മലയാള സിനിമയില്‍ അവാര്‍ഡുകള്‍ക്ക് യാതോരു പഞ്ഞവുമില്ല. കേരള സംസ്ഥാന സര്‍ക്കാരിന്റെ അവാര്‍ഡിനൊപ്പം, ഇപ്പോള്‍ ചാനലുകളും സംഘടനകളുമെല്ലാം വാരിക്കൊരിയാണ് അവാര്‍ഡുകള്‍ നല്‍കുന്നത്. അവാര്‍ഡ് സമ്മാനിക്കുന്നത് വമ്പിച്ച താര നിശയോടൊപ്പവും. ചാനലുകള്‍ നല്‍കുന്ന അവാര്‍ഡുകള്‍, പ്രേക്ഷകര്‍ തിരഞ്ഞെടുക്കുന്ന അവാര്‍ഡുകള്‍ എന്നാണ് അറിയപ്പെടുന്നത്. പക്ഷേ പലപ്പോഴും അവാര്‍ഡ് പ്രഖ്യാപനങ്ങള്‍ കേട്ടാല്‍ ഇങ്ങനെയും അവാര്‍ഡുകള്‍ കൊടുക്കാമോ എന്നോര്ത്ത്, മൂക്കത്തു വിരല്‍ വയ്ക്കാതെ തരവുമില്ല. ഇത്തവണ പുതുവര്‍ഷ ദിനത്തില്‍, അവാര്‍ഡ് പ്രഖ്യാപനം നടത്തി, ഏഷ്യാനെറ്റ് നമ്മെ ‘ഞെട്ടിച്ചിരിക്കുകയാണ്’. അവാര്‍ഡിന്റെ വിവരങ്ങള്‍ താഴെ ചേര്‍ക്കുന്നു: - മികച്ച നടന്‍ - മമ്മൂട്ടി (പ്രാഞ്ചിയേട്ടന്‍, കുട്ടിസ്രാങ്ക്, ബെസ്റ്റ് ആക്ടര്‍)
- മികച്ച നടി - നയന്‍താര (ബോഡിഗാര്‍ഡ്)
- ഏഷ്യാനെറ്റ് ഗോള്‍ഡന്‍ സ്റ്റാര്‍ അവാര്‍ഡ് - മോഹന്‍ലാല്‍
- ജനപ്രിയ നായകന്‍ - ദിലീപ് (ബോഡിഗാര്‍ഡ്, പാപ്പി അപ്പച്ചാ, കാര്യസ്ഥന്‍, മേരിക്കുണ്ടൊരു കുഞ്ഞാട്)
- ജനപ്രിയ നടി - മംമത് മോഹന്‍ദാസ് (കഥ തുടരുന്നു, അന്‍വര്‍)
- പ്രത്യേക ജൂറി അവാര്‍ഡ് - ശ്രീനിവാസന്‍ (ആത്മകഥ)
- യൂത്ത് ഐക്കണ്‍ - ജയസൂര്യ
- മികച്ച ചിത്രം - പ്രാഞ്ചിയേട്ടന്‍ ആന്‍ഡ് ദ സെയിന്റ്
- മികച്ച സംവിധായകന്‍ - ലാല്‍ (ഇന്‍ ഗോസ്റ്റ് ഹൌസ് ഇന്‍)
- സ്വഭാവ നടന്‍ - ഇന്നസെന്റ് (കഥ തുടരുന്നു)
- സ്വഭാവനടി - സംവൃത (കോക്ക്ടെയില്‍)
- സഹനടന്‍ - നെടുമുടി വേണു (എത്സമ്മ എന്ന ആണ്‍കുട്ടി, ബെസ്റ്റ് ആക്ടര്‍)
- സഹനടി - ലക്ഷ്മി പ്രിയ (കഥ തുടരുന്നു)
- മികച്ച വില്ലന്‍ - ആസിഫ് അലി (അപൂര്‍വ്വരാഗം)
- ഹാസ്യതാരം - സുരാജ് വെഞ്ഞാറമൂട്
- തിരക്കഥ - സത്യന്‍ അന്തിക്കാട് (കഥ തുടരുന്നു)
- ഗാനരചയിതാവ് - മുരുകന്‍ കാട്ടാക്കട (ഒരു നാള്‍ വരും)
- സംഗീത സംവിധായകന്‍ - എം.ജി.ശ്രീകുമാര്‍ (ഒരു നാള്‍ വരും)
- ഗായകന് - ഹരിഹരന്‍ (കഥ തുടരുന്നു)
