയിൽ എന്തിനും ഏതിനും പടവാളെടുക്കുന്ന പ്രവണത നാം മാറ്റേണ്ടതില്ലേ എന്ന ചോദ്യം സ്വയം വിമർശനാത്മകമായി ചോദിക്കുവാൻ ഞാൻ ഈ അവസരം വിനയോഗിക്കുന്നു.

സോഷ്യൽ മീഡിയയിലെ ചില പ്രതികരണങ്ങൾ താഴെ ചേർക്കുന്നു.

Y do u need mohanlal to lipsync his own songs? And national games? #Lalisom y do it mohanlal?#Mohanlal #Lalisom #Lolisom
— Chaitanya (@chait2310) February 2, 2015

പരിപാടി കാണാത്തവർ കൂടി വന്നു കളിയാക്കിയിട്ടു പോണ് #lolisom #Lalisom
— പിഷാരടിയുടെ കുട്ടുകാ (@premnabil) February 1, 2015

ലാലേട്ടാ ഇതല്ല ലാലിസം താങ്കള്‍ അങ്ങ്‌ അഭിനയിച്ച്‌ വിസ്മയിപിച്ച കഥാപാത്രങ്ങളിൽ ഞങ്ങൾ കണ്ടതാണു ലാലിസം.
— ജെയിംസ് ബോണ്ട്™ (@bond_alive) February 1, 2015

ഇതിലും സൂപ്പർ നമ്മടെ Avial, Vidwan, Thaikudam Bridge, Mother Jane -ഉഗളുടെ ഒരു collaboration ആയിരനു. #NationalGames #Lolisom
— poLarOids (@nummadekochi) January 31, 2015

അതിർത്തിയിലെ നുഴഞ്ഞുകയറ്റക്കാരെ പാടി ഓടിക്കാൻ ലഫ്റ്റനന്റ്‌ കേണൽ മോഹൻലാലിന്റെ ലാലിസം ബാന്റിനെ സർക്കാർ ചുമതലപ്പെടുത്തി.
— Nauphal (@Nauphal) January 31, 2015

ലാലിസം ഒരു ബോറിസം...
— അശ്വതി (@Ash_AR_Speaks) January 31, 2015

Always love you Laletta. But #Lalisom band shouldn't have ever made. Having said that , no matter in trying. So, #Respect .
— Hisham (@hishh) February 2, 2015

The ferocious Mohanlal fans have taken a real hiding after #Lalisom. 48 hours and still dead mute :( Mammootty fans having a field day, btw.
— Anish Sahadevan (@scorpiosaurus) February 2, 2015

കുട്ടി കാര്യവട്ടം കാര്യവട്ടം എന്ന് കേട്ടിട്ടുണ്ടോ?അവിടെ തിങ്ങിനിറഞ്ഞ അമ്പതിനായിരത്തോളം ജനങ്ങളെ ഒറ്റ പാട്ടുകൊണ്ടോഴിപ്പിച്ചവനാ ഞാൻ #lalisom
— khaleelRM (@khaleelRM) February 1, 2015

Why mohanlal uses the show for his band promotion? National media is watching and he sings like some antakshari game.#lalisom
— Nomadic Indian (@epvarunkumar) January 31, 2015

ഉദിത് നാരായണ്‍റ്റെ മൈക്ക് പിടുത്തം കണ്ടാലേ അറിയാരുന്നു അയാൾ പാടുന്നില്ലാന്ന്! So Pathetic #Lalisom
— Renjith (@MrCo_OL) January 31, 2015

രതീഷ്‌ വേഗം പറയൂ രണ്ടു കോടി എന്ത് ചെയ്തു? #lalisom
— ബാലേട്ടന്‍ (@bal_ettan) January 29, 2015

ലാലിസം ബാൻ്റിനെ ഇനി പള്ളിപ്പെരുന്നാളിൻ്റെ പ്രദക്ഷിണത്തിനു കൊട്ടുന്ന ബാൻ്റുസെറ്റിൻ്റെ കൂടെപോലും നിർത്താൻ കൊള്ളൂല്ല.. അവരൊക്കെ പൊളപ്പനാ
— കാഞ്ഞിരപളളി അച്ചായൻ (@Achayan_here) February 2, 2015

ലാലിസം മുഴുവനായിരുന്നു കണ്ട ഏതോ കായികതാരം ഹൃദയാഘാതം വന്ന് മരിച്ചുവത്രേ....
— സ്വാമി ട്വിറ്ററാനന്ദ (@fannaforu) February 2, 2015

എന്തൊക്ക ആയിരുന്നു രണ്ട് കോടി,മുപ്പത്തഞ്ച് വര്‍ഷം ,മ്യൂസിക് ട്രൂപ്പ് ,ലാലിസം അവസാനം ഘരാനാ മാജിക് പീക്കോക്ക്  ശവമായി.
— രാജകണ്ണ് (@deve_dee) January 31, 2015

ഫസ്റ്റ് ഇമ്പ്രെഷൻ ഈസ്‌ ദി ബെസ്റ്റ് ഇമ്പ്രഷൻ തിയറി നോക്കിയാൽ ലാലിസം ബാൻഡിന്റെ കാര്യം പോക്കാണ് .
— ചാത്തൻ (@chathan_) January 31, 2015

Meanwhile somewhere in Kerala Sreenivasan is already planning the script for the next Saroj Kumar movie. #Lolisom #Lalism #Lalisom
— Vineeth K.E (@kevnuker) February 2, 2015

ലാലിസത്തെ സംബന്ധിച്ച വിവാദങ്ങൾ കെട്ടടങ്ങി എന്ന് കരുതുന്നു. മോഹൻലാൽ തിരിച്ചു നൽകിയ പണം സർക്കാർ സ്വീകരിച്ച് ഈ വിവാദം ഇനി മുന്നോട്ട് കൊണ്ടു പോകാതിരിക്കട്ടെ എന്ന്പ്രാർഥിക്കാം. ഒരു പക്ഷേ മാധ്യമങ്ങളും ഫാൻസും ചേർന്നു സൃഷ്ടിച്ച ഒരു ഹൈപ്പ്, അത് ലാലിസത്തെ വളർത്തുന്നതിലുപരി തളർത്തുന്നതിനാണ് കാരണമായത്. മോഹൻലാൽ എന്ന നടനെ ഇഷ്ടപ്പെടുന്ന എനിക്ക്, വ്യക്തിപരമായി ആ ബാൻഡിനോടുള്ള വിയോജിപ്പ് ഞാൻ മുന്നേ എഴുതി കഴിഞ്ഞു. പക്ഷേ അത് അദ്ദേഹത്തിന്റെ സ്വാതന്ത്യമാണ്. അദ്ദേഹത്തിന്റെ ഭാഗത്ത് നിന്നുമുണ്ടായ പിഴവുകൾ അദ്ദേഹം തിരുത്തും എന്ന് ഞാൻ കരുതുന്നു. ഇനി ഈ ബാൻഡുമായി മുന്നോട്ട് പോകുന്നുവെങ്കിൽ, വ്യക്തമായ ഒരു പദ്ധതിയോടെ, ആസൂത്രണത്തോടെ, അതിലുപരി പാളിച്ച പറ്റാത്ത ഒരാവിഷ്കാരത്തോടെ അത് തിരികെ വരും എന്ന് കരുതാം. കലാകാരന്മാർ പൊതുവെ അങ്ങനെയാണ്, സമൂഹം അവരെ എഴുതി തള്ളുന്ന അവസരത്തിൽ ഒരു ഫീനിക്സ് പക്ഷിയെ പോലെ തിരികെ വരുവാൻ അവർക്ക് കഴിയും. അതാണ്‌ കലയുടെ ശക്തി, കലാകാരന്റെ ധൈര്യം. മോഹൻലാലും അതിൽ നിന്ന് വിഭിന്നനല്ല എന്ന് ഞാൻ വിശ്വസിക്കുന്നു. എല്ലാ വിധ ആശംസകളും!

കടപ്പാടുകൾ
ഫോട്ടോ: ലാലിസം - ഒഫീഷ്യൽ ഫേസ്ബുക്ക് പേജ്
ആർ ടി ഐ ഡോക്യുമെന്റ്സ് - ദി ന്യൂസ് മിനിട്ട്
വീഡിയോ - യൂട്യൂബ് അക്കൗണ്ട് ബാലു കൃഷ്ണ
ലിങ്കുകൾ - മോഹൻലാൽ ബ്ലോഗ്, മനോരമ ചാനൽ
ട്വീറ്റുകൾ - ട്വിറ്റരിൽ ലാലിസത്തെ തുടർന്നു വന്ന ട്വീറ്റുകൾ.

ഓർക്കുട്ട് ഇനി വെറുമൊരു ഓർമ്മക്കൂട്ട്

എന്നന്നേക്കുമായി ഓർക്കുട്ട് അവസാനിക്കാൻ പോകുന്നു. ഇത് വെറും ഒരു ഓർമ്മയായി മാറുന്നു എന്ന് വിശ്വസിക്കുവാൻ ഇപ്പോഴും സാധിക്കുന്നില്ല. എന്നന്നേക്കുമായി അടച്ചു പൂട്ടുവാൻ മണിക്കൂറുകൾ മാത്രം ബാക്കി നിൽക്കെ, എന്തിനോ വെറുതെ ഒരു ഓർമ്മക്കുറിപ്പ് എഴുതണം എന്നൊരു തോന്നൽ.  ഒരു പക്ഷേ മറ്റു പലരെ പോലെയും, ആദ്യമായി ഞാൻ ഭാഗഭാക്കായ സോഷ്യൽ മീഡിയ, അത് ഓർക്കുട്ട് ആയിരുന്നു. ഇന്ന് ഫേസ്ബുക്ക്, ഗൂഗിൾ പ്ലസ്, ട്വിറ്റർ എന്ന് വേണ്ട, സംവദിക്കുവാൻ നമുക്ക് സോഷ്യൽ മീഡിയകൾ പലതാണ്. ആ അവസരത്തിൽ ഇത്തരമൊരു കുറിപ്പ് ബാലിശമല്ലേ എന്ന് തോന്നാം. ഒരു മാധ്യമത്തെ, അതും ഫേസ്ബുക്ക് എന്ന നവമാധ്യമം കടന്നു വന്നപ്പോൾ ഉപേക്ഷിച്ച ഒരു മാധ്യമത്തെ, വർഷങ്ങളായി ആരും തിരിഞ്ഞു നോക്കാൻ പോലും ശ്രമിക്കാത്ത മാധ്യമത്തെ, അതിന്റെ അന്ത്യനിമിഷങ്ങളിൽ ഓർത്ത് കണ്ണീർ പൊഴിക്കുന്നതിലെ സാംഗത്യമെന്ത് എന്ന് പലരും ചിന്തിച്ചേക്കാം. പക്ഷേ ഇതാവും ആ അവസരം, അല്ലെങ്കിൽ ഇനി ഒരു അവസരം ഉണ്ടാവില്ല ഒരു പക്ഷേ ഒന്ന് തിരിഞ്ഞു നോക്കാൻ, എല്ലാം ഒന്ന് ഓർത്തെടുക്കുവാൻ.

പഠന സംബന്ധമായി കംപ്യൂട്ടർ ഉണ്ടായിരുന്നുവെങ്കിലും, ഇന്റർനെറ്റ് നെറ്റ് എന്ന ലോകത്ത് എന്റെ സഹചാരികൾ യാഹൂ മെയിലും ചാറ്റും മാത്രമായിരുന്നു. ഒരു നൊസ്റ്റാൾജിയ പോലെ ആ രണ്ട് അക്കൗണ്ടും ഞാനിപ്പോഴും കൊണ്ടു നടക്കുന്നു എന്നത് മറ്റൊരു കാര്യം. ആ ലോകത്തേക്ക് ആദ്യമായി കടന്നു വന്ന അപരിചിതനായിരുന്നു ജീമെയിൽ. അല്പം വിഷമത്തോടെയെങ്കിലും യാഹൂ മെയിലിനൊപ്പം ഞാൻ പതിയെ ജീമെയിലിനേയും ഒപ്പം ചേർത്തു. അതിന്റെ വളർച്ച, അതിൽ കൂടുതലായി ചേർത്തു വന്ന ഫീച്ചറുകൾ, യാഹുവിന്റെ കട്ട ഫാൻ ആയിരുന്ന എന്നെ, മുഴുവനായും തന്നെ ജീമെയിലിലേക്ക് പറിച്ചു നടുവാൻ പ്രേരിപ്പിച്ചു. ആ കാലത്ത് ഞാൻ ജോലി നോക്കിയിരുന്ന കമ്പനിയിൽ ജീമെയിലോ യാഹൂ മെയിലോ ഒന്നും തന്നെ തുറക്കുവാൻ പോലും അനുവദിച്ചിരുന്നില്ല. ബ്ലോഗിങ്ങ് എന്ന അസ്കിത അന്ന് വേർഡ്‌പ്രസ്സിൽ ആയിരുന്നു പ്രധാനമായും തീർത്തിരുന്നത്, കശ്മലന്മാർ, എന്റെ ബ്ലോഗിങ്ങ് കൂടിയിട്ടോ എന്തോ മാസങ്ങൾക്കുള്ളിൽ അതും അവന്മാർ ബ്ലോക്കി. ആ കാലത്താണ് ഓർക്കുട്ടിന്റെ കടന്നു വരവ്. അവനെയും കമ്പനിക്കാർ ബ്ലോക്കി. ഒരു അക്കൗണ്ട് ഉണ്ടാക്കിയെങ്കിലും വിരലിലെണ്ണാവുന്ന സുഹൃത്തുക്കൾ മാത്രം. അതും കോളേജിൽ സഹപാഠികൾ, കുറച്ചു സഹപ്രവർത്തകർ. അത് നോക്കുന്നത് തന്നെ മാസത്തിലൊരിക്കൽ വീട്ടിൽ പോകുമ്പോൾ. അന്നത്തെ മണിക്കൂറിന് 40 രൂപ ഇന്റർനെറ്റ് ചാർജ്ജ് കാരണം ഇന്റർനെറ്റ് കഫേയുടെ അടുത്തു കൂടെ പോലും അന്ന് പോവാറില്ല.

അക്കാലത്തെ ബി എസ് എൻ എലിന്റെ ഡയലപ് കണക്ഷൻ സ്റ്റാർട്ട് ചെയ്യുമ്പോൾ ഉള്ള ആ ശബ്ദം തന്നെ വളരെ ഇമ്പമുള്ളതായിരുന്നു. 54 kbps സ്പീഡ് കിട്ടുമായിരുന്ന ആ സമയത്ത് വല്ലപ്പോഴും 72 ഓ 90 ഓ കിട്ടിയാൽ ലോട്ടറി. ഇനി കണക്ഷൻ കിട്ടിയാലോ, ഒന്നിലധികം വിൻഡോകൾ തുറക്കാൻ പറ്റില്ല, സ്ലോ ആകും. അന്നീ ടാബുകൾ ഇല്ലാത്തതിനാൽ നമ്മുടെ പഴയ ഇന്റർനെറ്റ് എസ്ക്പ്ലോറർ ആണ്.  ഒരു മണിക്കൂറെടുക്കും മെയിൽ ചെക്ക് ചെയ്യാൻ അത് കഴിഞ്ഞായിരുന്നു പ്രധാനമായും ഓർക്കുട്ടിലേക്ക് കയറുന്നത്. ആദ്യമൊക്കെ നല്ല ബോറായി തോന്നിയ ഈ സംഭവം, ഒരിക്കൽ ഉപേക്ഷിച്ചതാണ്. ആയിടെയാണ് നമ്മുടെ ഒരു സഹപ്രവർത്തകൻ പ്രോക്സി വഴി ഇത് കമ്പനിയിലും ആക്സസ് ചെയ്യാം എന്ന് കണ്ടുപിടിച്ചത്. അതോടെ അത് ഞങ്ങളുടെ ടീമിൽ മുഴുവൻ ഒരു ജ്വരമായി മാറി. ആദ്യകാലങ്ങളിൽ സ്ക്രാപ്പുകളുടെ എണ്ണമെടുക്കുന്നവർ വരെ ഉണ്ടായിരുന്നു അവിടെ.  നെറ്റ്വർക്കിംഗ് ടീം മേടിക്കുന്ന കാശിനു കൂറ് കാണിച്ച് ഈ പ്രോക്സികളും ബ്ലോക്ക് ചെയ്തപ്പോ, പിന്നെ പുതിയ പ്രോക്സികൾക്കായി ഓട്ടം തുടങ്ങി. ഒരു പ്രോക്സിക്ക് ഒന്നോ രണ്ടോ ദിവസമായിരുന്നു ആയുസ്സ്. നമ്മൾ പ്രോക്സി കണ്ടുപിടിക്കുന്നു, അവരത് ബ്ലോക്ക് ചെയ്യുന്നു. നമ്മൾ അടുത്ത പ്രോക്സി കണ്ടുപിടിക്കുന്നു, അവർ അതും ബ്ലോക്ക് ചെയ്യുന്നു. ഈ ക്യാറ്റ് & മൗസ് ഗെയിം കുറെ കാലം കളിച്ചു കഴിഞ്ഞപ്പോൾ, പ്രോക്സി കണ്ടുപിടിച്ച് ഞങ്ങളും, ബ്ലോക്ക് ചെയ്ത് നെറ്റ്വർക്കിംഗ് ടീമും തളർന്നു.