- ഗായിക - ശ്രേയാ ഘോഷാല്‍ (ആഗതന്‍)
- കാമാറാമാന്‍ - വേണു (ഇന്‍ ഗോസ്റ്റ് ഹൌസ് ഇന്‍)
- എഡിര്‍ - അരുണ്‍കുമാര്‍ (കോക്ക്ടെയില്‍)
- ബാലനടന്‍ - മാസ്റ്റര്‍ അലക്‌സാണ്ടര്‍ (ടി.ഡി.ദാസന്‍ സ്റ്റാ. 6 ബി)
- ബാലനടി - ബേബി അനിഖ (കഥ തുടരുന്നു)
- പുതുമുഖ നടി - ആന്‍ അഗസ്റ്റിന്‍ (എത്സമ്മ എന്ന ആണ്‍കുട്ടി)
- താരജോഡി - കുഞ്ചാക്കോ ബോബന്‍ & അര്‍ച്ചനകവി (മമ്മീ & മീ)
- ദേശിയോദ്ഗ്രഥന ചിത്രം - കാണ്ഡഹാര്‍
ഇതൊരു വിമര്‍ശനം അല്ല, ജനങ്ങളാല്‍ നല്‍കപ്പെടുന്ന അവാര്‍ഡുകള്‍ ഇങ്ങനെ തരം താഴുന്നതു കാണുമ്പോള്‍, ഒരു പ്രേക്ഷകന്‍ അല്ല, ഒരു സാധാരണക്കാരന്‍ നടത്തുന്ന പ്രതികരണം മാത്രം... നമുക്കീ അവാര്‍ഡൊന്നു വിശകലം ചെയ്താലോ?
1. മികച്ച നടന്‍ - മമ്മൂട്ടി (പ്രാഞ്ചിയേട്ടന്‍, കുട്ടിസ്രാങ്ക്, ബെസ്റ്റ് ആക്ടര്‍)- കലാമൂല്യമുള്ള ചിത്രങ്ങളിലെ അഭിനയത്തിനാണ് മമ്മൂട്ടിക്ക് ഈ അവാര്‍ഡ്. ഒരു പക്ഷേ അദ്ദേഹത്തിന് ഈ വിഭാഗത്തില്‍ എതിരാളികളേ ഇല്ലായിരുന്നു എന്നു വേണം കരുതാന്‍.
2. മികച്ച നടി - നയന്‍താര (ബോഡിഗാര്‍ഡ്) - വളരെക്കാലത്തിനു ശേഷമാണ് നയന്‍ താര മലയാളത്തിലേക്ക് മടങ്ങി വരുന്നത്. എന്നാല്‍ അത് അവാര്‍ഡ് നല്‍കാനുള്ള കാരണമല്ല. ബോഡി ഗാര്‍ഡിലെ നയന്‍സിന്റെ പ്രകടനത്തെ വിലയിരുത്തിയാല്‍, അതിനേക്കാള്‍ മികച്ച അഭിനയം കാഴ്ച വച്ച നടിമാര്‍ ഉണ്ടെന്നു കാണാം. പുണ്യം അഹം, കോക്ക്ടെയില്‍ എന്നെ ചിത്രങ്ങളിലെ സംവൃതയുടെ പ്രകടനം നയന്‍സിന്റെ പ്രകടനത്തേക്കള്‍ മികച്ചതായിരുന്നു. സംവൃതയെ പൂര്‍ണ്ണമായും തഴഞ്ഞ് നയന്‍സിന് അവാര്‍ഡ് കൊടുത്തത്, താരനിശ ഒന്നു കൊഴുപ്പിക്കാനായിരുന്നു എന്നു തോന്നുന്നു.
3. ഏഷ്യാനെറ്റ് ഗോള്‍ഡന്‍ സ്റ്റാര്‍ അവാര്‍ഡ് - മോഹന്‍ലാല്‍ - എന്തിനാണ് ഇങ്ങനെ ഒരു അവാര്‍ഡെന്ന് എത്ര ആലോചിച്ചിട്ടും മനസ്സിലാകുന്നില്ല. മമ്മൂട്ടിക്കു മികച്ച നടനുള്ള അവാര്‍ഡ് കൊടുത്തപ്പോള്‍, എന്നാല്‍ മോഹന്‍ ലാലിനെ പിണക്കേണ്ടാ എന്നു കരുതായാണോ ആവോ ഈ ഗോള്‍ഡന്‍ സ്റ്റാര്‍ അവാര്‍ഡ് ?
4. ജനപ്രിയ നായകന്‍ - ദിലീപ് (ബോഡിഗാര്‍ഡ്, പാപ്പി അപ്പച്ചാ, കാര്യസ്ഥന്‍, മേരിക്കുണ്ടൊരു കുഞ്ഞാട്) - വേറെ ഒരു ജനപ്രിയ നായകനും മലയാളത്തില്‍ ഇല്ലല്ലൊ? മീശമാധവനിറങ്ങിയ കൊല്ലം മുതലേ പുള്ളിക്കാരനല്ലേ ജനപ്രിയന്‍?
5. ജനപ്രിയ നടി - മംമത് മോഹന്‍ദാസ് (കഥ തുടരുന്നു, അന്‍വര്‍) - ഒരു പരിധി വരെ ശരിയായ അവാര്‍ഡ്. കാരണം ഇതിന് മറ്റൊരു അവകാശിയെ കണ്ടെത്താനാവില്ല.
6. പ്രത്യേക ജൂറി അവാര്‍ഡ് - ശ്രീനിവാസന്‍ (ആത്മകഥ) - ആത്മകഥയിലെ ശ്രീനിവാസന്റെ പ്രകടനം നിരൂപ പ്രശംസ നേടിയിരുന്നു. പ്രത്യേക ജൂറി അവാര്‍ഡ് തികച്ചും ശരിയായ നിര്‍ണ്ണയമാണ്.
7. യൂത്ത് ഐക്കണ്‍ - ജയസൂര്യ - ജയസൂര്യ, താന്‍ ഒരു മികച്ച നടനാണ് എന്നു തെളിയിച്ച് കൊണ്ടിരിക്കയാണ്. കോക്ക്ടെയിലിലെയും ഫോര്‍ഫ്രണ്ടസിലേയും കഥാപാത്രങ്ങള്‍ അതു തെളിയിക്കുന്നു. പക്ഷേ യൂത്ത് ഐക്കോണ്‍ എന്ന അവാര്‍ഡ് എത്രത്തോളം അര്‍ത്ഥവത്താണെന്ന് സംശയിക്കുന്നു. ആ നടനെ പ്രോത്സാഹിപ്പിക്കാനാണെങ്കില്‍, ഒരു പ്രത്യേക ജൂറി പുരസ്കാരമായിരുന്നു നല്ലത്. ഇതിപ്പോള്‍ എന്തിനോ വേണ്ടി ഓക്കാനിക്കുന്നതു പോലെയൊരു അവാര്‍ഡായി പോയി.
8. മികച്ച ചിത്രം - പ്രാഞ്ചിയേട്ടന്‍ ആന്‍ഡ് ദ സെയിന്റ് - പ്രാഞ്ചിയേട്ടന്‍ മികച്ക ചിത്രം തന്നെ, പക്ഷേ കുട്ടിസ്രാങ്കായിരുന്നു മികച്ച ചിത്രത്തിന്റെ കുറച്ചു കൂടി ശരിയായ ചിത്രം. അവാര്‍ഡ് വാങ്ങാന്‍ ചിത്രത്തിന്റെ സംവിധായകനായ ഷാജി എന്‍ കരുണ്‍ വരുമോ എന്ന സംശയം കൂടിയാവാം പ്രാഞ്ചിയേട്ടനു ഈ അവാര്‍ഡ് കൊടുക്കാനുള്ള കാരണം.
9. മികച്ച സംവിധായകന്‍ - ലാല്‍ (ഇന്‍ ഗോസ്റ്റ് ഹൌസ് ഇന്‍) - അബദ്ധജഡിലമായ മറ്റൊരു അവാര്‍ഡ്. ഇന്‍ ഗോസ്റ്റ് ഹൌസ് ഇന്‍ എന്ന ചിത്രം ആള്‍ക്കാരെ ആനന്ദിപ്പിച്ച ചിത്രമെന്നതിനപ്പുറം, കലാമൂല്യം ഒട്ടുമില്ലാത്ത ഒരു ചിത്രമായിരുന്നു. കഴിഞ്ഞ വര്‍ഷമിറങ്ങിയ ടി.ഡി ദാസന്‍ സ്റ്റാന്‍ഡേര്‍ഡ് 6 ബി എന്ന ചിത്രത്തിന്റെ സംവിധായകനായ മോഹന്‍ രാഘവനാണ് ഈ അവാര്‍ഡിന്റെ യഥാര്‍ത്ഥ അവകാശി എന്നു തോന്നുന്നു.