പിന്നെ ബാംഗ്ലൂർ എന്ന പുതിയ തട്ടകത്തിലേക്ക് എത്തിയപ്പോളാണ് ഓർക്കുട്ടിനെ അടുത്തറിയുന്നത്. ഓർക്കുട്ടിങ്ങ് വെറുതെ സ്ക്രാപ്പിങ്ങ് മാത്രമായി ഒതുക്കിയിരുന്ന ഞാൻ പല കമ്മ്യൂണിറ്റികളിലും ജോയിൻ ചെയ്തു. കൂടുതലായും മലയാളം ബേസ് ആയ കമ്മ്യൂണിറ്റികൾ ആയിരുന്നു അവയിൽ പലതും. അതൊരു നല്ല തുടക്കം ആയിരുന്നു. മന്ദാരം, എന്റെ മലയാളം, പാഥേയം, സോപാനം, കണിക്കൊന്ന തുടങ്ങി ഒരുപിടി നല്ല കമ്മ്യൂണിറ്റികളിൽ ഭാഗമായി. അവിടെ നിന്നും. ഞാൻ ഇത് വരെ കണ്ടിട്ടില്ലാത്ത കുറെയധികം നല്ല ആളുകളെ പരിചയപ്പെട്ടു. ആശയപരമായം സൌഹൃദപരമായുമുള്ള ഒരുപാട് ചർച്ചകളുടെ ഭാഗമാകുവാൻ കഴിഞ്ഞു. സോഷ്യൽ മീഡിയ എന്നത് വെറുമൊരു വിനോദോപാധി എന്നതിനപ്പുറം   പരസ്പരം ആശങ്ങൾ പങ്കുവെക്കുവാനും കൂടുതൽ അറിവുകൾ നേടുവാനുമുള്ള സ്ഥലം കൂടിയാണ് എന്ന് തിരിച്ചറിയുന്നത് ആ സമയത്താണ്. അത് ഒരുപാട് നല്ല സുഹൃത്തക്കളെ എനിക്ക് സമ്മാനിച്ചു. സമാനപരമായ ചിന്താഗതികൾ പുലർത്തുന്നവരും, ആശയപരമായ വിരുദ്ധചേരികളിൽ നിന്നിരുന്നവരും അവരിൽ ഉണ്ടായിരുന്നു. രസകരമായ വസ്തുത, ഓർക്കുട്ട് ഫേസ്ബുക്കിനു വഴിമാറിയപ്പോൾ ഇവരെല്ലാം അവിടെയും സുഹൃത്തുക്കളായി എന്നതാണ്. ആശയപരമായ ചില ചർച്ചകൾ അതിന്റെ പരിധികൾ തന്നെ ലംഘിച്ചു കൊണ്ട് വൻ അങ്കം വെട്ടിനു വഴിവച്ച സംഭവങ്ങൾ ഇന്നും ഓർക്കുമ്പോൾ തലകുത്തി നിന്ന് ചിരിക്കാറുണ്ട്. പലപ്പോഴും കമ്മ്യൂണിറ്റികളിൽ കിടന്ന് കടിപിടി കൂടുന്നവർ, അത് പോസ്റ്റ് ചെയ്യുന്ന അവസരത്തിൽ ഒരു ഫോണ്‍ സംഭാഷണത്തിന്റെ ഇരുതലയ്ക്കൽ ഇരുന്നു അതുടണ്ടാക്കാൻ പോകുന്ന കോലാഹലമോർത്ത് ചിരിച്ചതും ഈ അവസരത്തിൽ ഓർക്കുന്നു.

ഒട്ടേറെ ചിരിപ്പിക്കുകയും ചിന്തിപ്പിക്കുകയും ചെയ്തിട്ടുണ്ട് ഓർക്കുട്ട്. ഫേക്കുകൾ നടമാടിയിരുന്ന കാലത്ത് കുറെയധികം നല്ല വ്യക്തിത്വങ്ങളെ പരിചയപ്പെടുവാനും സൗഹൃദം സൂക്ഷിക്കുവാനും കഴിഞ്ഞു.  പാഥേയം എന്ന ഓണ്‍ലൈൻ മാഗസിന്റെ കാര്യം പരാമർശിക്കാതെ പോകുവാൻ ഈ അവസരത്തിൽ കഴിയുകയില്ല. പാഥേയം എന്ന ഓർക്കുട്ട് കമ്മ്യൂണിറ്റിയിൽ നിന്നുമായിരുന്നു ആ മാഗസിന്റെ ജനനം. വളരെ നന്നായി അത് നടത്തുവാൻ അതിന്റെ എഡിറ്റോറിയൽ ബോർഡിനു കഴിഞ്ഞു എന്നതും, അതുമായി കുറച്ചു കാലം സഹകരിക്കുവാൻ എനിക്ക് ഭാഗ്യമുണ്ടായി എന്നതും ഓർക്കുകയാണിപ്പോൾ. പിന്നീട് ഫേസ്ബുക്ക് വൻ പ്രചാരം നേടിയപ്പോൾ ഓർക്കുട്ടിനെ എല്ലാവരും ഉപേക്ഷിച്ചു. കമ്മ്യൂണിറ്റികൾ നിർജ്ജീവമായപ്പോൾ ഒഴുക്കിനൊപ്പം നീന്തുക എന്നതേ എനിക്കും ചെയ്യുവനായുള്ളൂ. ഫേസ്ബുക്കിൽ എത്തിയപ്പോൾ ആദ്യം ചെയ്തത്, എല്ലാ ഓർക്കുട്ട് കമ്മ്യൂണിറ്റികളും അവിടെ പുനരുജ്ജീവിപ്പിക്കുക എന്നതായിരുന്നു. അത് വിജയം കാണാതെ പോയപ്പോൾ, എല്ലാ ഓർക്കുട്ട് സുഹൃത്തുക്കളെയും ഫ്രണ്ട്സ് ആക്കി മാറ്റി. ഇന്ന് ഫേസ്ബുക്ക് നമ്മുടെ ജീവിതത്തിൽ പ്രബലമായ ഒരു സ്വാധീനം ചെലുത്തുമ്പോൾ, ഓർക്കുട്ട് പതിയെ ഒന്ന് മത്സരിക്കുവാൻ പോലുമാകാതെ പിൻവാങ്ങുകയാണ്. പലരും മറക്കുന്ന ഒരു വസ്തുതയുണ്ട്, അവരുടെ സുഹൃദ് വലയത്തിലെ ഭൂരിഭാഗം ആളുകളും ഓർക്കുട്ടിൽ നിന്നുള്ളവരാണ്. ഞാൻ ഫേസ്ബുക്കിൽ നിന്നും പരിചയപ്പെട്ടവർ വിരലിലെണ്ണാവുന്നവർ മാത്രമാണ്. ഓർക്കുട്ട് എന്നന്നേക്കുമായി വിട പറയുമ്പോൾ, ആ നല്ല നാളുകളെ ഒരു ഗൃഹാതുരത്വം പോലെ ഓർക്കുന്നു. കൂടെ ഒരല്പം സങ്കടവും, ഓർക്കുട്ടിനെ പൂർണ്ണമായും ഒഴിവാക്കിയതിനാലും, ഇനിയിപ്പോൾ ഒരു മടങ്ങിപ്പോക്ക് ഇല്ലാത്തതിനാലും... ഇനി ഓർക്കുട്ട് ഒരു ഓർമ്മക്കൂട്ട് മാത്രം... 

മുല്ലശ്ശേരി മാധവന്‍കുട്ടി നേമം പീ.ഓ (Mullassery Madavankutty Nemom P.O)

സിനിമക്കുള്ളിലെ കഥ പറയുന്ന ചിത്രങ്ങള്‍ ധാരാളം നാം കണ്ടു കഴിഞ്ഞു. അവിചാരിതമായി സിനിമാ നിര്‍മ്മാതാവാവേണ്ടി വന്ന ഒരു സാധാരണക്കാരന്‍റെ കഥ പറയുകയാണ്‌ മുല്ലശ്ശേരി മാധവന്‍ കുട്ടി നേമം പി.ഓ. നവാഗതനായ കുമാര്‍ നന്ദ സംവിധാനം ചെയ്തിരിക്കുന്ന ചിത്രത്തിന്‍റെ തിരക്കഥ സ്വാതി ഭാസ്കരാന് നിര്‍വഹിച്ചിരിക്കുന്നത്. അനൂപ്‌ മേനോന്‍, ബാല, നിഷാന്ത് സാഗര്‍, ഇന്നസെന്റ്, കെ.പി.എസ്.സി ലളിത തുടങ്ങിയവര്‍ ചിത്രത്തില്‍ അഭിനയിക്കുന്നു. കാര്‍ത്തിക് വിഷന് വേണ്ടി സാം വര്‍ഗ്ഗീസ്, കെ.എസ് ചന്ദ്രന്‍ എന്നിവരാണ് ഈ ചിത്രം നിര്‍മിച്ചിരിക്കുന്നത്.

 ഒരു സാധാ സര്‍ക്കാര്‍ ഉദ്യോഗസ്ഥനാണ്, മുല്ലശ്ശേരി തറവാട്ടിലെ മാധവന്‍കുട്ടി. അമ്മ പാര്‍വതിയമ്മയും, ഭാര്യ സീതലക്ഷ്മിയും മകളുമാണ് മാധവന്‍ കുട്ടിയുടെ ലോകം. അഭിനയ കമ്പം അല്പം ഉണ്ടെങ്കിലും, സ്വന്തമായി ഒരു വീട് ഉണ്ടാക്കുക എന്നതാണ് മാധവന്‍ കുട്ടിയുടെ സ്വപ്നം. അവിചാരിതമായി ഒരു സിനിമ നിര്‍മ്മിക്കേണ്ട സാഹചര്യത്തിലേക്ക് മാധവന്‍ കുട്ടി എത്തിപ്പെടുന്നതും, പിന്നെ ആ സിനിമക്കായി കുടുംബവും, ബന്ധങ്ങളും, ഭൂമിയും പണവുമെല്ലാം നഷ്ടപ്പെടുത്തി കഷ്ടപ്പെടുന്നതുമാണ് ചിത്രത്തിന്‍റെ ബാക്കി ഭാഗം.  

ഒറ്റ വരിയില്‍ മനോഹരമായ പ്രമേയമാണ് സിനിമയുടെത്. ഒരു പിടി നല്ല കഥാപാത്രങ്ങളും, അവര്‍ കടന്നു പോകുന്ന മികച്ച കഥാ മുഹൂര്‍ത്തങ്ങളും ഈ പ്രമേയത്തെ മികച്ചതാക്കുമായിരുന്നു. പക്ഷെ അവിടെയാണ് ഈ ചിത്രത്തിന്‍റെ തിരനാടകം പരാജയപ്പെടുന്നത്. Irrational ആയ കഥാപാത്രങ്ങള്‍ ആണ് ഈ ചിത്രത്തിന്‍റെ പ്രധാന ന്യൂനത. അതിനൊപ്പിച്ച്‌ എഴുതി ചേര്‍ത്തിരിക്കുന്ന രംഗങ്ങള്‍ ഒരല്‍പം പോലും വിശ്വസനീയവുമല്ല. കഥയില്‍ ചോദ്യമില്ല എന്നാണെങ്കിലും, കണ്ടിരിക്കുന്ന പ്രേക്ഷകന്‍റെ ക്ഷമയെ ചോദ്യം ചെയ്യുന്ന രംഗങ്ങളാണ് മിക്കതും. പഴയ പല ചിത്രങ്ങളിലും കണ്ട അമ്മ-മകന്‍ രംഗങ്ങള്‍, സ്കൂളില്‍ കല്ലു പെന്‍സിലിനായി വഴക്കിട്ട പക ഇപ്പോഴും കൂടെ കൊണ്ട് നടക്കുന്ന വില്ലന്‍, പാവത്താനായ നായകന്‍ ക്ലൈമാക്സില്‍ വീരശൂരപരാക്രമി ആകുന്നു, പണത്തിനായി വിഷമിച്ചിരിക്കുമ്പോള്‍ അവിചാരിതവും അവിശ്വസനീയവുമായി പണം വന്നു ചേരുക, അങ്ങനെ കുറെ അധികം ക്ലീഷേ രംഗങ്ങളും.

തിരനാടകത്തിലെ പിഴവുകളെ മറികടക്കാനുള്ള ഒരു ശ്രമവും സംവിധായകന്‍റെ ഭാഗത്ത്‌ നിന്നും ഉണ്ടായിട്ടില്ല. തിരക്കഥയെ അപ്പാടെ ചിത്രീകരിക്കുക എന്ന കര്‍ത്തവ്യം മാത്രമാണ് സംവിധായകനും ഇവിടെ ചെയ്തിരിക്കുന്നത്. തന്‍റെ സിനിമ തനിക്കു പ്രേക്ഷകരോട് സംവദിക്കുവാനുള്ള മാധ്യമമാണെന്നും, സംവിധായകനെന്ന നിലയിലുള്ള കയ്യടക്കം കഥയിലെ ന്യൂനതകളെ മറികടക്കുവാന്‍ സഹായിക്കുമെന്നുള്ള വിശ്വാസവും ഇല്ലാതെയാണോ കുമാര്‍ നന്ദ തന്‍റെ ആദ്യ സംരഭത്തിനായി ഇറങ്ങി തിരിച്ചത് എന്ന് സംശയിക്കാം. സംവിധായകന്‍റെ അശ്രദ്ധ എടുത്തു കാണിക്കുന്നത് അബദ്ധജടിലമായ ചായഗ്രഹണത്തിലാണ്. പുതുമുഖമായ ശിവകുമാറാണ് ക്യാമറ കൈകാര്യം ചെയ്തിരിക്കുന്നത്. എന്നാല്‍ ചിത്രത്തില്‍ ഇടതടവില്ലാതെ ഔട്ട്‌ ഓഫ് ഫോക്കസായ രംഗങ്ങളുടെ ബഹളമാണ്. രതീഷ്‌ വേഗ ഈണം പകര്‍ന്ന "കണ്ണാരം പൊത്തി" എന്ന ഗാനം ശ്രവണ സുഖം പകരുന്നു, രവീന്ദ്രന്‍ മാഷ്‌- ഗിരീഷ്‌ പുത്തഞ്ചേരി കൂട്ടുകെട്ടിന്റെ "പാതിമായും ചന്ദ്രലേഖ" എന്ന ഗാനം മികവു പുലര്‍ത്തുന്നു. ചിത്രത്തില്‍ ആശ്വാസമാകുന്നത് ഈ ഗാനങ്ങലാകും.  

അല്പം വ്യത്യസ്തമായ വേഷം കൈകാര്യം ചെയ്യണം എന്ന ആഗ്രഹാമാകാം അനൂപ്‌ മേനോനെ ഈ ചിത്രത്തില്‍ എത്തിച്ചത്. സ്വാഭാവികമായി അഭിനയിക്കാന്‍ അനൂപ്‌ ശ്രമിച്ചെങ്കിലും, തിരക്കഥയിലെ പിഴവുകള്‍ അദ്ദേഹത്തെ അമ്പേ ചതിച്ചു. പല രംഗങ്ങളിലും അനൂപ്‌, മോഹന്‍ലാലിനെ അനുകരിക്കാന്‍ ശ്രമിക്കുന്നത് പോലെ തോന്നി, ഒരു പക്ഷെ നാം കണ്ടു മറന്ന രംഗങ്ങള്‍ ചിത്രത്തില്‍ കുത്തി നിറച്ചതിനാലാവാം. കെ.പി.എസ്.സി ലളിതയുടെ അമ്മ വേഷം, സ്ഥിരം പാറ്റെണിലുള്ളതായി, അതിന്‍റെ വ്യത്യസ്തമാക്കാനുള്ള ശ്രമം അവരുടെ ഭാഗത്ത്‌ നിന്നും ഉണ്ടായില്ല. നായികയായി അഭിനയിച്ച സോണാലിനു ചിത്രത്തില്‍ കാര്യമായി ഒന്നും ചെയ്യുവാനില്ല. മറ്റു വേഷങ്ങള്‍ ചെയ്തവരെല്ലാം ശരാശരിയില്‍ ഒതുങ്ങി.

 സിനിമയെക്കുറിച്ച് അറിയാതെ സിനിമാ നിര്‍മ്മിക്കാന്‍ ഇറങ്ങുന്ന സാധാരണക്കാരനായ ഒരു നിര്‍മ്മാതാവിന്‍റെ ജീവിതമാണ് ഈ ചിത്രത്തിലൂടെ പ്രേക്ഷകര്‍ക്ക്‌ മുന്നില്‍ വരച്ചു കാണിക്കുവാന്‍ ചിത്രത്തിന്‍റെ പിന്നണി പ്രവര്‍ത്തകര്‍ ശ്രമിക്കുന്നത്. സിനിമ എന്ന വ്യവസായത്തിലെ പ്രശ്നങ്ങളും മോശം പ്രവണതകളും ഒക്കെ ഇതില്‍ ചര്‍ച്ചാ വിഷയമാകുന്നു. എന്നാല്‍ ഒന്നിനെയും കുറിച്ച് ആഴത്തില്‍ സംസാരിക്കാതെ എല്ലാം ഒരു വഴിപാട് പോലെ തൊട്ടു കൂട്ടി പോകാനാണ് സംവിധായകനും തിരക്കഥാകൃത്തും ശ്രമിച്ചിരിക്കുന്നത്. സാറ്റ്ലൈറ്റ് റൈറ്റും സിനിമാ സമരവും സംഘടനകളും നിര്‍മ്മാതാവിന്‍റെ സാമ്പത്തിക പ്രതിസന്ധികളും അങ്ങനെ എത്രയോ കാര്യങ്ങള്‍, മനോഹരമായി നമുക്കായി ഒരുക്കാന്‍ കഴിയുമായിരുന്ന ഒരു ചിത്രമായിരുന്നു മുല്ലശ്ശേരി മാധവന്‍ കുട്ടി, എന്നാല്‍ അലക്ഷ്യമായ സംവിധാനം കൊണ്ടും, തിരക്കഥയിലെ ന്യൂനതകള്‍ കൊണ്ടും,  ക്ലീഷേ രംഗങ്ങള്‍ കുത്തി നിറച്ച ഒരു പഴങ്കഥയായിപ്പോയി മുല്ലശ്ശേരി മാധവന്‍ കുട്ടി....