10. സ്വഭാവ നടന്‍ - ഇന്നസെന്റ് (കഥ തുടരുന്നു) - കഥ തുടരുന്നു എന്ന ചിത്രത്തിലെ അഭിനയം വച്ചു മാത്രം അങ്ങനെ ഒരു വിലയിരുത്തലിലേക്ക് എത്താന്‍ കഴിയില്ല. കാരണം സത്യന്‍ അന്തിക്കാടിന്റെ ഒരു ക്ലീഷേ കഥാപാത്രം മാത്രമായിരുന്നു അത്.
11. സ്വഭാവനടി - സംവൃത (കോക്ക്ടെയില്‍) - മികച്ച നടിക്കുള്ള അവാര്‍ഡ് കൊടുക്കുന്നതിനു പകരം സ്വഭാവനടി എന്നത് ഒരു സമാശ്വാസ സമ്മാനം പോലെ തോന്നുന്നു.
12. സഹനടന്‍ - നെടുമുടി വേണു (എത്സമ്മ എന്ന ആണ്‍കുട്ടി, ബെസ്റ്റ് ആക്ടര്‍) - വളരെ നല്ല നിര്‍ണ്ണയം നെടുമുടി വേണുവിനു ലഭിച്ച വളരെ നല്ല രണ്ടു കഥാപാത്രങ്ങളായിരുന്നു എത്സമ്മയിലേതും ബെസ്റ്റ് ആക്ടറിലേതും.
13. സഹനടി - ലക്ഷ്മി പ്രിയ (കഥ തുടരുന്നു) - സത്യന്‍ അന്തിക്കാടിന്റെ മറ്റൊരു ക്ലീഷേ കഥാപാത്രത്തിനപ്പുറം, ഈ അവാര്‍ഡ് ഒട്ടും തന്നെ ഇണങ്ങുന്നില്ല. ഒരു പക്ഷേ ശ്വേതാമേനോനാവണം ഈ അവാര്‍ഡ് ലഭിക്കേണ്ടിയിരുന്നത്.
14. മികച്ച വില്ലന്‍ - ആസിഫ് അലി (അപൂര്‍വ്വരാഗം) - ഒരു പരിധി വരെ യോജിക്കുന്നു. പക്ഷേ മികച്ച വില്ലന്മാര്‍ വേറേയും ഉണ്ടായിരുന്നു.
15. ഹാസ്യതാരം - സുരാജ് വെഞ്ഞാറമൂട് - ഒട്ടും യോജിക്കാന്‍ സാധിക്കാത്ത അവാര്‍ഡ്. തിരോന്തോരം ഭാഷയും, കോപ്രായങ്ങളുമായി ചുരുങ്ങിയിരിക്കുന്നു സുരാജിന്റെ കോമഡീ, അതും പണ്ടേ പോലെ ഫലിക്കുന്നുമില്ല. എന്നിട്ടും അവാര്‍ഡ്. ഏഷ്യാനെറ്റുമായി സുരാജ് പുലര്‍ത്തുന്ന അടുത്ത ബന്ധമാകും ഈ അവാര്‍ഡിനു പിന്നില്‍.
16. തിരക്കഥ - സത്യന്‍ അന്തിക്കാട് (കഥ തുടരുന്നു) - സ്ഥിരം പാറ്റേണില്‍ ചിത്രങ്ങള്‍ ചെയ്യുന്ന സത്യന്‍ അന്തിക്കാട്, വ്യത്യസ്തതയാര്‍ന്ന ഒരു ചിത്രം ചെയ്തിട്ടു വര്‍ഷങ്ങളായി. രസതന്ത്രം മുതലിങ്ങോട്ടുള്ളുള്ള ചിത്രങ്ങളോന്നും തന്നെ സത്യന്‍ അന്തിക്കാട് ചിത്രങ്ങളെന്ന തോന്നലുളവാക്കിയിട്ടില്ല. കഥ തുടരുന്നുവും വ്യത്യസ്തമല്ല. ബൂലോകത്തെ ഒരു നിരൂപകന്‍ എഴുതിയ വാക്കുകള്‍ കടം കൊണ്ടാല്‍, ‘ഇപ്പോഴും പഴയ പച്ചക്കറിക്കടയും തുറന്നു വച്ചാണ് സത്യന്‍ അന്തിക്കാടിരിക്കുന്നത്.’ ഈ അവാര്‍ഡ് സത്യന്‍ അന്തിക്കാടിനു നല്‍കേണ്ടതല്ല. അത് ടി.ഡി ദാസന്‍ സ്റ്റാന്‍ഡേര്‍ഡ് 6 ബി എന്ന ചിത്രത്തിന്റെ തിരക്കഥാകൃത്തായ മോഹന്‍ രാഘവനാണ് കൊടുക്കേണ്ടിയിരുന്നത്.