എന്‍റെ റേറ്റിംഗ് : 1.0/5.0

ഈ ദേശാഭിമാനിയുടെ ഓരോരോ കാര്യങ്ങളേ......

ഇന്ത്യയില്‍ ഫുട്ബോള്‍ അത്ര പോപ്പുലറല്ല. എന്നാല്‍ ദൃശ്യ മാധ്യമങ്ങളുടെ കടന്നു വരവോടെ, ഇന്ത്യയിലെ യുവാക്കള്‍ ഫുട്ബോളിലേക്ക് ആകൃഷ്ടരായിട്ടുണ്ട്. Goal.com- പോലെയുള്ള അന്തര്‍ദേശീയ മാധ്യമങ്ങള്‍ ഇന്ത്യന്‍ ഫുട്ബോളിനായി പ്രത്യേക വിഭാഗം തന്നെ തുറന്നിരിക്കുന്നതും അതുകൊണ്ടു തന്നെ. ഇന്ത്യയിലെ മാധ്യമങ്ങള്‍ നിലവാരമുള്ള സ്പോര്‍ട്സ് ലേഖകന്മാരെ നിയമിച്ചിട്ടുമുണ്ട്. എന്നാല്‍ ദേശാഭിമാനി എന്ന പത്രത്തിന്‍റെ ലേഖകന്മാര്‍ ഇപ്പോഴും പഴയ പോലെ തന്നെ. ഈ വാര്‍ത്ത നോക്കൂ.. 
 

ഏപ്രില്‍ ഒന്നാം തീയതി, Goal.com-ല്‍ വന്ന വാര്‍ത്തയാണിത്. ഐവറി കോസ്റ്റിന്റെ പ്രധാന കളിക്കാരനും, ചെല്‍സിയ എന്ന ഇംഗ്ലീഷ് ക്ലബിലെ പ്രധാനിയുമായ ദ്രോഗ്ബ മോഹന്‍ ബാഗാനിലേക്ക് കൂടു മാറുന്നു എന്നതായിരുന്നു തലക്കെട്ട്‌. അതിന്‍റെ വിവരങ്ങള്‍ താഴേക്കു നിരത്തിയ Goal.com ഏറ്റവും ഒടുവില്‍, തങ്ങളുടെ ഏപ്രില്‍ ഫൂള്‍ സന്ദേശവും രേഖപ്പെടുത്തി. ഫുട്ബോളിനെക്കുറിച്ച് അല്പമെങ്കിലും വിവരമുള്ളവര്‍ ഈ തലക്കെട്ട്‌ കാണുമ്പോഴേ ഏപ്രില്‍ ഫൂള്‍ ആണെന്ന് തിരിച്ചറിയും. ബാക്കിയുള്ളവര്‍ ഇത് വായിച്ചു ഒടുവില്‍ എഴുതിയിരിക്കുന്ന ഏപ്രില്‍ ഫൂള്‍ സന്ദേശം കാണുമ്പോഴെങ്കിലും കാര്യങ്ങള്‍ മനസ്സിലാക്കും. എന്നാല്‍ നമ്മുടെ ദേശാഭിമാനി സ്പോര്‍ട്സ് ലേഖകന് ഇതെന്താ സംഭവം എന്ന് പിടി കിട്ടിയതെ ഇല്ല എന്ന് തോന്നുന്നു. ഇതാ ദേശാഭിമാനിയില്‍ വന്ന വാര്‍ത്ത‍.

 

ദേശാഭിമാനി സ്പോര്‍ട്സ് ലേഖകന്‍ മാത്രം കഥയറിയാതെ ആട്ടം കാണുന്ന പൊട്ടനെ പോലെ സംഭവം അത് പോലെ അങ്ങ് പകര്‍ത്തി പത്രത്തില്‍ വാര്‍ത്തയാക്കി. അവസാനം എഴുതിയ ഏപ്രില്‍ ഫൂള്‍ സന്ദേശം കണ്ടില്ലയോ അതോ കണ്ടിട്ട് മനസ്സിലായില്ലയോ എന്ന് അങ്ങേരോടു തന്നെ ചോദിക്കേണ്ടി വരും. ദേശാഭിമാനി ഇങ്ങനെ മണ്ടത്തരങ്ങള്‍ എഴുന്നള്ളിക്കുന്നത് ഇതാദ്യമായല്ല. അമേരിക്കയില്‍ നടന്ന ഏതോ ഹോട്ട് ഡോഗ് തീറ്റ മതരാതെ കുറിച്ച്, 10  മിനിറ്റില്‍ 68 പട്ടിയെ തിന്നു ലോക റെക്കോഡ് എന്ന് ഫ്രണ്ട് പേജില്‍ വെണ്ടയ്ക്ക നിരത്തിയ പ്രത്രമാണത്. ഇന്‍റര്‍നെറ്റില്‍ പരതി വാര്‍ത്തകള്‍ ഉണ്ടാക്കുമ്പോള്‍ കുറഞ്ഞ പക്ഷം അത് കൊണ്ടു ഉദ്ദേശിക്കുന്നതെന്തു എന്ന് മനസിലാക്കാന്‍ തക്ക വിവരവും ബോധവുമുള്ള ആളുകളെ ലേഖകന്മാരായി നിയമിച്ചാല്‍ അവര്‍ക്ക് കൊള്ളാം. അല്ലെങ്കില്‍ പൊതു ജന മധ്യത്തില്‍ ഇത് പോലെ പരിഹാസ്യരാകേണ്ടി വരും..... ഈ ദേശാഭിമാനിയുടെ ഓരോരോ കാര്യങ്ങളേ......

മലയാള സിനിമയും മാറുന്ന മാര്‍ക്കറ്റിംഗ് തന്ത്രങ്ങളും...

ഒരു ദിവസം പൊടുന്നെ സോഷ്യല്‍ നെറ്റുവര്‍ക്കിംഗ് സൈറ്റുകളില്‍ Girl In The Bus എന്ന പേരില്‍ ഒരു വീഡിയോ പ്രത്യക്ഷപ്പെടുന്നു. ബസ്സില്‍ യാത്ര ചെയ്യുന്ന യുവാക്കള്‍ തങ്ങള്‍ക്കു ചുറ്റുമുള്ള ദൃശ്യങ്ങള്‍ മൊബൈലില്‍ പകര്‍ത്തുന്നു. അതിനിടെ മുന്‍ സീറ്റിലിരുന്ന ഒരു സ്ത്രീയെ ഒരാള്‍ ഉപദ്രവിക്കാന്‍ ശ്രമിക്കുന്നതും, ആ സ്ത്രീ അയാളെ കയ്യോടെ പിടികൂടി കൈകാര്യം ചെയ്യുന്നതുമായ ദൃശ്യങ്ങളടങ്ങുന്നതായിരുന്നു ആ വീഡിയോ. മൊബൈലില്‍ പകര്‍ത്തിയ ഈ രംഗങ്ങള്‍ ആകാംഷയോടെ തുറന്നു നോക്കുന്നവരുടെ മുന്നിലേക്ക്‌ ആന്‍റി-ക്ലൈമാക്സ് പോലെ എത്തുന്നത്, She is 24 Female Kochi എന്നാണ്. കഥയറിയാതെ അമ്പരക്കുന്ന കാഴ്ചക്കാര്‍ക്ക് അപ്പോഴാണ്‌ മനസ്സിലാവുന്നത്, അത് 22 Female Kottayam എന്ന ചിത്രത്തിന്‍റെ പ്രോമോ ആണ് എന്ന്.  സോഷ്യല്‍ നെറ്റുവര്‍ക്കിംഗ് സൈറ്റുകളിലൂടെ തീപ്പൊരി വേഗത്തില്‍ പ്രചരിക്കുന്ന ഈ വീഡിയോകള്‍ ലോകത്തില്‍ പല സ്ഥലങ്ങളില്‍ പരീക്ഷിച്ച വൈറല്‍ വീഡിയോ എന്ന ആശയത്തിന്‍റെ ഭാഗമാണ്. Girl In The Bus എന്ന വീഡിയോ മാത്രമല്ല, Two Girls & A Woman , Aunty In Blue Saree എന്നീ രണ്ടു വീഡിയോകള്‍ കൂടി ചിത്രത്തിന്‍റെ അണിയറ പ്രവര്‍ത്തകര്‍ പുറത്തിറക്കിയിരുന്നു. 

മെയിലിലൂടെയും ഫെസ്ബുക്കിലൂടെയും അതിവേഗം പ്രചരിക്കുന്ന ഈ വീഡിയോകള്‍, പ്രേക്ഷകരെ തെല്ലൊന്നുമല്ല ആകര്‍ഷിക്കുന്നത്. ഈ ആസ്വാദകരെ ചിത്രത്തിന്‍റെ പ്രേക്ഷകരാക്കി മാറ്റാം എന്നുള്ള കണക്കു കൂട്ടലിലാകും ചിത്രത്തിന്‍റെ അണിയറയിലുള്ള ആഷിക് അബുവും കൂട്ടരും. ചിത്രത്തിന്‍റെ ട്രെയിലരുകള്‍ക്ക് മുന്നേ പ്രേക്ഷകരുടെ മുന്നിലേക്ക്‌ എത്തിയത് ഈ വീഡിയോകളാണ്. വളരെ അമച്വരിഷ് ആയിയാണ് ഈ വീഡിയോകള്‍ ഷൂട്ട്‌ ചെയ്തിരിക്കുന്നത്, അതും ഒരു സ്മാര്‍ട്ട് ഫോണ്‍ ഉപയോഗിച്ച്. വളരെ കുറച്ചു കഥാപാത്രങ്ങള്‍, ലളിതമായ ആശയം, അത് ഒരൊറ്റ ഷോട്ടില്‍ പൂര്‍ത്തിയാക്കുക കൂടി ചെയ്തപ്പോള്‍ അത് പ്രേക്ഷകരെ ആകര്‍ഷിക്കുക തന്നെ ചെയ്തു എന്ന് വേണം പറയാന്‍. ഈ വീഡിയോകള്‍ക്ക് സോഷ്യല്‍ മീഡിയയില്‍ ലഭിക്കുന്ന സ്വീകാര്യത അതാണ്‌ സൂചിപ്പിക്കുന്നത്.  ചിത്രത്തിന്‍റെ നവീനമായ പ്രചരണം ഈ വീഡിയോയില്‍ അവസാനിക്കുന്നില്ല. ഒരാഴ്ച മുന്നേ തന്നെ ചിത്രത്തിന്‍റെ പ്രചാരണാര്‍ത്ഥം ഏതാനും പോസ്റ്ററുകള്‍ വെളിയില്‍ വന്നിരുന്നു. അവയും സോഷ്യല്‍ മീഡിയാകളിലാണ് ആദ്യം പ്രത്യക്ഷപ്പെട്ടത്. സി.എന്‍.എന്‍ - ഐ.ബി.എന്‍ റിയല്‍ ഹീറോ പുരസ്‌കാരം നേടിയ ഷീബ അമീറും, ധീരതയ്ക്കുള്ള പുരസ്‌കാരം നേടിയ ജിസ്മിയും, ആദിവാസികള്‍ക്കുവേണ്ടി പ്രവര്‍ത്തിക്കുന്ന ദയാബായിയും, കര്‍ഷകശ്രീ പുരസ്കാരം നേടിയ കുഞ്ഞുമോള്‍ ജോസുമെല്ലാം ഈ ചിത്രത്തിന്‍റെ പോസ്റ്ററുകളില്‍ നിറയുന്നു. 22 Female Kottayam എന്ന ചിത്രത്തിന്‍റെ പോസ്റ്ററുകള്‍ ഒരുക്കിയിരിക്കുന്നതിനു സമാനമായാണ് ഈ പോസ്റ്ററുകളെല്ലാം. പോസ്റ്ററുകള്‍ കാണുവാന്‍ ഇവിടെ ക്ലിക്ക് ചെയ്യുക. ചിത്രത്തിന്‍റെ സംവിധായകന്‍ ആഷിക് അബു, പപ്പായ മീഡിയ, മല്‍ഫങ്ക്ഷന്‍ എന്നിവര്‍ക്കാണ് ഈ പ്രമോഷന്‍ ക്യാംപെയിനിന്റെ ക്രെഡിറ്റ് മുഴുവനും.

സിനിമയുടെ പ്രമോഷനായി പല കാലഘട്ടങ്ങളിലും പല പല രീതികളാണ് അവലംബിച്ചിരുന്നത്. പോസ്റ്ററുകള്‍ എക്കാലവും സജീവമായിരുന്നു. ബ്ലാക്ക് & വൈറ്റ് കാലഘട്ടം മുതല്‍ അവ പ്രമോഷനുകളുടെ ചുക്കാന്‍ പിടിച്ചിരുന്നു. പിന്നീട് വാഹനങ്ങളില്‍ ഉച്ചഭാഷിണി ഉപയോഗിച്ച്, നോട്ടീസ് വിതരണം ചെയ്തിരുന്ന കാലഘട്ടം ഉണ്ടായിരുന്നു. ടെലിവിഷന്റെ പ്രസക്തി വര്‍ദ്ധിച്ചതോടെ ട്രെയിലറുകളും പരസ്യങ്ങളും ടെലിവിഷനിലൂടെ പ്രേക്ഷകരിലേക്ക് എത്തി. സോഷ്യല്‍ മീഡിയ കടന്നു വന്നതോടെ ഈ പോസ്റ്ററുകളും സിനിമാ സംബന്ധമായ ചര്‍ച്ചകളും ചെറുപ്പക്കാരിലേക്ക്‌ കുറച്ചൂടെ വേഗത്തിലും എളുപ്പത്തിലും എത്തിക്കുവാന്‍ സിനിമാ പിന്നണിക്കാര്‍ക്ക് കഴിഞ്ഞു. അപ്പോഴും ടെലിവിഷനിലെ ചര്‍ച്ചകളും ടോക്ക് ഷോകളും സാകൂതം തുടര്‍ന്നിരുന്നു. ഗൂട്ടി ഷോയും മറ്റും അതിന്‍റെ മികച്ച ഒരു ഉദാഹരണമാണ്. എന്നാല്‍ 22 Female Kottayam എന്ന ചിത്രവും അതിന്‍റെ പിന്നണി പ്രവര്‍ത്തകരും അവലംബിക്കുന്ന മാര്‍ഗ്ഗങ്ങള്‍ മലയാളികള്‍ക്ക് പുതുമ നിറഞ്ഞതാണ്‌. കഴിഞ്ഞ വര്‍ഷമിറങ്ങിയ ട്രാഫിക്, സോള്‍ട്ട് & പേപ്പര്‍, ബ്യൂട്ടിഫുള്‍ തുടങ്ങിയ ചിത്രങ്ങള്‍ക്ക് സോഷ്യല്‍ മീഡിയ വഴി ലഭിച്ച പിന്തുണയും പ്രോത്സാഹനവും കണ്ടില്ല എന്ന് നടിക്കാന്‍ ഈ ചിത്രത്തിന്‍റെ പിറകിലുള്ളവര്‍ക്ക് കഴിഞ്ഞിട്ടില്ല എന്ന് മാത്രമല്ല, നല്ലേ ചിത്രങ്ങള്‍ വേണ്ട രീതിയില്‍ അല്ലെങ്കില്‍ ശരിയായ രീതിയില്‍ മാര്‍ക്കറ്റ് ചെയ്‌താല്‍ അത് പ്രേക്ഷകര്‍ സ്വീകരിക്കും എന്ന തിരിച്ചറിവാകാം അവരെ ഈ ഉദ്യമത്തിന് പ്രേരിപ്പിച്ചത്. എന്തായാലും ആകാര്‍ഷകമായ പോസ്റ്ററുകളും ട്രെയിലരുകളും പ്രേക്ഷകരെ തീയെട്ടരുകളില്‍ എത്തിക്കുന്നതില്‍ പരാജയപ്പെടുമ്പോള്‍, ഇത്തരം നവീനമായ ആശയങ്ങള്‍ നല്ല ചിത്രങ്ങളെ പ്രേക്ഷക മനസുകളില്‍ എത്തിക്കും എന്ന് കരുതാം. ഇത്തരം ഒരു പ്രമോഷനുമായി മുന്നോട്ടു വന്ന  ആഷിക് അബുവിനെ അഭിനന്ദിക്കുന്നതിനോടൊപ്പം 22 Female Kottayam എന്ന ചിത്രത്തിനും അതിന്‍റെ മറ്റു അണിയറ പ്രവര്‍ത്തകര്‍ക്കും ഈ അവസരത്തില്‍ എല്ലാ വിധ ആശംസകളും നേരുന്നു....

റിയാലിറ്റി ഷോയിലെ എസ.എം.എസ് തട്ടിപ്പുകള്‍.

മലയാളത്തില്‍ റിയാലിറ്റി ഷോകളുടെ തിരമാല തന്നെ സൃഷ്ടിച്ച ചാനലാണ്‌ ഏഷ്യാനെറ്റ്. ആദ്യമായി ചില റിയാലിറ്റി ഷോകള്‍ കൊണ്ടു വന്നപ്പോള്‍ അതില്‍ ഒരു പുതുമ കണ്ട പ്രേക്ഷകര്‍ അവയെ ഇരു കയ്യും നീട്ടി സ്വീകരിച്ചിരുന്നു. എന്നാല്‍ അതൊരു തുടര്‍ക്കഥയായി, അവയില്‍ പലതും, മെഗാ സീരിയലുകളെക്കാള്‍ നീളുമ്പോള്‍ അതിന്റെ പിറകില്‍ കലയെ പ്രോത്സാഹിപ്പിക്കുക എന്ന ഉദ്ദ്യെശ്യത്തിനുപരി നാട്ടുകാരെ പറ്റിച്ചു കാശുണ്ടാക്കുക എന്നതാണ് എന്നത് നമുക്കെല്ലാം അറിയാവുന്ന വസ്തുതയാണ്. എസ്.എം.എസിന്റെ പേരില്‍ നടക്കുന്ന ഈ തട്ടിപ്പിന്‍റെ ആറാം സീസണാണ് ഇപ്പോള്‍ ഐഡിയ സ്റ്റാര്‍ സിംഗര്‍ എന്ന പരിപാടിയില്‍ നടക്കുന്നത്. ഒരു പിടി പ്രതിഭയുള്ള കുട്ടികളുടെ സംഗീത വിരുന്നു ആസ്വദിക്കുകയും അവരെ പ്രോത്സാഹിപ്പിക്കണം എന്ന് ആഗ്രഹിക്കുകയും ചെയ്യുന്ന മലയാളികളുടെ നല്ല മനസ്സിനെ ദുരുപയോഗം ചെയ്യുന്ന പരിപാടിയാണ് എസ്.എം.എസ് വോട്ടിംഗ് എന്നത്. എസ്.എം.എസ് എന്നത് റിയാലിറ്റി ഷോയുടെ മാനദന്ധമാകുമ്പോള്‍ പലപ്പോഴും കാശ് മുടക്കി എസ്.എം.എസ് അയക്കുന്ന പ്രേക്ഷകര്‍ മണ്ടന്മാര്‍ ആകുകയാണ് പതിവ്. ആറാം സീസണിലും സംഗതികള്‍ വിഭിന്നമല്ല. 

ഇനി നമുക്ക് പതിയെ കഥയിലേക്ക് വരാം. സ്റ്റാര്‍ സിംഗറിന്റെ എല്ലാ സീസണിലും, ഏതെങ്കിലും വിധത്തില്‍ വൈകല്യമുള്ള ഗായികാഗായകന്മാരെ ഉള്‍പ്പെടുത്തി റേറ്റിംഗ് കൂട്ടുന്ന പരിപാടിയുള്ളതാണ്. സഹതാപ തരംഗമുണര്‍ത്തി എസ്.എം.എസ് നേടാനും റേറ്റിംഗ് ഉയര്‍ത്താനും ഇത് സഹായിക്കുക പതിവാണ്. ഓട്ടിസം എന്ന രോഗബാധിതനായ സുകേഷ് കുട്ടന്‍ എന്ന ഗായകനാണ് ഇത്തവണ ഏഷ്യാനെറ്റിന്റെ നാടകത്തിലെ നായകനാകുന്നത്. രോഗ ബാധിതനെങ്കിലും, വളരെ കഴിവുള്ള ഒരു ഗായകനാണ് സുകേഷ് കുട്ടന്‍. വളരെ സങ്കീര്‍ണമായ ഗാനങ്ങള്‍ പോലും അസാധ്യമായി  പാടാന്‍ കഴിയുന്ന ഒരു യുവഗായകനാണ് അദ്ദേഹം. സ്റ്റാര്‍ സിംഗറിന്റെ വേദിയില്‍ അദ്ദേഹമത് പലതവണ തെളിയിച്ചിട്ടുള്ളതാണ്. ഈ പോസ്റ്റിനു ആസ്പദമായ സംഭവങ്ങള്‍ നടക്കുന്നത് ഈയിടെയാണ്. തമിഴ് തണ്ടര്‍ റൌണ്ടില്‍ പാടുവാന്‍ സുകേഷ് കുട്ടന്‍ എത്തിയില്ല. അദ്ദേഹത്തിന്റെ അസുഖം മൂലമോ അദ്ദേഹം പാടാന്‍ റെഡി ആയില്ല. ഒരു റൌണ്ടില്‍ പാടുവാന്‍ ഒരു ഗായകനോ ഗായികയോ മത്സരിച്ചാല്‍, മത്സരത്തിന്റെ നിയാമാവലി പ്രകാരം അയാള്‍ മത്സരത്തില്‍ നിന്നും പുറത്താകും എന്ന് അവതാരികയായ രഞ്ജിനി ഹരിദാസ് അറിയിക്കുന്നു. പ്രേക്ഷകരെ ആകാംഷയുടെ മുള്‍മുനയില്‍ നിര്‍ത്തിയ നിമിഷങ്ങള്‍. കൂലംകഷമായ ചര്‍ച്ചകള്‍ക്കൊടുവില്‍, സുകേഷ് കുട്ടന്‍ മുന്നോട്ടുള്ള പ്രയാണത്തില്‍ കൂടെ വേണം എന്ന് ജഡ്ജസ് തീരുമാനിക്കുന്നു. അതിനായി പ്രേക്ഷകര്‍ അയക്കുന്ന എസ്.എം.എസ് തന്നെ ശരണം എന്ന് ജഡ്ജ് ചിത്ര അഭിപ്രായപ്പെടുന്നു. എല്ലാ ജഡ്ജസും ചേര്‍ന്നെടുത്ത തീരുമാനമെന്ന് ഏഷ്യാനെറ്റും പ്രഖ്യാപിക്കുന്നു. അതോടെ സുകേഷ് കുട്ടന്‍ ഓട്ടോമാറ്റിക്കായി ഡേയ്ഞ്ചാര്‍ സോണില്‍ എത്തി എന്ന് അവതാരിക പ്രഖ്യാപിക്കുന്നു. കൂടെ ആ ഗായകന് വോട്ടു ചെയ്യണം എന്ന് അവതാരികയുടെ വക പ്രത്യേകം അഭ്യര്‍ത്ഥനയും. ഇതാണ് സംഗതികളുടെ രത്നചുരുക്കം.
 

ഈ വീഡിയോ കാണൂ.. ഇതാണ് അവിടെ സംഭവിച്ച നാടകം.

ഇനി നമുക്കിതിനെ അല്പം വിലയിരുത്താം...

സുകേഷ് കുട്ടന്‍ വരില്ല എന്നും അന്നേ ദിവസം പാടില്ല എന്നും ഏഷ്യാനെറ്റിനും ജഡ്ജസ്സിനും അവതാരികക്കും അറിയാമായിരുന്നു.  

1. പക്ഷെ ഒരു നാടകമെന്നവണ്ണം സുകേഷ് കുട്ടന്റെ ഗാനം അനൌണ്സ് ചെയ്തു.
2 .  ഡാന്‍സര്‍മാര്‍ സ്റ്റേജില്‍ നിരന്നു.
3 . പൊടുന്നനെ അവിടെ മുഴുവന്‍ ഒരു കണ്ഫ്യൂഷന്‍. ആള്‍ക്കാര്‍ അങ്ങോട്ടും ഇങ്ങോട്ടും ഓടുന്നു. ടെന്‍ഷന്‍ നിറഞ്ഞ മുഖങ്ങള്‍.
4 . ആരോ പെട്ടെന്ന് ജഡ്ജായ ചിത്രയോടു എന്തോ പറയുന്നു. അത് കേട്ട് അവര്‍ ഞെട്ടുന്നു.
5 . വികാര നിര്‍ഭരയായി രഞ്ജിനി സുകേഷ് കുട്ടന്‍ വരില്ല എന്ന് പ്രഖ്യാപിക്കുന്നു. തീരുമാനം ജഡ്ജസിനു വിടുന്നു.
6 . പിന്നെ പ്രേക്ഷകരുടെ ഹൃദയമിടിപ്പ്‌ കൂട്ടാന്‍ കുറെ ചര്‍ച്ചകള്‍, അതിനു ചേര്‍ന്ന പശ്ചാത്തല സംഗീതം.
7 . ഒടുവില്‍ കാത്തിരുന്ന ആ നിമിഷം. വിഷയം 'ഗഹനമായി' ചര്‍ച്ച ചെയ്തു എന്നും, ആ തീരുമാനം ചിത്ര പറയുമെന്നും എം.ജി.
8 . സുകേഷ് കുട്ടനെ ഒരു സ്പെഷ്യല്‍ കേസായി പരിഗണിക്കണമെന്നും, എസ്.എം.എസ് വഴി പ്രേക്ഷകര്‍ തീരുമാനിക്കട്ടെ എന്നും ചിത്ര.
9 . സുകേഷ് കുട്ടന് എസ്.എം.എസ് അയക്കാനുള്ള ഫോര്‍മാറ്റും നമ്പരുകളും സ്ക്രീനില്‍ ഫ്ലാഷ് ചെയ്യുന്നു.
10 . എസ്.എം.എസ് അയക്കാന്‍ ഒരു ഉത്പ്രേരകം എന്ന പോലെ, നല്ല ഗായകന്‍ നമുക്ക് വേണമെന്ന് ജഡ്ജസിന്റെ കണ്ണ് നിറഞ്ഞുള്ള ഒരു അഭിപ്രായവും.
11 . ജഡ്ജസെല്ലാം കൂടി "തിരികെ ഞാന്‍ വരുംമെന്ന.." ഗാനം
12 . അതോടെ സുകേഷ് കുട്ടന്‍ ഇനി മുന്നോട്ടുള്ള പ്രയാണത്തില്‍ വേണമെങ്കില്‍ പ്രേക്ഷകരുടെ 'വിലയേറിയ' എസ്.എം.എസ് കൂടിയെ തീരൂ എന്ന് നിറകണ്ണുകളോടെ അവതാരിക...
13 . അതിനിടക്ക് സുകേഷ് കുട്ടനും അമ്മയും ചേര്‍ന്നുള്ള കുറെ കോമ്പിനേഷന്‍ സീനുകള്‍, കൂടെ ദുഖവും കണ്ണീരും സമാസമം കൂട്ടി കലര്‍ത്തി, ഒരു സെന്റി പശ്ചാത്തല സംഗീതവും. 

14. ശുഭം

വളരെ ഭംഗിയായി തിരകഥ എഴുതി അവതരിപ്പിച്ച ഒരു നാടകം. സുകേഷ് കുട്ടന്‍ വരില്ല എന്നറിയാമെങ്കില്‍ പിന്നെ എന്തിനീ നാടകം. ഈ പ്രതിക്രിയാ വാതകങ്ങള്‍ ഒന്നുമില്ലാതെ വളരെ ലളിതമായി കാര്യങ്ങള്‍ പറഞ്ഞാല്‍ എന്താ എന്ന് ഞാന്‍ ചോദിക്കുന്നില്ല. കാരണം ഇത് ഏഷ്യാനെറ്റാണ്. സുകേഷ് കുട്ടന്‍ വരില്ല എന്നതിനാല്‍ ഒരു വലിയ കച്ചവട സാധ്യതയാണ് ഏഷ്യാനെറ്റ് അവിടെ കണ്ടത്. സ്ഥിരമായി ഈ പരിപാടി കണ്ടു കോള്‍മയിര്‍ കൊള്ളുന്ന മലയാളി പ്രേക്ഷകരെ പിഴിയാനുള്ള സുവര്‍ണ്ണാവസരം. അതങ്ങനെ കളയാന്‍ ഏഷ്യാനെറ്റിനു എങ്ങനെ സാധിക്കും. അതിന്‍റെ അനന്തരഫലയമായി ഉടലെടുത്ത തിരനാടകമാണ് നാം കണ്ടത്. ഇത് ആദ്യമായല്ല ഇത്തരം ഒരു സാഹചര്യം സ്റ്റാര്‍ സിംഗറില്‍ ഉണ്ടാവുന്നത്. ഇതിനു മുന്നേ റെക്കോഡ് എസ്.എം.എസ് കിട്ടി ചില ഗായകര്‍ മുന്നോട്ടു പോയിട്ടുണ്ട്, അതാവും ഇത്തരം ഒരു അവസരം മുതലാക്കാന്‍ ഏഷ്യാനെറ്റിനെ പ്രേരിപ്പിച്ചത്. ഈ എസ്.എം.എസ് തെണ്ടലിനു ക്രെടിബിളിടി നല്‍കാനാവും, മറ്റൊരു ജഡ്ജും പറയാതെ മലയാളത്തിന്റെ വാനമ്പാടിയെ കൊണ്ടു തന്നെ ഇത് പ്രഖ്യാപിപ്പിച്ചത്. ഏഷ്യാനെറ്റിന്റെ പണം വാങ്ങുന്നതിനാല്‍, അവര്‍ അത് ചെയ്യാന്‍ ബാധ്യസ്ഥയുമാണ്. പക്ഷെ പ്രേക്ഷകരെ മുതലെടുക്കുന്ന ഇത്തരം വിപണന തന്ത്രങ്ങള്‍ക്ക് സാമൂഹിക പ്രതിബദ്ധതയുള്ള കലാകാരന്മാര്‍ സഹകരിക്കാന്‍ പാടുണ്ടോ എന്നത് ചോദ്യമായി അവശേഷിക്കുന്നു. വികാര നിര്‍ഭരമായ രംഗങ്ങള്‍ക്കൊടുവില്‍ സുകേഷ് കുട്ടന്‍റെ അമ്മയെ കൂടി ഈ നാടകത്തില്‍ ഭാഗഭാക്കാക്കി, അവരെ കൊണ്ടും പ്രേക്ഷകര്‍ക്ക്‌ ഒരു അഭ്യര്‍ത്ഥന. അപ്പോള്‍ പിന്നെ അടുത്ത എലിമിനെഷനില്‍ സംഭവിക്കാന്‍ പോകുന്നതെന്തു എന്ന് നമുക്ക് ഊഹിക്കാവുന്നതേയുള്ളൂ..

മത്സരങ്ങള്‍ക്കായി അയക്കുന്ന എസ്.എം.എസുകള്‍ക്ക്‌ പൊതുവെ ചാര്‍ജ്ജ് കൂടുതല്‍ ആണ്. സാധാരണ നിരക്കിന്‍റെ അഞ്ചും ആരും ഇരട്ടിയാണ് ഒരു എസ.എം.എസിന്. ലാഭം ഐഡിയക്കും ഏഷ്യാനെറ്റിനും, നഷ്ടം മണ്ടന്മാര്‍ ആകുന്ന പ്രേക്ഷകര്‍ക്ക്‌... വൈകല്യങ്ങള്‍ ഉള്ളവരെ മത്സരത്തില്‍ ഉള്‍പ്പെടുത്തി, സഹതാപ തരംഗങ്ങളും ഇത്തരം നാടകങ്ങളും നടത്തി, ഈ പരിപാടി കാണുന്ന ആയിരകണക്കിനോ പതിനായിരകണക്കിനോ പ്രേക്ഷകരെ എസ്.എം.എസ്സിന്റെ പേരില്‍ പറ്റിക്കുകയാണ് ഏഷ്യാനെറ്റും ഐഡിയയും ചെയ്യുന്നത്. സുകേഷ് കുട്ടനിലെ പ്രതിഭയോട് തികച്ചും ബഹുമാനപൂര്‍വമാണ് ഞാനിതെഴുതുന്നത്. അദ്ദേഹത്തിന് എത്രയും പെട്ടെന്ന് രോഗശാന്തി ലഭിക്കട്ടെ എന്നും പ്രശസ്തനായ ഒരു ഗായകാനി അയാള്‍ മാറട്ടെ എന്നും ഞാനീ അവസരത്തില്‍ ആത്മാര്‍ഥമായി പ്രാര്‍ഥിക്കുന്നു. അതെ സമയം, ആള്‍ക്കാരെ കൊള്ളയടിക്കുന്ന ഇത്തരം ഈ എസ്.എം.എസ് തട്ടിപ്പുകളെ നമ്മുടെ പ്രേക്ഷകര്‍ തിരിച്ചറിയുകയും, അതില്‍ അവര്‍ വഞ്ചിതരാകാതെയിരിക്കുകയും ചെയ്യട്ടെ എന്നും ആഗ്രഹിക്കുന്നു....

അനന്യയെ വെറുതെ വിട്ടു കൂടെ...?