17. ഗാനരചയിതാവ് - മുരുകന്‍ കാട്ടാക്കട (ഒരു നാള്‍ വരും) - ഈ ചിത്രത്തിലെ ഒരൊറ്റ ഗാനം പോലും ആകര്‍ഷകമായിരുന്നില്ല. അതില്‍ വരികളുടെ പ്രാധാന്യം എടുത്തു കാണിക്കാനുമില്ല. വയലാര്‍ ശരത്ചന്ദ്ര വര്‍മ്മയും, അനില്‍ പനച്ചൂരാനും, സന്തോഷ് വര്‍മ്മയും, നമ്മെ വിട്ടു പോയ ഗിരീഷ് പുത്തഞ്ചേരിയും ഇതിലും നല്ല ഗാനങ്ങള്‍ നമുക്കായി രചിച്ചിട്ടുണ്ട് പോയ വര്‍ഷം. പിന്നെ എന്തിനായിരുന്നു ഈ അവാര്‍ഡ്? ഏഷ്യാനെറ്റിനു മാത്രമറിയാം.
18. സംഗീത സംവിധായകന്‍ - എം.ജി.ശ്രീകുമാര്‍ (ഒരു നാള്‍ വരും) - ജനകീയ അവാര്‍ഡെന്നു പറഞ്ഞു മനുഷ്യനെ കളിയാക്കുന്നത് ഇങ്ങനെ അവാര്‍ഡ് കൊടുത്താണ്. വര്‍ഷങ്ങളായി ഏഷ്യാനെറ്റിന്റെ സന്തത സഹചാരിയാണ് എം.ജി ശ്രീകുമാര്‍. ഏഷ്യാനെറ്റിന്റെ റിയാലിറ്റി ഷോകളിലും, സംഗീത പരിപാടികളിലും വര്‍ഷങ്ങളായി നിറഞ്ഞു നില്‍ക്കുകയാണദ്ദേഹം. അദ്ദേഹത്തിനെ സുഖിപ്പിക്കാനായിട്ടാണെന്നു തോന്നുന്നു ഈ അവാര്‍ഡ്. ഒരു എളിയ സംഗീതാസ്വാദകനെന്ന നിലയില്‍ പറഞ്ഞാല്‍, എം.ജയചന്ദ്രനെയോ, ഇളയരാജയെ മറികടക്കാനുള്ള സംഗീത സംവിധാനമൊന്നും, എം.ജി.ശ്രീകുമാര്‍ ഒരു നാള്‍ വരും എന്ന ചിത്രത്തില്‍ നടത്തിയിട്ടില്ല. മുന്‍ വര്‍ഷത്തില്‍ അദ്ദേഹത്തിന് മികച്ച ഗായകനുള്ള അവാര്‍ഡ് ഏഷ്യാനെറ്റ് നല്‍കിയിരുന്നു. അന്നും നല്ല ഗാനങ്ങള്‍ ആ‍ലപിച്ചവരെ മറികടന്നായിരുന്നു അവാര്‍ഡ്. ഇത്തരം സുഖിപ്പീര് അവാര്‍ഡുകള്‍, ജനകീയ അവാര്‍ഡുകളുടെ വില തന്നെ കളയും എന്നതില്‍ സംശയമില്ല.
19. ഗായകന് - ഹരിഹരന്‍ (കഥ തുടരുന്നു) - ആരോ പാടുന്നു ദൂരെ എന്ന ഗാനമാണ് ഹരിഹരനെ ഈ അവാര്‍ഡിന് അര്‍ഹമാക്കിയിരിക്കുന്നത്. നല്ലതു തന്നെ, പക്ഷേ ഈ വര്‍ഷം നിരവധി നല്ല ഗാനങ്ങള്‍ പാടിയ വിജയ് യേശുദാസിനൊ, കാര്‍ത്തിക്കിനോ ഈ അവാര്‍ഡ് കൊടുക്കാമായിരുന്നു.