മലയാള ചലച്ചിത്ര രംഗത്ത്‌ താരങ്ങള്‍ വിവാഹിതരാകുന്നത് പുതുമയുള്ള കാര്യമല്ല. അതുപോലെ ഗോസിപ്പുകള്‍ക്കും ഒരു പഞ്ഞവുമില്ല. താരങ്ങള്‍ വിവാഹിതരാകുമ്പോള്‍ മാധ്യമങ്ങള്‍ അതു ചര്‍ച്ച ചെയ്യാറുണ്ട്. സിനിമാ പ്രേക്ഷകര്‍ക്കിടയിലും അതു ചര്‍ച്ച ചെയ്യപ്പെട്ടിരുന്നെങ്കിലും അതു പരസ്യമായിരുന്നില്ല. സോഷ്യല്‍ മീഡിയയുടെ കടന്നു വരവോടെ, ഇപ്പോഴത്‌ ഒരു പടി കൂടി കടന്നു. എന്തും ഇതും ചര്‍ച്ച ചെയ്യപ്പെടുവാന്‍ നമുക്കിപ്പോള്‍ നവയുഗ മാധ്യമങ്ങളായ ഫേസ്ബുക്ക്, ഓര്‍ക്കുട്ട്, ബ്ലോഗുകള്‍, അങ്ങനെ പലതുമുണ്ട്. പക്ഷെ വളരെ വ്യത്യസ്തമായ ചില സംഭവ വികാസങ്ങളാണ് കുറച്ചു ദിവസമായി നാം ഫേസ്ബുക്ക് പോലെയുള്ള സോഷ്യല്‍ മീഡിയകളില്‍ കണ്ടു വരുന്നത്. അത് നടി അനന്യയുടെ കല്യാണനിശ്ചയവുമായി ബന്ധപ്പെട്ടാണ്. അടുത്ത കാലത്ത് മലയാള സിനിമയിലേക്ക് കടന്നു വന്ന നടിയാണ് അനന്യ. മലയാളത്തില്‍ മാത്രമല്ല, തമിഴിലും നല്ല വേഷങ്ങള്‍ കൈകാര്യം ചെയ്തു ശ്രദ്ധ നേടിയ അനന്യയുടെ കല്യാണത്തെ സംബന്ധിച്ചുള്ള വാര്‍ത്തകള്‍ പെട്ടെന്നാണ് ലോകമറിഞ്ഞത്. തൃശൂര്‍കാരനായ ആഞ്ജനേയന്‍ എന്ന വ്യക്തിയുമായി അനന്യയുടെ വിവാഹനിശ്ചയം നടക്കുകയും, മാധ്യമങ്ങളിലൂടെ വിവരങ്ങള്‍ പുറത്തു വരികയും ചെയ്തു. എന്നാല്‍ സൈബര്‍ ലോകത്ത് നിന്നും ഈ വിവാഹ നിശച്ചയ്തെ കുറിച്ച് പല വിധ അപവാദ പ്രചാരണങ്ങളും പുറത്തു വരുന്നു. അനന്യുടെയും അന്ജനെയന്റെയും ഫോട്ടോകള്‍ വച്ച് "കുരങ്ങന്‍റെ കയ്യില്‍ പൂമാല" എന്ന് പറഞ്ഞുള്ള വിലകുറഞ്ഞ തമാശകളെ അവഗണിക്കാമെങ്കിലും, അനന്യയെയും കുടുംബത്തെയും കുറിച്ച് വരുന്ന അപവാദങ്ങള്‍ അതിര് കടന്നു പോകുന്നു. ആഞ്ജനേയന്‍ വിവാഹിതനാണെന്നും വിവാഹ ബന്ധം വേര്‍പെടുതിയാണ് ഈ കല്യാണം നടക്കുന്നതെന്നും ഒരു കൂട്ടര്‍ എഴുതി വിട്ടു. അനന്യ വീട്ടു തടങ്കലിലാണെന്നും അനന്യയുടെ അച്ഛന് ഈ കല്യാണത്തില്‍ താല്പര്യമില്ലെന്നും മറ്റൊരു കൂട്ടര്‍. ചുരുക്കി പറഞ്ഞാല്‍ ദിവസങ്ങള്‍ക്കുള്ളില്‍ ഫേസ്ബുക്കില്‍ പല രീതിയിലുള്ള പ്രചാരണങ്ങള്‍ വന്നു തുടങ്ങി. നാലാം കിട മഞ്ഞ പത്രങ്ങള്‍ പടച്ചു വിടുന്നതിലും താണ നിലവാരത്തില്‍ കഥകള്‍ മെനയുവാനും, കമന്‍റുകള്‍ പാസാക്കുവാന്‍ യാതൊരു മടിയും കാണിക്കാതെ ചിലര്‍ വിലസിയപ്പോള്‍, മറൊരു കൂട്ടര്‍ യാതൊരു ഉളുപ്പിമില്ലാതെ അത് സ്വന്തം പ്രൊഫൈലില്‍ ഷെയര്‍ ചെയ്യുകയും ചെയ്തു. അനന്യ ഒരു സിനിമാതാരമാണ്. അവരുടെ ചിത്രങ്ങളെയും, അഭിനയത്തെയും കുറിച്ച് ചര്‍ച്ച ചെയ്യാനും കമന്‍റുകള്‍ പറയുവാനും പ്രേക്ഷകരെന്ന നിലയില്‍ നമുക്ക് അവകാശമുണ്ട്‌. എന്നാല്‍ അവരുടെ വ്യക്തി ജീവിതത്തില്‍ കൈകടത്തുവാന്‍ ഒരുവനും അവകാശമില്ല. തലപുകഞ്ഞു ആലോചിച്ചു കഥകള്‍ മെനയുന്നവര്‍ അവര്‍ ചെയ്യുന്ന ക്രൂരതയെകുറിച്ചു അരല്പം പോലും ആലോചിക്കുന്നില്ല എന്നത് ദുഖകരമാണ്. ഇത്തരം തമാശകള്‍ അവര്‍ക്കും അവരുടെ കുടുംബത്തിനും ഏല്‍പിക്കുന്ന മാനസികാഘാതം വളരെ വലുതാണ്‌. അത് കാണാതെ, വീണ്ടും വീണ്ടും ഇത്തരം സൃഷ്ടികള്‍ പടച്ചു വിടുന്നവരെ കാണുമ്പോള്‍ അറിയാതെ മനസ്സില്‍ ചോദിച്ചു പോകുന്നു. ഇവനൊന്നും അമ്മയും പെങ്ങളുമില്ലേ...!!!

ഒരു കാലത്ത് പൃഥ്വിരാജെന്ന നടനെതിരെയായിരുന്നു ഈ യുദ്ധം. അദ്ദേഹത്തെ ആക്ഷേപിക്കുവാന്‍ തുനിഞ്ഞിറങ്ങിയവരില്‍ ചിലരെ സൈബര്‍ പോലീസ് പിടികൂടിയതോടെ അതിനു തല്ക്കാലം ശമനമുണ്ടായി. പൃഥ്വിരാജു തന്നെ ഒരിക്കല്‍ പറയുകയുണ്ടായി, ഇവര്‍ എന്തിനു വേണ്ടിയാണ് ഇത് ചെയ്യുന്നത് എന്ന്. അവര്‍ക്കൊക്കെ ഒരു മനോസുഖം ലഭിക്കുമെന്നുള്ളതിനാല്‍ താന്‍ അതിനോട് പ്രതികരിക്കുന്നില്ല എന്നും. പക്ഷെ ഇവിടെ ആ പരിധിയും കടന്നു പോയിരിക്കുന്നു. വ്യക്തിഹത്യയും, അപകീര്‍ത്തിപ്പെടുത്തുന്ന വാര്‍ത്തകളും ശിക്ഷാര്‍ഹം തന്നെയാണ്. നമ്മുടെ നാട്ടിലെ നിയമ വ്യവസ്ഥിതിയില്‍, ഇത്തരം കാര്യങ്ങളില്‍ പരാതികൂടാതെ സ്വയം കേസെടുക്കുകയും ശിക്ഷാ നടപടികള്‍ ഉണ്ടാകുകയും ചെയ്താലേ ഇത്തരം ആളുകള്‍ സ്വയം നിയന്ത്രിക്കുകയുള്ളൂ. Freedom of Expression അല്ലെങ്കില്‍ ആവിഷ്കാര സ്വാതന്ത്ര്യം എല്ലാവര്‍ക്കും ഉണ്ട്. എന്നാല്‍ അത് മറ്റുള്ളവരെ അപകീര്‍ത്തിപ്പെടുത്തിയും വേദനിപ്പിച്ചും ആവാന്‍ പാടില്ല. കബില്‍ സിബല്‍ മുന്നോട്ടു വച്ച 'സോഷ്യല്‍ മീഡിയ സെന്‍സറിംഗ്' എന്ന ആശയത്തോട് തത്വത്തില്‍ യോജിപ്പില്ലെങ്കിലും, ഇത്തരം നടപടികള്‍ കാണുമ്പോള്‍, അതുപോലൊന്ന് വേണമെന്ന് തന്നെ തോന്നുന്നു.

2011 ലെ മികച്ച മലയാള ചിത്രങ്ങള്‍

മലയാള സിനിന്മയെ സംബന്ധിച്ച് നല്ലൊരു വര്‍ഷമാണ് കടന്നു പോയത്‌. കഥയും തിരക്കഥയും താരങ്ങളായപ്പോള്‍, ഓര്‍മ്മിക്കാന്‍ നമുക്കൊരു പിടി ചിത്രങ്ങള്‍ കിട്ടി. എന്റെ അഭിപ്രായത്തില്‍ മലയാളത്തില്‍ 2011-ലിറങ്ങിയ പത്ത്‌ ചിത്രങ്ങള്‍ ഞാന്‍ ഇവിടെ ചേര്‍ക്കുന്നു.
 

10. ഉറുമി  
ഒരു ഇടവേളക്കു ശേഷം മലയാളത്തിലേക്ക് എത്തിയ സന്തോഷ്‌ ശിവന്‍  പൃഥ്വിരാജിനെ നായകനാക്കി നിര്‍മ്മിച്ച  ചരിത്ര പ്രാധാന്യമുള്ള ചിത്രമായിരുന്നു ഉറുമി. ശങ്കര്‍ രാമകൃഷ്ണന്‍ കഥയും തിരക്കഥയും ഒരുക്കിയപ്പോള്‍, ഛായാഗ്രഹണം നിര്‍വഹിച്ചത് സന്തോഷ്‌ ശിവന്‍ തന്നെ. പൃഥ്വിരാജിനൊപ്പം പ്രഭുദേവ, ജനീലിയ, അമോല്‍ ഗുപ്ത, വിദ്യാ ബാലന്‍, തബു, നിത്യ മേനോന്‍ തുടങ്ങിയവര്‍ അഭിനയിച്ചിരിക്കുന്നു.  ഒരു താരത്തിന്റെ സിനിമ എന്നതിനപ്പുറം, ഒരു കൂട്ടം വ്യക്തികളുടെ നിതാന്ത പരിശ്രമത്തിന്റെ ഫലമായാണ് ഉറുമി നമുക്ക് മുന്നിലെത്തിയത്,  ചരിത്ര സിനിമകള്‍ പലതു കണ്ട മലയാളികള്‍ക്ക് ഉറുമി വേറിട്ടൊരു ദൃശ്യാനുഭവമായിരിന്നു. കലാ മൂല്യത്തിലും ദൃശ്യമികവിലും മുന്നില്‍ നിന്ന ഉറുമിയാണ് പത്താം സ്ഥാനത്ത്.  

9. സിറ്റി ഓഫ് ഗോഡ്
പൃഥ്വിരാജ്, ഇന്ദ്രജിത്ത്, റീമ കല്ലിങ്കല്‍ എന്നിവരെ കേന്ദ്ര കഥാപാത്രങ്ങളാക്കി ലിജോ ജോസ് പെല്ലിശ്ശേരി ഒരുക്കിയ ചിത്രമായിരുന്നു സിറ്റി ഓഫ് ഗോഡ്. ഒരു നഗരത്തിലെ പല തട്ടുകളിലായി ജീവിക്കുന്ന ഒരു കൂട്ടം ആളുകളുടെ ജീവിതത്തിലെ ചില സംഭവങ്ങള്‍ ആകസ്മികമായി കേട്ട് പിണയുന്നതായിരുന്നു ചിത്രത്തിന്‍റെ പ്രമേയം. ഒരു പശ്ചാത്തലത്തില്‍ നിന്നും മറ്റൊന്നിലേക്കു മാറുന്ന രീതിയിലുള്ള അവതരണം, ഒരു പക്ഷെ മലയാളികള്‍ക്ക് പുതുമ സമ്മാനിച്ചിരുന്നു. കാലാ കാലങ്ങളായി അനുവര്‍ത്തിച്ചു പോരുന്ന ആഖ്യാന ശൈലിയെ തള്ളി പറഞ്ഞു വ്യത്യസ്തമായ ഒരു അനുഭവം പ്രേക്ഷകര്‍ക്ക്‌ സമ്മാനിക്കുവാന്‍ ഈ ചിത്രത്തിന് കഴിഞ്ഞു. ഈ ചിത്രമാണ് ഒമ്പതാം സ്ഥാനത്ത്.

8. ചാപ്പ കുരിശ്‌
പലപ്പോഴും യുവത്വത്തിന്‍റെ സിനിമ എന്ന് നാം അവകാശപ്പെടുന്ന പല ചിത്രങ്ങളും അങ്ങനെ ആയിരുന്നില്ല. എന്നാല്‍ ചാപ്പ കുരിശ് അതില്‍ നിന്നും വ്യത്യസ്തമാകുന്നു, തികച്ചും ഒരു  യുവത്വത്തിന്‍റെ ചിത്രം. ഒരു നാണയത്തിലെ ചാപ്പയും കുരിശും പോലെ, ജീവിതത്തില്‍ രണ്ടു  തലങ്ങളില്‍ ജീവിക്കുന്ന രണ്ടു യുവാക്കളുടെ കഥയാണ് സമീര്‍ താഹിര്‍ ചിത്രത്തിലൂടെ പറയുന്നത്. ഫഹദ് ഫാസിലും വിനീത് ശ്രീനിവാസനുമാണ് ഈ ചിത്രത്തിലെ നായക വേഷത്തില്‍, റോമയും, രമ്യാ നമ്പീശനും നായികമാരാകുന്നു.  മലയാളത്തില്‍ ആദ്യമായി കാനന്‍ 7  ഡി കാമറ ഉപയോഗിച്ച് ചിത്രീകരിച്ച ചിത്രമാണ് ചാപ്പ കുരിശ്. മലയാളികള്‍ അധികം പരിചയിച്ചിട്ടില്ലാത്ത ദൃശ്യഭാഷയണ് 'ചാപ്പാക്കുരിശി'ല്‍ പരിചയപ്പെടുത്തുന്നത്. ഒരേ സമയം ദൃശ്യാ വിരുന്നും അതോടൊപ്പം ലാളിത്യവും സമ്മാനിക്കുന്ന ഈ ചിത്രമാണ് എട്ടാം സ്ഥാനത്ത്.

7. ബോംബെ മാര്‍ച്ച് 12
തിരകഥ രചയിതാവായ ബാബു ജനാര്‍ദ്ദനന്‍ ആദ്യമായി സംവിധാനം ചെയ്ത ചിത്രമാണ് ബോംബെ മാര്‍ച്ച് 12 . മമ്മൂട്ടി ഉണ്ണി മുകുന്ദന്‍ റോമ തുടങ്ങിയവര്‍ പ്രധാന  വേഷത്തില്‍ അഭിനയിച്ച ചിത്രം കൈകാര്യം ചെയ്തിരിക്കുന്ന വിഷയം തീവ്രവാദം എന്നത് തന്നെയാണ്. തീവ്രവും ചിന്തിക്കാന്‍ പ്രേരിപ്പിക്കുന്നതുമായ ഒരു വിഷയമാണ് ചിത്രം കൈകാര്യം ചെയ്തിരിക്കുന്നത്. രണ്ടു കാലഘട്ടങ്ങളിലെ കഥ അവതരിപ്പിച്ചിരിക്കുന്ന ശൈലി, കഥാഗതിയെ സംബന്ധിച്ച് പ്രേക്ഷകരുടെ മനസ്സില്‍ ആകാംഷയുളവാക്കുന്നു. നല്ല തിരനാടകവും മമ്മൂട്ടി എന്ന നടന്‍റെ പക്വതയാര്‍ന്ന അഭിനയവും ഇതില്‍ കാണാം. ഈ ചിത്രമാണ് ഏഴാം സ്ഥാനത്ത്.

6. ആദാമിന്‍റെ മകന്‍ അബു
2010 ലെ ദേശീയ പുരസ്കാരങ്ങള്‍ നേടിയ ചിത്രമെന്ന നിലയിലാണ് ആദാമിന്‍റെ മകന്‍ അബു നമുക്ക് മുന്നില്‍ എത്തിയത്. ഒരു പക്ഷെ ഈ അവാര്‍ഡുകള്‍ ലഭിച്ചിരുന്നില്ലെങ്കില്‍. ആരും കാണാതെ തീയേറ്ററില്‍ വന്നു പോയ ചിത്രമായി മാറിയേനെ ആദാമിന്‍റെ മകന്‍ അബു. ഹജ്ജിനായി മക്കക്കു പോക്ക് സ്വപ്നം കണ്ടു കഴിയുന്ന ദമ്പതികളുടെ കഥ പറയുന്ന ചിത്രം, വളരെ ലളിതമായി പച്ചയായ ജീവിതം വരച്ചു കാട്ടുന്നു. സലിം കുമാറിനോടൊപ്പം  മികച്ച അഭിനയുമായി ഒരു പടം നടീ നടന്മാര്‍, അതാണ്‌ സലിം അഹമ്മദിന്‍റെ ഈ ചിത്രം നമുക്ക് സമ്മാനിക്കുന്നത്. ആറാം സ്ഥാനത്ത് നില്‍ക്കുന്നത് അബുവാണ്.

5. ഇന്ത്യന്‍ റുപ്പി
പ്രാഞ്ചിയേട്ടന് ശേഷം രഞ്ജിത് സംവിധാനം ചെയ്ത ചിത്രമായിരുന്നു ഇന്ത്യന്‍ റുപ്പി. പൃഥ്വിരാജ് റീമ കല്ലിങ്കല്‍ തിലകന്‍ ടിനി ടോം തുടങ്ങിയവരായിരുന്നു ചിത്രത്തിലെ പ്രധാന വേഷങ്ങളില്‍. പണം പെരുമഴ പെയുന്ന ഭൂമിക്കച്ചവടങ്ങളിലേക്ക് സഞ്ചരിക്കുകയാണ് രഞ്ജിത് ഈ ചിത്രത്തിലൂടെ. പണത്തിനു കടലാസിന്റെ വില പോലുമില്ലതകുന്ന സന്ദര്‍ഭങ്ങള്‍ ജീവിതത്തില്‍ ഉണ്ടാകുമ്പോഴും, അത്യാഗ്രഹത്തിന്റെ പേരില്‍ പണത്തിനു പിറകെ പായുന്ന യുവത്വത്തിന്‍റെ കഥ പറയുകയാണ്‌ ചിത്രം. ഒരു ഇടവേളക്കു ശേഷം മലയാള സിനിമയിലേക്ക് കടന്നു വന്ന തിലകന്‍ തന്നെയാണ് ഈ ചിത്രത്തിലെ താരം. ഒരു മികച്ച ചിത്രം, കലാ മൂല്യമുള്ള ചിത്രം, അതാണ്‌ ഇന്ത്യന്‍ റുപ്പി. ആ ചിത്രമാണ് അഞ്ചാം സ്ഥാനത്ത്.

4. ബ്യൂട്ടിഫുള്‍
അനൂപ്‌ മേനോന്‍ തിരക്കഥയെഴുതി വി.കെ പ്രകാശ് സംവിധാനം ചെയ്ത ചിത്രമായിരുന്നു ബ്യൂട്ടിഫുള്‍. ജയസൂര്യ അനൂപ്‌ മേനോന്‍ മേഘ്ന രാജ് എന്നിവര്‍ പ്രധാന വേഷങ്ങളില്‍ എത്തുന്ന ചിത്രത്തില്‍, ശരീരം തളര്‍ന്നെങ്കിലും ജീവിതത്തെ പോസിറ്റീവായി കാണുന്ന ഒരാളുടെ കഥയാണ് പറയുന്നത്. കാമ്പുള്ള തിരക്കഥയും അര്‍ത്ഥവത്തായ സംഭാഷണങ്ങളും അതിമനോഹര ഗാനങ്ങളും ഒത്തു ചേര്‍ന്ന ഈ ചിത്രം പ്രേക്ഷകരെ കുറച്ചൊന്നുമല്ല ആകര്‍ഷിച്ചത്. വളരെ ലളിതമായി ഒരു കഥ എങ്ങനെ പറയാമെന്നു നമ്മെ കാണിച്ചു തന്നെ ബ്യൂട്ടിഫുള്‍ നാലാം സ്ഥാനത്ത്.

3. സോള്‍ട്ട് ന്‍ പെപ്പര്‍
നല്ല ഭക്ഷണം എന്നും മലയാളിയുടെ ഒരു ദൌര്‍ബല്യമാണ്. മലയാള സിനിമയില്‍ ഇത് വരെ ആരും കൈവക്കാത്ത ഈ പ്രമേയവുമായാണ് സോള്‍ട്ട് ന്‍ പെപ്പര്‍ നമ്മെ തേടി എത്തിയത്. നവാഗതരായ ശ്യാം പുഷ്കരനും ദിലീഷ് നായരും തിരക്കഥ എഴുതിയ ചിത്രം സംവിധാനം ചെതത് ആഷിക് അബുവായിരുന്നു. ലാല്‍, ശ്വേത മേനോന്‍, ബാബു രാജ്, ആസിഫ് അലി, മൈഥിലി തുടങ്ങിയവര്‍ അഭിനയിച്ച ഈ ചിത്രം മലയാളികള്‍ക്ക് ഒരു സദ്യ തന്നെയാണ് നല്‍കിയത്. ഭക്ഷണത്തിലെ അഭിരുചികളിലൂടെ പുരോഗമിക്കുന്ന ഒരു പ്രണയ കഥ, വളരെ ലളിതമായി എന്നാല്‍ ഒരു സിനിമയ്ക്ക് വേണ്ട എല്ലാ ചേരുവകളോടെ പാകം ചെയ്തെടുത്തപ്പോഴാണ് ഈ ചിത്രം പിറവി കൊണ്ടത്. മലയാളത്തില്‍ ഒരു ട്രെന്‍ഡ് സെറ്ററായി  മാറിയ സോള്‍ട്ട് ന്‍ പെപ്പറാണ് മൂന്നാം സ്ഥാനത്ത്. 

2. ട്രാഫിക്‌
2010 ലെ നിരാശകളില്‍ നിന്നും കരകയറ്റുന്ന തുടക്കം മലയാള സിനിമക്ക് നല്‍കിയ ചിത്രമായിരുന്നു ട്രാഫിക്ക്. 2011 ലെ ആദ്യ ചിത്രം ഇരുകയ്യും നീട്ടിയാണ് മലയാളികള്‍ സ്വീകരിച്ചത് . രാജേഷ് പിള്ള എന്ന സംവിധായകനും ബോബി-സഞ്ജയ് എന്നീ തിരകഥ രചയിതാക്കളും ചേര്‍ന്നാണ് ട്രാഫിക്ക് നമുക്ക് മുന്നില്‍ എത്തിച്ചത്. ശ്രീനിവാസന്‍, അനൂപ്‌ മേനോന്‍, വിനീത് ശ്രീനിവാസന്‍, കുഞ്ചാക്കോ ബോബന്‍, ആസിഫ് അലി തുടങ്ങി വളരെയധികം അഭിനേതാക്കള്‍ ഈ ചിത്രത്തിലുണ്ട്. മലയാളത്തിലെ റോഡ് മൂവി ത്രില്ലര്‍ എന്ന ഗണത്തിലേക്കാണ് ട്രാഫിക്ക് എത്തിയത്. മലയാളിക്ക് പുതുമ സമ്മാനിച്ച മള്‍ട്ടി ലീനിയര്‍ അവതരണമായിരുന്നു ഇതിന്‍റെ ഹൈലൈറ്റ്. കഥയും തിരക്കഥയും താരമായ ഈ ചിത്രമാണ് രണ്ടാം സ്ഥാനത്ത്.

1. മേല്‍വിലാസം
സൂര്യ കൃഷ്ണമൂര്‍ത്തിയുടെ  മേല്‍വിലാസം എന്ന നാടകത്തെ ആധാരമാക്കി മാധവ് രാംദാസ് സംവിധാനം ചെയ്ത ചിത്രമാണിത്. സുരേഷ് ഗോപി, പാര്‍ഥിപന്‍, തലൈവാസല്‍ വിജയ്, കക്കരവി, കൃഷ്ണകുമാര്‍, അശോകന്‍ തുടങ്ങിയവരാണ് ഈ ചിത്രത്തിലെ അഭിനേതാക്കള്‍. നാല് ചുവരുകള്‍ക്കുള്ളില്‍ നടക്കുന്ന ഒരു പട്ടാള കോടതി വിചാരണയുടെ കഥയാണ് ചിത്രം പറയുന്നത്.വെറും പത്തു ദിവസം കൊണ്ട് ചിത്രീകരണം പൂര്‍ത്തിയാക്കിയ ഈ ചിത്രം, മനോഹരമായ തിരക്കഥ കൊണ്ടും, മനോഹരമായ ദൃശ്യസന്നിവേശവും ആഖ്യാനം കൊണ്ടും പ്രേക്ഷക മനസ്സിലേക്ക് ചിന്തകളുടെ വേലിയേറ്റം തന്നെ നടത്തി. പരിമിതികള്‍ക്കുള്ളില്‍ നിന്ന് കൊണ്ടു ഒരു അതി മനോഹരമായ ദൃശ്യകാവ്യം, അതാണ്‌ മേല്‍വിലാസം, പക്ഷെ ജനങ്ങള്‍ ഇതിനു വേണ്ടത്ര പിന്തുണ നല്‍കിയില്ല എന്നുള്ള ദുഃഖം കൂടി ഈ അവസരത്തില്‍ ഞാന്‍ പങ്കു വയ്ക്കാന്‍ ആഗ്രഹിക്കുന്നു.

ഇവിടെ പരാമര്‍ശിക്കപ്പെടാതെ പോയ ചില ചിത്രങ്ങള്‍ ഉണ്ട്. ഓര്‍മ്മ മാത്രം, ജനപ്രിയന്‍, പ്രണയം, വീട്ടിലേക്കുള്ള വഴി മുതലായവ... മലയാള സിനിമയെ സംബന്ധിച്ചിടത്തോളം ഒരു നല്ല വര്‍ഷമാണ്‌ കടന്നു പോയത്. 2012 ഉം അത് പോലെ നല്ല ചിത്രങ്ങള്‍ തരട്ടെ എന്ന് ആശംസിക്കുന്നു...

സരോജ് കുമാറിലൂടെ നാം ചര്‍ച്ച ചെയ്യേണ്ടതെന്ത്?

നവാഗതനായ സജിന്‍ രാഘവന്‍ ശ്രീനിവാസന്റെ തിരക്കഥയില്‍ അദ്ദേഹത്തെ തന്നെ നായകനാക്കി സംവിധാനം ചെയ്ത പത്മശ്രീ ഭരത് ഡോ. സരോജ്കുമാര്‍ എന്ന ചിത്രം ഇപ്പോള്‍ സിനിമാ ആസ്വാദകരുടെ ഇടയിലും സിനിമാ രംഗത്തും ചര്‍ച്ച ചെയ്യപ്പെട്ടുകൊണ്ടിരിക്കയാണ്. സിനിമക്കുളിലെ കഥ പറഞ്ഞ ചിത്രമായ ഉദയനാണ് താരത്തിന്റെ രണ്ടാം ഭാഗമാണ് ഈ ചിത്രം. സിനിമാ രംഗത്തെ മോശം പ്രവണതകളെ കണക്കറ്റു പരിഹസിച്ച ഉദയനാണ് താരത്തിലെ സരോജ് കുമാറെന്ന കഥാപാത്രമാണ് ഈ ചിത്രത്തിന്റെ ടൈറ്റില്‍ റോളില്‍. സരോജ്കുമാറിന് മാനസാന്തരം വരുന്നിടത്താണ് 'ഉദയനാണ് താരം' അവസാനിക്കുന്നത്. എന്നാല്‍ പത്മശ്രീ ഭരത് ഡോ. സരോജ്കുമാര്‍ എന്ന ചിത്രത്തില്‍ സരോജ് കുമാര്‍ സിനിമ അടക്കി ഭരിക്കുന്ന സൂപ്പര്‍ താരമാണ്. എന്നാല്‍ പ്രേക്ഷകര്‍ വാനോളം പ്രതീക്ഷകള്‍ വച്ചുപുലര്‍ത്തിയ  ഈ ചിത്രം  പുറത്തിറങ്ങിയപ്പോള്‍ അത് മോഹന്‍ ലാല്‍ എന്ന നടനെതിരെയുള്ള ഒളിയമ്പുകള്‍ മാത്രം നിറച്ചതാണെന്നും, അദ്ദേഹത്തെ മനപൂര്‍വ്വം കരിവാരി തേക്കാന്‍ ശ്രീനിവാസന്‍ ഇറക്കിയ ചിത്രമാണെന്നും പരാതി ഉയര്‍ന്നു. എന്തും ഇതും ഏറ്റുപിടിക്കുന്ന ഫാന്‍സുകാര്‍ ചിത്രത്തിനെതിരെ രംഗത്ത്‌ വന്നു.

ചിത്രത്തിന്റെ പ്രമേയത്തിനും ഉദ്ദേശ ശുദ്ധിക്കും അപ്പുറം അതിലെ രൂക്ഷമായ പരിഹാസ ശരങ്ങളാണ് ശ്രദ്ധ നേടിയത്. ഒരു നാള്‍ വരും എന്ന ചിത്രത്തിന്റെ പരാജയം മോഹന്‍ ലാലിനെയും ശ്രീനിവാസനെയും അകറ്റി എന്നും, ഉദയനാണ് താരത്തിന്റെ രണ്ടാം ഭാഗത്തില്‍ അഭിനയിക്കാന്‍ മോഹന്‍ ലാല്‍ വിസമ്മതിച്ചത് കാരണം, മോഹന്‍ ലാലിനെ അധിക്ഷേപിക്കാന്‍  ശ്രീനിവാസന്‍ മനപൂര്‍വ്വം ഉണ്ടാക്കിയ ചിത്രമാണിതെന്നും പല കോണുകളില്‍ നിന്നും പരാതി ഉയര്‍ന്നു. എന്നാല്‍ മലയാള സിനിമയിലെ മോശം പ്രവണതകളെ വിമര്‍ശിക്കുക മാത്രമേ ഞാന്‍ ചെയ്തിട്ടുള്ളൂ എന്നും മോഹന്‍ ലാലിനെ ടാര്‍ഗറ്റ് ചെയ്യേണ്ട കാര്യം തനിക്കില്ല എന്നും ശ്രീനിവാസന്‍ വ്യക്തമാക്കി. അതിനിടയില്‍ മോഹന്‍ ലാലിന്റെ വിശ്വസ്തും (ബിനാമി) ഡ്രൈവറുമായ ആന്റണി പെരുമ്പാവൂര്‍ ചിത്രത്തിന്റെ ക്യാമറാ മാന്‍ എസ്.കുമാറിനെ വിളിച്ചു ഭീഷണിപ്പെടുത്തിയത് വാര്‍ത്തയായി. ശ്രീനിവാസനെതിരെ സന്തോഷ്‌ പണ്ടിറ്റിനെ വച്ച് ചിത്രം ചെയ്യുമെന്ന് വരെ ആന്റണി പെരുമ്പാവൂര്‍ പറഞ്ഞുവത്രേ. എന്തും ഏറ്റു പിടിക്കുന്ന സന്തോഷ്‌ പണ്ടിട്റ്റ്, ആന്റണി പെരുമ്പാവൂര്‍ ആഗ്രഹിക്കുന്നുവെങ്കില്‍ അഭിനയിക്കാന്‍ താന്‍ തയാറാണെന്ന് പരസ്യമായി പറഞ്ഞുവെങ്കിലും ആരും അതിലേക്ക് ശ്രദ്ധയൂന്നാതിരുന്നത് ഭാഗ്യമായി.

മലയാള സിനിമയുടെ മുഖം തന്നെ മാറി മറിച്ച വര്‍ഷമായിരുന്നു കടന്നു പോയത്. നാം കഴിഞ്ഞ വര്‍ഷം നേടിയതൊക്കെ അപകടപ്പെടുത്തുന്ന നിലയിലാണ് ഇക്കൊല്ലം കാര്യങ്ങള്‍ മുന്നോട്ടു പോകുന്നത്. യാദൃശ്ചികമോ അല്ലാതെയോ ഇതിന്‍റെ കാരണങ്ങളും സരോജ് കുമാര്‍ ചര്‍ച്ച ചെയ്യുന്ന വിഷയങ്ങളില്‍ പലതും ഒന്നാണ്, അല്ലെങ്കില്‍ അവയുടെ മൂലകാരണങ്ങള്‍ ഒന്നാണ് എന്നത് മലയാളി പ്രേക്ഷകര്‍ക്കും സിനിമാ രംഗത്തുള്ളവര്‍ക്കും പകല്‍ പോലെ വ്യക്തമായ വസ്തുതയാണ്. അപ്പോള്‍ പിന്നെ അതിനു നേരെ നാം മുഖം മറച്ചു പിടിക്കേണ്ട കാര്യമില്ല. ദൌര്‍ഭാഗ്യവശാല്‍ നമ്മുടെ മാധ്യമങ്ങള്‍ അതിന്റെ സെന്‍സെഷണല്‍ വാര്‍ത്താ വശം മാത്രം ചര്‍ച്ച ചെയ്തപ്പോള്‍ ആ ചിത്രത്തില്‍ ചര്‍ച്ച ചെയ്യേണ്ട കാര്യങ്ങള്‍ വിസ്മരിക്കപ്പെട്ടു എന്നതാണ് യാഥാര്‍ത്ഥ്യം. സൂപ്പര്‍ താരങ്ങള്‍ സിനിമാ ലോകത്തെ നിയന്ത്രിക്കുമ്പോള്‍, അവര്‍ക്കായി, അവരുടെ താര പദവി നില നിര്‍ത്താനായി കഥകള്‍ സൃഷ്ടിക്കപ്പെടുമ്പോള്‍, നല്ല സിനിമകള്‍ മലയാളത്തില്‍ മാത്രം ഉണ്ടാകുന്നില്ല എന്ന് വിലപിക്കുന്നവര്‍, യഥാര്‍തത്തില്‍ അന്വേഷിക്കേണ്ടത് അതിലെ യഥാര്‍ത്ഥ കാരണങ്ങളെയാണ്.  മലയാള സിനിമയിലെ അത്തരം പ്രവണതകളെയും, പ്രേക്ഷകര്‍ കാണാതെ പോകുന്ന പിന്നാമ്പുറ കഥകളിലേക്കും തിരിച്ചു പിടിക്കുന്ന ഒരു കണ്ണാടിയാണ് സരോജ് കുമാറെന്ന ചിത്രം. അത്തരം കാര്യങ്ങള്‍ ചര്‍ച്ച ചെയ്യപ്പെടുകയും, സ്വയം വിമര്‍ശനാത്മകമായി മലയാള സിനിമാ പ്രവര്‍ത്തകര്‍ ചിന്തിച്ചു തുടങ്ങുമ്പോഴേ മലയാള സിനിമയ്ക്ക് ഈ പടുകുഴിയില്‍ നിന്നും ഉയര്‍ത്തെഴുന്നേല്‍പ്പുണ്ടാകൂ. സരോജ് കുമാര്‍ എന്ന ചിത്രം ഒരു മാറ്റമു ണ്ടാ ക്കുന്ന ചിത്രമാണെന്ന് അവകാശപ്പെടാന്‍ ഞാനൊരു മണ്ടനല്ല. പക്ഷെ നാമിതിന്‍റെ പ്രസക്തി തീര്‍ച്ചയായും ചര്‍ച്ച ചെയ്യുക തന്നെ വേണം.

സരോജ് കുമാരിലെ ഒരു രംഗം പരിശോധിക്കാം. സരോജ് കുമാറിന് കേണല്‍ പദവി ലഭിക്കുമ്പോള്‍ വിളിക്കുന്ന പത്ര സമ്മേളനത്തില്‍, തനിക്കു ലഭിച്ച അംഗീകാരത്തെ കുറിച്ച് പറയുന്ന സരോജ കുമാറിനോട്, അയാളുടെ ഏറ്റവും പുതിയ ചിത്രമായ 'വെക്കടാ വെടി'യെ കുറിച്ച് ഒരു പത്രക്കാരി ചോദിക്കുന്നുണ്ട്, "പദ്മശ്രീയും ഡോക്ടറും കേണല്‍ പടവിയുമൊക്കെ ലഭിച്ച ഒരു നടന്‍ ചെയ്യാവുന്ന ഒരു ചിത്രമാണോ അതെന്ന്, സമൂഹത്തോട് ഒരു പ്രതിബദ്ധതയും ഇല്ലേ എന്ന്". അതിനുള്ള മറുപടിയായി സരോജ് കുമാര്‍ പറയുന്നത്, സിനിമയും കേണലും വേറെ എന്നാണു. അപ്പോള്‍ പത്രക്കാരി ഓര്‍മ്മിപ്പിക്കുന്നുണ്ട്, സിനിമയില്‍ അഭിനയിച്ചത് കൊണ്ടു മാത്രമാണ് ഈ പടവികളൊക്കെ ലഭിച്ചത് എന്ന്. പലപ്പോഴും, നാം ആരാധിക്കുന്ന മഹാനടന്മാര്‍ അവരുടെ കഴിവിനെ പോലും കൊഞ്ഞനം കുത്തുന്ന ചില ചിത്രങ്ങളില്‍ അഭിനയിക്കുമ്പോള്‍ നാം  മലയാളികള്‍ അറിയാതെ അവരോടു ചോദിച്ചു പോകുന്ന ഒരു ചോദ്യമല്ലേ അത്?  കാശു കൊടുത്ത് തീയേറ്ററില്‍ കയറുന്ന പ്രേക്ഷകരില്‍ പലരും ഈ ചോദ്യങ്ങള്‍ തങ്ങളുടെ മനസിലെങ്കിലും ചോദിച്ചു പോകുന്നുണ്ട്. സരോജ് കുമാറെന്ന ചിത്രം ചര്‍ച്ച ചെയ്യപെടെണ്ടത് ഈ ഒരു വീക്ഷണ കോണിലാണ്, അല്ലാതെ ആര്‍ക്കും ഗുണം ചെയ്യാത്ത ചര്‍ച്ചകളിലൂടെയല്ല.. സരോജ് കുമാറിനെകുറിച്ചുള്ള ചര്‍ച്ചകള്‍ എത്തി നില്‍ക്കുന്നത് മോഹന്‍ ലാല്‍ എന്ന സൂപ്പര്‍ സ്റ്റാര്‍-ഇല്‍ മാത്രമാണ്. മോഹന്‍ ലാലിനെ ആക്ഷേപിച്ചു എന്ന് പറയുന്നവര്‍ മനസ്സിലാക്കേണ്ടത്, ആരും വിമര്‍ശനത്തിനതീതരല്ല എന്ന കാര്യമാണ്. മലയാളസിനിമയിലെ പൊങ്ങച്ചങ്ങളെ വിമര്‍ശിക്കുന്ന തരത്തിലുള്ള സറ്റയര്‍ മാത്രമാണ് സരോജ് കുമാര്‍... അതിനെ അതിന്‍റെ ശരിയായ രീതിയില്‍ വിലയിരുത്തി ചര്‍ച്ച ചെയ്‌താല്‍, ഒരു പക്ഷെ മലയാള സിനിമയിലെ പല മോശം പ്രവണതകളെയും ഇല്ലാതാക്കാന്‍ കഴിഞ്ഞേക്കും.. പക്ഷെ അങ്ങനെയുള്ള സാധ്യതകള്‍ ഒരു സ്വപ്നം മാത്രമാണ് എന്ന് അടിവരയിട്ടുകൊണ്ടാണ് കാര്യങ്ങള്‍ നീങ്ങുന്നത്‌ എന്ന് വ്യക്തം... അപ്പോള്‍ പിന്നെ നാം ഇനിയും സന്തോഷ്‌ പണ്ഡിറ്റ്‌മാരെ കാണേണ്ടിയും സഹിക്കേണ്ടിയും വരും.. നമ്മുടെ തലവര...!!!

മമ്മൂട്ടി:ഭാഷയും ദേശവും- വിധേയന്റെ ശബ്ദം;അധീശന്റെയും ( ഭാഗം പതിനൊന്ന്‍)

'ടേയ്...ഇല്ലി ബാരോ ബഡ്ഡിമകനേ'

തൊമ്മിയെന്ന വയനാടന്‍ കുടിയേറ്റകര്‍ഷകന്റെ അപകര്‍ഷതകളിലേക്ക് സാഡിസത്തിന്റെയും അസഹിഷ്ണുതയുടെയും വിത്തെറിഞ്ഞുവീഴുന്ന ഈ പട്ടേലര്‍ശബ്ദം വിധേയന്‍ എന്ന സിനിമയുടെ ആദ്യസംഭാഷണവും ചിത്രത്തിന്റെ ഭാഷാസവിശേഷതയിലേക്കള്ള കൈചൂണ്ടിയുമായിരുന്നു. സക്കറിയയുടെ 'ഭാസ്‌കരപട്ടേലരും എന്റെ ജീവിതവും' എന്ന നോവലിനെ ആധാരമാക്കി അടൂര്‍ ഗോപാലകൃഷ്ണന്‍ സംവിധാനം ചെയ്ത സിനിമയില്‍ ഭാസ്‌കരപട്ടേലര്‍ എന്ന ദക്ഷിണകര്‍ണാടകക്കാരനായി മമ്മൂട്ടിയും തൊമ്മിയായി എം ആര്‍ ഗോപകുമാറുമാണ് വേഷമിട്ടത്. ഒരു വെടിയുണ്ടപോലെ പട്ടേലര്‍ ഉതിര്‍ക്കുന്ന ശബ്ദത്തിന്റെ പ്രതിഫലനവും പ്രതികരണത്തുടര്‍ച്ചയും തൊമ്മിയില്‍ ദര്‍ശിച്ച ശേഷം മാത്രമാണ് നാം പട്ടേലരെ ആദ്യമായി സ്‌ക്രീനില്‍ കാണുന്നത്. ഈ ചിത്രത്തില്‍ ഭാസ്‌കരപട്ടേലര്‍ രണ്ടുതരം സംഭാഷണശൈലികള്‍ക്കാണ് വക്താവാകുന്നത്. തനതുജനതയോടുള്ള ആശയവിനിമയത്തിനുപയുക്തമാക്കുന്ന ഭാഷയാണ് അതില്‍ ഒന്ന്;

പട്ടേലര്‍ -സരോജാ ,നോടെ പുട്ടാ ബന്താ.'' (സരോജാ,ഇതാ നമ്മുടെ മോന്‍.). നന്നമക കൂനൂര്‍ നല്ലി ഓദിദ്ദുസാഗു. ഇന്നു ഇല്ലെല്ലാദ്രു,ദിനാഹോ ഗിബറോ സ്‌കൂല്‍ഗേ സേര്‍സോണാ (എന്റെ മോന്‍ കൂനൂരില്‍ പഠിച്ചതോക്കെ മതി. ഇനി ഇവിടുന്നു പോയി വരാവുന്ന വല്ല സ്‌കൂളിലും ചേര്‍ക്കാം.)

അളിയന്‍ - ഹാഗേ ഹെളീേ്രദ അവനഭവിഷ്യകൂടാ നാവു നോടു ബേഡേ ? പുട്ടാ എല്ലാറജകളല്ലു ബര്‍ത്തിദാനല്ലാ. (പക്ഷേ അവന്റെ ഭാവി കൂടി നമ്മള്‍ നോക്കണ്ടേ. അവന്‍ എല്ലാ അവധിക്കും വരുന്നുണ്ടല്ലോ.)

അതേസമയം പ്രദേശവാസികളുമായി ഇടപഴകുമ്പോള്‍ പട്ടേലരുടെ ഭാഷ പ്രകടമായിത്തന്നെ മാറുന്നു. അത് കന്നടത്തിന്റെയും തുളുവിന്റെയും മലയാളത്തിന്റെയും ഭാഷാംശങ്ങള്‍, ഉച്ചാരണരീതിയിലെങ്കിലും, കൂടിച്ചേര്‍ന്നതാകുന്നു.
ഭാര്യയെ കൊല്ലാനുള്ള തീരുമാനം പട്ടേലര്‍ തൊമ്മിയോടു പറയുന്ന സന്ദര്‍ഭം ശ്രദ്ധിക്കുക

പട്ടേലര്‍ -എടാ ഞാനു നിന്റെ സരോജാക്കയെ കൊല്ലാനു പോകുന്നു.

തൊമ്മി - അരുതേ...അയ്യോ യജമാനരേ.

പട്ടേലര്‍ - നീ കൂടെ വേണം.

തൊമ്മി - അയ്യോ. എന്തിനാ യജമാനരേ അവരെ കൊല്ലുന്നത്.? നല്ല അക്കയല്ലേ അവര്‍

പട്ടേലര്‍ - അവളുടെ ഉപദേശ കേട്ടു ഞാനു മടുത്തു. എന്നെ ആരും ഉപദേശിക്കുന്നത് എനിക്ക് ഇഷ്ട ഇല്ല. നിനക്കറിഞ്ഞുകൂടേ. ഞാനു എനിക്കു തോന്നിയതുപോലെ ജീവിക്കും.

തൊമ്മി - അയ്യോ യജമാനരേ ! അക്കയെ എന്തിനാ കൊല്ലുന്നത്. അവര്‍ ഒരു വഴക്കും ഉണ്ടാക്കാറില്ലല്ലോ.

പട്ടേലര്‍ - അപകട ഉണ്ടായതുപോലെ വരുത്തണം. ഞാനു തോക്കുനിറക്കുന്നതുപോലെ ഇരിക്കും. അപ്പോളൂ നീ അവളെ ദിണ്ണയിലേക്കു വിളിക്കണം. അബദ്ധത്തില് വെടി തീരും പോലെ സംഭവിക്കും. ഞാനു വെടിവച്ചതാണെന്ന് ്‌വളു അറിയാനു പാടില്ല. ആ സങ്കടത്തില് അവളു മരിക്കരുത്. നീ സങ്കടപ്പെടണ്ട.. അവളുക്കൊരപകട വന്നതായി കരുതിയാലു മതി. നീ സാക്ഷി പറയണം. അവളുടെ ആങ്ങളമാരു അത്ര ശരിയല്ല.

തുളുനാട്ടുകാരനായ ഒരാള്‍ കന്നടവും തുളുവും മലയാളവും ഒരുപോലെ സംഭാഷണപ്രധാനമായ സാമൂഹ്യക്രമത്തില്‍ ബോധപൂര്‍വ്വം മലയാളം സംസാരിക്കവാന്‍ ശ്രമിക്കുമ്പോഴുള്ള ഭാഷയാണ് പട്ടേലരുടേത്. കേരളത്തിന്റെ വടക്കന്‍ അതിര്‍ത്തിയില്‍ വിപുലമായ ഭാഷ. ദ്രാവിഡഗോത്രത്തില്‍പ്പെട്ട തുളുഭാഷ തെക്കന്‍ കര്‍ണ്ണാടകത്തിലെ കല്യാണഗിരിപ്പുഴയുടെയും വടക്കന്‍ മലബാറിലെ ചന്ദ്രഗിരിപ്പുഴയുടെയും മധ്യേയുള്ള പ്രദേശത്തെ എട്ടുലക്ഷത്തോളം ജനങ്ങളുടെ വാമൊഴിയാണ്. ഇവിടെ നടന്നുവരുന്ന ഭാഷാപരമായ കൊണ്ടകൊടുക്കലുകളുടെ പ്രതീകാത്മകമായ അവതരണമാണ് ഉച്ചാരണശൈലിയിലെ വൈവിധ്യം കൊണ്ട് മമ്മൂട്ടി ആകര്‍ഷകമാക്കിയിരിക്കുന്നത്.

അടിസ്ഥാനപരമായി തുളു മുഖ്യഭാഷയെന്നു കരുതാവുന്ന ദക്ഷിണകര്‍ണ്ണാടകത്തില്‍ മലയാളവും കന്നടവും കൊങ്കിണിയുമൊക്കെ ചേര്‍ന്ന ഒരുതരം ഭാഷാമിശ്രമാണ് നിലനില്‍ക്കുന്നത്. ഇവിടേക്കുള്ള വ്യാപകമായ മലയാളികുടിയേറ്റത്തിന് നൂറ്റാണ്ടോളം പഴക്കമുണ്ട്. അതോടെ അന്നാട്ടുകാര്‍ മലയാളം പറയാന്‍ പഠിച്ചു; മലയാളികള്‍ തുളു പറയാനും . തുളു മാത്രമല്ല കന്നടയും കൊങ്കിണിയുമെല്ലാം ഭാഷണഭേദങ്ങളില്‍ ഉള്‍പ്പെട്ടു. അത്തരത്തില്‍ തുളുനാട്ടുകാരന്‍ പറയുന്ന മലയാളമാണ് ഭാസ്‌കരപട്ടേലരുടേത്. മലയാളത്തിന്റെ ഉച്ചാരണരീതി പട്ടേലര്‍ക്കു വഴങ്ങുന്നില്ല. തുളു പറയുന്നതുപോലെയാണ് അയാള്‍ മലയാളം പറയുന്നത്. വിധേയന്റെ കഥാഭൂമികയില്‍ എല്ലാ ഭാഗത്തുനിന്നുമുള്ള മലയാളികളുണ്ടെങ്കിലും മധ്യകേരളത്തില്‍ നിന്നുള്ള കുടിയേറ്റകൃസ്ത്യാനികളാണ് അധികവും. ദക്ഷിണകര്‍ണ്ണാടകത്തിലെ പുത്തൂര്‍ താലൂക്കും പരിസരവുമാണ് വിധേയനിലെ കഥാഭൂമിക. മംഗലാപുരത്തുനിന്ന് കുമാരധരനദിക്കും നേത്രാവതിക്കും ഇടയിലുള്ള ഉപ്പിനങ്ങാടി, നെല്ലിയാടി വില്ലേജ് വഴി സകലേശ് പുരത്തേക്ക്... പിന്നെ ഹാസനിലേക്കുള്ള ഹൈവേ... ഇവിടെയെല്ലാം രൂഢമൂലമായ കുടിയേറ്റമാണ് നടന്നിട്ടുള്ളത്. കാസര്‍കോഡ് ജില്ലയിലെ ബന്തടുക്ക വഴിയും ഇവിടേക്കെത്താം. സമ്മിശ്രഭാഷാസംസ്‌കാരമാണ് ഇവിടെയെല്ലാം പ്രകടമാകുന്നത്. മധ്യകേരളത്തില്‍ നിന്നുള്ള ക്രിസ്ത്യാനികള്‍ക്കും മുന്‍പെ കച്ചവടത്തിനും മറ്റുമായി മലബാര്‍ജില്ലകളില്‍ നിന്നുമെത്തിയ മുസ്ലീങ്ങളുടെ സംഭാഷണഭാഷ മലയാളമാണോയെന്നുപോലും തിരിച്ചറിയാനാവാത്തവിധം തുളുവും കൊങ്കിണിയും കന്നടയുമായി കൂടിക്കുഴഞ്ഞുകിടക്കുന്നു.

ഭാസ്‌കരപട്ടേലര്‍ക്കും തൊമ്മിക്കും ജീവന്‍ നല്‍കാന്‍ യഥാര്‍ത്ഥജീവിതത്തില്‍ നിന്നും രണ്ടു വ്യക്തികളെ കണ്ടെടുക്കുകയായിരുന്നു സക്കറിയ. രണ്ടു ദശാബ്ദത്തോളം മണ്ണഗുണ്ടിയില്‍ തോട്ടം നടത്തിയിരുന്ന സക്കറിയക്ക് കുടിയേറ്റക്കാരനും വസ്തു ഇടനിലക്കാരനുമായിരുന്ന കുഞ്ഞുകുഞ്ഞുചേട്ടനില്‍ നിന്നാണ് തൊമ്മിയെയും ഭാസ്‌കരപട്ടേലരെയും കുറിച്ചുള്ള വിവരങ്ങള്‍ ലഭിച്ചത്. ഭാസ്‌കരപട്ടേലര്‍ എന്ന മുഖ്യകഥാപാത്രത്തിന് പ്രചോദനമായ ശേഖരപട്ടേലരെക്കുറിച്ചുള്ള സംഭവകഥകള്‍ വളരെ വിഭിന്നമായിരുന്നു.

മണ്ണഗുണ്ടിയില്‍ നിന്നും നാലുകിലോമീറ്റര്‍ അകലെ ഉദിനചന്തയില്‍ കുഞ്ഞുകുഞ്ഞുചേട്ടന്റെ സഹോദരന്റെ കള്ളുഷാപ്പില്‍ കള്ളൊഴിച്ചുകൊടുക്കുന്ന ജോലിക്കാരനായിരുന്നു തൊമ്മി. കുഞ്ഞുകുഞ്ഞുചേട്ടന്‍ ഒരു ദിവസം തൊമ്മിയെ സക്കറിയക്കു കാട്ടിക്കൊടുത്തു. അന്നാണ് അയാള്‍ക്ക് ശേഖരപട്ടേലരില്‍ നിന്നും ഒളിവെടികൊണ്ട കഥ പറഞ്ഞതും. മംഗലാപുരത്ത് ഹോസ്പിറ്റലില്‍ കൊണ്ടുപോയെങ്കിലും വെടിച്ചീളുകള്‍ പുറത്തെടുക്കുന്നത് ചെലവുള്ളകാര്യമായിരുന്നു. എന്നുമാത്രമല്ല അതവിടെയിരിക്കുന്നതുകൊണ്ട് കാര്യമായ പ്രശനങ്ങളൊന്നുമുണ്ടാകാന്‍ സാധ്യതയുമില്ലായിരുന്നു. അതുകൊണ്ടുതന്നെ വെടിച്ചീളുകള്‍ നീക്കം ചെയ്ിതില്ല. ചില്ലിരിക്കുന്ന ഭാഗം തൊമ്മി തന്നെയാണ് സക്കറിയക്കുകാട്ടിക്കൊടുത്തതും. ഇത്തരം നിരവധി സൂചനകളില്‍ നിന്നുമാണ് ഭാവനാഭരിതമായ കഥ സക്കറിയ എഴുതുന്നത്.

'ഒരുതരം തുളുമലയാളമാണ് പട്ടേലരുടെ ഭാഷ.1982 മുതല്‍ 2000 വരെയുള്ള കാലത്തായിരുന്നു എനിക്കവിടെ തോട്ടമുണ്ടായിരുന്നത്. ഞാന്‍ പഠിച്ചത് മൈസൂറിലും ബാംഗഌരിലുമൊക്കെയായിരുന്നു. അതുകൊണ്ട് കന്നട എനിക്കറിയാം. അന്ന് ഹോസ്റ്റലിലും മറ്റും തുളു പറയുന്ന കുട്ടികള്‍ ധാരാളമുണ്ടായിരുന്നു; പ്രത്യേകിച്ചും മൈസൂറില്‍... വളരെ മധുരമുള്ള ഭാഷയാണ് തുളു. കൊച്ചുകുട്ടികള്‍ സംസാരിക്കുന്നതു പോലെയാണത്. ഞാന്‍ കണ്ട പട്ടേലരെ ഏറ്റവും ശക്തമായാണ് മമ്മൂട്ടി അവതരിപ്പിച്ചത്. വളരെ ജനുവിനായ പെര്‍ഫോര്‍മന്‍സ്. ക്യാരക്ടറിനെ ഉള്‍ക്കൊണ്ടതുമാത്രമല്ല; എനിക്കു തോന്നുന്നത് മമ്മൂട്ടി അന്നാട്ടിലെത്തി വളരെ കഷ്ടപ്പെട്ട് ആ ഭാഷയുടെ ഇന്‍ോണേഷന്‍ നന്നായി പഠിച്ചിട്ടുണ്ടാവുമെന്നാണ് .സാധാരണനിലയില്‍ അത്തരം ഭാഷ നമ്മള്‍ വഴിയിലൊക്കെ നിന്നു കേള്‍ക്കുമ്പോഴും ഒരു ആര്‍ട്ടിസ്റ്റ് പ്രസന്റ് ചെയ്യുമ്പോഴും രണ്ടും രണ്ടു രീതിയിലാണ് വരുന്നത്. എന്നാലിവിടെ മമ്മൂട്ടി തുളുമലയാളം സംസാരിച്ചപ്പോള്‍ അതിന് വേറൊരു മാനം വന്നു ചേര്‍ന്നു. അദ്ദേഹമത് നന്നായി പഠിച്ച് അവതരിപ്പിക്കുകയാണുണ്ടായത്.'-സക്കറിയ പറയുന്നു

ഭാസ്‌കരപട്ടേലരുടെ കന്നടയും തുളുവും കലര്‍ന്ന ഭാഷ മറ്റു സിനിമകള്‍ക്കും പ്രചോദനമായി. ബെന്നി പി നായരമ്പലത്തിന്റെ തിരക്കഥയില്‍ ഷാഫി സംവിധാനം ചെയ്ത ചട്ടമ്പിനാട് അത്തരം സിനിമയാണ്. മലയാളഭാഷ അറിയാത്തതിനാല്‍ കുറ്റാരോപിതനായ ഒരു കര്‍ണ്ണാടകക്കാരന്‍ ബാലന്റെ കഥയാണത്. പിന്നീട് കാലാന്തരത്തില്‍ ഇന്നാട്ടുകാരുമായി കൂടുതല്‍ ഇടപഴകുന്ന അയാള്‍ കന്നടയും തുളുവും കലര്‍ന്ന മലയാളത്തിലാണ് സംസാരിക്കുന്നത്.

'വിധേയന്‍ എന്ന പടത്തിലെ മമ്മൂക്കയുടെ പ്രസന്റേഷന്‍ തന്നെയാണ് അതിന് ഇന്‍സ്പിറേഷനായത്. അതിലദ്ദേഹം ആ സ്ലാംഗ് നന്നായി അവതരിപ്പിച്ചിട്ടണ്ട്. എന്നാലത് ഒരു ക്ലാസ് ഓഡിയന്‍സ് മാത്രമേ കണ്ടിട്ടുള്ളൂ. അങ്ങനെയാണ് കോമണ്‍ ഓഡിയന്‍സിനു മൊത്തത്തില്‍ രസകരമാകുന്ന വിധത്തില്‍ ഈയൊരു ഭാഷ സംസാരിക്കുന്ന കഥാപാത്രത്തെക്കുറിച്ച് ചിന്തിച്ചത്. കുറച്ചുവാക്കുകളേ എനിക്കു കന്നടയിലും തുളുവിലുമൊക്കെയായി അറിയാമായിരുന്നുള്ളൂ.. ഭാഷ കുറച്ചു സ്റ്റഡി ചെയ്യേിവന്നു. കന്നട ഭാഷയിലെ ഒരു അസിസ്റ്റന്റ് ഡയറക്ടറെ ഈ ഭാഷ മുന്‍നിര്‍ത്തി പോസ്റ്റ് ചെയ്തു. അയാളുടെ സഹായത്തോടെയാണ് ഷൂട്ടിംഗ് സമയത്ത് ഭാഷയില്‍ മാറ്റങ്ങള്‍  വരുത്തിയത്. ഭാഷ അറിയുന്ന ഒരാള്‍ കൂട്ടത്തില്‍ വേണമെന്ന് മമ്മൂക്ക തന്നെയാണ് ആവശ്യപ്പെട്ടത്. ലൊക്കേഷനില്‍ വച്ച് സ്‌ക്രിപ്റ്റിലെ പല വാക്കുകളും കന്നടയിലും തുളുവിലും ചേര്‍ക്കുന്നതിനുള്ള ഇന്‍സ്ട്രക്ഷനും മമ്മൂക്കയുടെ ഭാഗത്തുനിന്നുമുണ്ടായി. 'ചട്ടമ്പിനാടിന്റെ തിരക്കഥാകൃത്ത് ബെന്നി പി നായരമ്പലം ഓര്‍ക്കുന്നു.

തുളുമലയാളങ്ങള്‍ക്ക് ഒരു കാലത്ത് ഒരൊറ്റ ലിപി നടപ്പുണ്ടായിരുന്നുവെന്നുവേണം കരുതാന്‍. തുളു ലിപി കാലഹരണപ്പെട്ടതെങ്ങനെയെന്ന് തുളു അക്കാദമി മുന്‍സെക്രട്ടറി പാല്‍ത്താഡി രാമകൃഷ്ണആചാര്‍ നിരീക്ഷിക്കുന്നതിങ്ങനെയാണ് : തുളുനാട് കര്‍ണ്ണാടകത്തിന്റെ അധീനതയിലായതോടെ തുളുവര്‍ക്കും കന്നട അനിവാര്യമായി. ഔദ്യോഗികഭാഷ കന്നടമായപ്പോള്‍ എഴുത്തുകുത്തുകളെല്ലാം ആ ഭാഷയിലായി. അങ്ങനെ കന്നടലിപി മേല്‍ക്കോയ്മ നേടി. തുളുഗ്രന്ഥങ്ങള്‍ കന്നടഭാഷയില്‍ എഴുതുന്ന പതിവ് തുടങ്ങിയതും അങ്ങനെയാണ്.

തുളുമഹാഭാരതവും വിഷ്ണുതുംഗന്റേതെന്നു കരുതുന്ന മഹാഭാഗവതവും പിന്നീട് ലഭ്യമായ കാവേരിമാഹാത്മ്യവും ദേവീമാഹാത്മ്യവുമടക്കമുള്ള പ്രാചീനകൃതികളെല്ലാം തുളു ലിപിയില്‍ എഴുതപ്പെട്ടവയായിരുന്നു. പിന്നീട് ബാസല്‍മിഷന്‍കാര്‍ രചനാപ്രവര്‍ത്തനങ്ങളെ ഊര്‍ജ്ജിതമാക്കാനും തുളുലിഖിതസാഹിത്യത്തിന് കന്നട ലിപി വ്യാപകമാക്കാനും ഇടയൊരുക്കി. 'മത്തായന സുവാര്‍ത്തെ(മത്തായിയുടെ സുവിശേഷം)'യാണ് കന്നടലിപിയില്‍ അച്ചടിച്ച ആദ്യ തുളുകൃതി. കൃഷ്ണസാലിയനും മാധവപെരാജെയും മംവിട്ടലനുമടക്കം ഒട്ടേറെ പേര്‍ ഗദ്യസാഹിത്യത്തിലും മറ്റും വിരാജിച്ചതങ്ങനെയാണ്.

മന്ദരകേശവഭട്ടിന്റെ 'മന്ദരരാമായണ' ആധുനികകവിതാശാഖയിലെ പ്രമുഖരചനയാണ്.
മലയാളം, തുളു, കന്നട എന്നീ ഭാഷകളെല്ലാം ദ്രാവിഡ ഭാഷാഗോത്രത്തില്‍പ്പെട്ടവയാണെന്നതുകൊണ്ടു തന്നെ കൗതുകകരമായ സമാനതകളും ശ്രദ്ധേയമായ ഭിന്നതകളും അവക്കുണ്ടുതാനും. ഉദാഹരണത്തിന് മാനവേതരപ്രത്യയങ്ങള്‍ തന്നെയെടുക്കാം. തുളുഭാഷയില്‍ അവ രണ്ടുതരത്തിലാണുള്ളത്; ' ലു ' വും ' കുലു 'വും
ബോറി (കാള) - ബോറിലു (കാളകള്‍)
മര (മരം) - മരകുലു (മരങ്ങള്‍)
മലയാളത്തില്‍ ഈ സ്ഥാനത്ത് 'കല്‍' പ്രത്യയവും കന്നടത്തില്‍ 'ഗളു' പ്രത്യയവുമാണുള്ളത്
മരം- മരങ്ങള്‍ (മലയാളം)
മറ - മറഗളു (കന്നട)

മലയാളം,തുളു, കന്നട ബന്ധം വ്യക്തമാക്കുന്ന വാക്കുകളില്‍ ചിലത് ചുവടെ കൊടുക്കുന്നു.
്മലയാളം - വില, എതിര്‍ , കോഴി , പെണ്ണ്, വേണ്ട
തുളു - ബിലെ , എദിര് , കോറി , പൊണ്ണ് , ബോഡ്ചി
കന്നട - ബെലെ , എദുറു , കോളി , ഹെണ്ണു , ബേഡ


വിഭക്തിയിലും സര്‍വ്വനാമങ്ങളിലുമെല്ലാം കൗതുകകരമായ ഈ ബന്ധം നിലനില്‍ക്കുന്നു. ക്രിയാരൂപങ്ങളുടെ പ്രത്യേകത തന്നെ നോക്കൂ
നിങ്ങള്‍ എഴുതുന്നു(മലയാളം) - ബറെയുത്തീറി(കന്നട) - ബറെപറെ(തുളു)

അതിര്‍ത്തിഭാഷ മേല്‍ക്കൈ നേടിയ ഒട്ടേറെ രചനകള്‍ മലയാളത്തിലുമുണ്ട്. തുളുവും കന്നടയും സംഭാഷണഭാഷയായ അതിര്‍ത്തിഗ്രാമങ്ങളുടെ വികാരഭേദങ്ങള്‍ പങ്കുവക്കുന്ന ഈ കൃതികളുടെ ആകര്‍ഷണം തന്നെ മിക്കപ്പോഴും നാട്ടുഭാഷകളാണ്

'ഈ സഭെക്ക് ബത്ത്്ണ ശ്രീരാമഗ്ല ബാക്കി മാത്തെരഗ്ല സ്വാഗത. ചീയോദ കൃഷികര്‌ന സഭെ ആത്തിപ്പുണ്ടു. എനി മുളു നടപ്പുണെം സുമാര്‍ ദിനാന്ത് ഇന്‍ച്ചിനെ ഒഞ്ച് സഭെ നടപ്പാവൗഡുന്ത് യോജനെ മാര്‍പ്പുണെ...'
ശ്രീരാമയെ അധ്യക്ഷനായി വിളിച്ച് സ്വാഗതപ്രാസംഗികന്‍ വാക്കുകള്‍ അവസാനിപ്പിച്ചു. ശ്രീരാമ എഴുനേറ്റു
'ഏന് ലാസ്റ്റ്‌ഗെ പാത്തെര്‍വ്വെ. നിക്ക്‌ല് മാത്താര്‍ള നിക്ക്‌ല് അഭിപ്രായപണ്‍ലേ. എന്‍ക്കളെഗ് എഞ്ചിണ മണ്‍പൊളി '
നീലകണ്ഠന്‍ പതുക്കെ ചോദിച്ചു
'തുളു ഭാഷയാണോ '
സുബ്ബനായിക് തലകുലുക്കി.
' ഹൗതു . ഈടെ മറാഠിയും കറാഡഭാഷയും കന്നടയും വീട്ടില്‍ പറയ്ന്നവര്ണ്ട് പക്ഷേല് ഒന്നിച്ചുകൂടിയാല് എല്ലാവരും തുളുഭാഷയേ പറിയൂ'

(എന്‍മകജെ / നോവല്‍ / അംബികാസുതന്‍ മാങ്ങാട്)

തെയ്യം,യക്ഷഗാനം,പാവകളി,തുടിനൃത്തം തുടങ്ങിയ അനുഷ്ഠാനകലകളിലും തൗളവസങ്കല്‍പ്പം പ്രകടമാണ്. പാടിപ്പതിഞ്ഞതും സര്‍വ്വസാധാരണവുമായ പഴംപാട്ടുകള്‍ മിക്കതും തുളുനാടന്‍ജനതയുടെ ജീവനസാഹചര്യങ്ങളുടെ തുറന്നുപറച്ചില്‍ കൂടിയാണ്. കൂട്ടുകുടുംബങ്ങളെപ്പോലെ കഴിഞ്ഞിരുന്ന തുളുനാട്ടിലെ ജനവിഭാഗങ്ങള്‍ കാലക്രമേണ തൊഴില്‍ക്കൂട്ടങ്ങളായതിനെ ആധാരമാക്കിയുള്ള പഴം പാട്ടാണ് ചുവടെ;

മല്ല മല്ല ഒക്കെലാക്‌ലു
പട്ടണേരെ മെഗ്ദി ബാലെലു
മഡലേരെ പല്‍ദി ബാലെലു ലേലെലേലെലാ
കഡലേര് മഡലേര് പാല് പാല് കൊണ്ടെര്
പാല് മല്‍ത്തൊണ്ടേര്
ഒഡിദാംതി ഉപ്പുനീര കഡലകണ്ട
മരകലെര് പാല് ദെത്തെര്
ചപ്പെനീര നെലകണ്ട ബാറെഗെര്
പാല് ദെത്തെര്
കരെ ബരിതചീപ നീര മരനകല
ബെംദെര് മഡലെരെഡോ...

മലയാളഭാഷ ഈ ജനതയുടെ വാമൊഴിവഴക്കങ്ങളിലേക്കും തുളുനാടന്‍ ഭാഷാഭേദങ്ങള്‍ മലയാളികളിലേക്കും പരസ്പരപൂരകമായി ചേര്‍ന്നതോടെയാണ് അതിര്‍ത്തിഗ്രാമങ്ങളിലെ സമ്മിശ്രഭാഷ ഉടലെടുത്തത്. തുളു-മലയാളം ബന്ധത്തിന്റെ ഗാഢത തിരിച്ചറിയാന്‍ വടക്കന്‍പാട്ടുകള്‍ മാത്രം മതിയാവും. തുളുനാടന്‍ കളരിയും ,തുളുനാടന്‍ കോട്ടയും ,തുളുനാടന്‍ ഗുരിക്കളും തുളുനാടന്‍ വിദ്യയും വടക്കന്‍പാട്ടുകളുടെ ജീവസ്പന്ദങ്ങളാണ്. 'അമ്പരപ്പ,അഡുക്കള,കീശാന്തി,ഓലക്കുട' തുടങ്ങി തുളുനിഘണ്ടുവില്‍ നിന്നെടുത്ത നിരവധി പദങ്ങളും പരസ്പരാദേശങ്ങളിലൂടെ സമാനപദങ്ങളായിട്ടുണ്ട്. തുളു മലയാളസംസ്‌കാരത്തിന്റെ ഭാഗമായ പൊലിപ്പാട്ടുകള്‍ രണ്ട് നാടുകളിലെയും സാംസ്‌കാരികസമാനതയുമാണ്. കാസര്‍ഗോഡും അതിര്‍ത്തിപ്രദേശങ്ങളിലുമൊക്കെ ഭാഷാഭേദങ്ങളില്‍ വൈവിധ്യങ്ങള്‍ ഒട്ടേറെയുണ്ട്. ചെറുവത്തൂരും നീലേശ്വരത്തുമുള്ള മലയാളഭാഷാഭേദങ്ങളല്ല കാഞ്ഞങ്ങാടും ബേക്കലുമുള്ളത്. ഇപ്രകാരമുള്ള വടക്കന്‍ഭാഷാഭേദങ്ങളുടെ വൈവിധ്യത്തെ തെല്ലൊന്നുമല്ല തുളുഭാഷ പരിപോഷിപ്പിച്ചിട്ടുള്ളത്. തുളുനാട്ടിലെ പല ആചാരങ്ങളും പദങ്ങളും അതിര്‍ത്തി പ്രദേശങ്ങളിലേക്കു കടന്നുകയറിയതോടെ തെക്കന്‍ മലയാളത്തില്‍ നിന്നും തീര്‍ത്തും വിഭിന്നമായൊരു ഭാഷാഭേദം രൂപപ്പെട്ടുവെന്നുവേണം പറയാന്‍. ബങ്കരമഞ്ചേശ്വരം, വൊര്‍ക്കാടി തുടങ്ങിയ അതിര്‍ത്തിപ്രദേശങ്ങളിലെ ഭാഷണമലയാളം മനസ്സിലാക്കാന്‍ പോലും പ്രയാസമാണ്. തുളു-കന്നട ഭാഷകളുടെ ആധിക്യവും അവ്യക്തമലയാളവും കൂടിച്ചേര്‍ന്ന ദുര്‍ഗ്രഹഭാഷാഭേദമായി ചിലപ്പോഴെങ്കിലും അതു മാറുന്നു.

കടപ്പാട് - മാതൃഭൂമിക്കായി മനോജ് ഭാരതി എഴുതിയ ലേഖനം. ലേഖനത്തിന്റെ യഥാര്‍ത്ഥ രൂപം ഈ ലിങ്കില്‍ വായിക്കാം...