20. ഗായിക - ശ്രേയാ ഘോഷാല്‍ (ആഗതന്‍) - ഗോമ്പറ്റീഷന്‍ ഇല്ലാത്ത വിഭാഗമായിരുന്നു ഇത് എന്നു തോന്നുന്നു. അവാര്‍ഡ് ശ്രേയക്കു തന്നെ. മറുവാക്കില്ല..
21. കാമാറാമാന്‍ - വേണു (ഇന്‍ ഗോസ്റ്റ് ഹൌസ് ഇന്‍) - ഇന്‍ ഗോസ്റ്റ് ഹൌസ് ഇന്‍ എന്ന ചിത്രം പ്രേക്ഷകരെ ആകര്‍ഷിക്കാനുള്ള പ്രധാന കാരണം വേണുവിന്റെ ഛായാഗ്രഹണമാണ്. പക്ഷേ അവാര്‍ഡ് ലഭിക്കുവാന്‍ തക്ക വണ്ണം മികവ് അതിനുണ്ടോ എന്നു ചിന്തിക്കേണ്ടിയിരിക്കുന്നു. ആഗതന്‍, ബെസ്റ്റ് ആക്ടര്‍, അപൂര്‍വ്വരാഗം എന്നീ ചിത്രങ്ങളുടെ ഛായാഗ്രഹണം നിര്‍വഹിച്ച അജയന്‍ വിന്‍സന്റ് കാണിച്ചിരിക്കുന്ന മികവിന്റെ അടുത്തെങ്ങും എത്തില്ല വേണുവിന്റെ ഛായാഗ്രഹണം എന്നാണ് എന്റെ അഭിപ്രായം.
22. എഡിറ്റര്‍ - അരുണ്‍കുമാര്‍ (കോക്ക്ടെയില്‍) - ഒരു സംവിധായകന്‍ എഡിറ്ററാകുക എന്നത് കോക്ക്ടെയില്‍ എന്ന ചിത്രത്തിലൂടെയാവും മലയാളത്തില്‍ ആദ്യമായി സംഭവിക്കുന്നത്. അത് ആ ചിത്രത്തെ എത്രത്തോളം സഹായിച്ചിട്ടുണ്ടെന്നു പറഞ്ഞറിയിക്കുവാന്‍ സാധിക്കുകയില്ല. 100 ശതമാനം യോജിക്കാവുന്ന അവാര്‍ഡാണ് ഇത്.
23. ബാലനടന്‍ - മാസ്റ്റര്‍ അലക്‌സാണ്ടര്‍ (ടി.ഡി.ദാസന്‍ സ്റ്റാ. 6 ബി) - വീണ്ടും 100 ശതമാനം യോജിക്കാവുന്ന അവാര്‍ഡ്. മറ്റൊരു ബാലതാരം ഉണ്ടെന്നു തോന്നുന്നില്ല ഈ അവാര്‍ഡിനു അര്‍ഹനാകാന്‍.
24. ബാലനടി - ബേബി അനിഖ (കഥ തുടരുന്നു) - ബാലനടന്റെ കാര്യത്തില്‍ പറഞ്ഞതു തന്നെ ഇവിടേയും പറയാവുന്നതാണ്.
25. പുതുമുഖ നടി - ആന്‍ അഗസ്റ്റിന്‍ (എത്സമ്മ എന്ന ആണ്‍കുട്ടി) - എത്സമ്മയുടെ വിജയമാണ് ആനിന് ഈ അവാര്‍ഡ് നേടിക്കൊടുത്തത്. എന്നാല്‍ അഭിനയത്തില്‍ ഇനിയും വളരെയധികം മുന്നോട്ടു പോകേണ്ടിയിരിക്കുന്നു ആന്‍. അതിനു കഴിയുമെന്നാണ് തോന്നുന്നത്.
26. താരജോഡി - കുഞ്ചാക്കോ ബോബന്‍ & അര്‍ച്ചനകവി (മമ്മീ & മീ) - താരജോഡി എന്ന അവാര്‍ഡ് നിര്‍ണ്ണയിച്ചവര്‍ മമ്മീ & മീ എന്ന ചിത്രം കാണാതെയാണോ ഇതു തീരുമാനിച്ചത് എന്നു തോന്നിപോകുന്നു. കാരണം ചിത്രത്തിലൊരിക്കല്‍ പോലും കുഞ്ചാക്കോ ബോബനും അര്‍ച്ചനാ കവിയും താരജോഡികളാണെന്നു തോന്നുന്നില്ല. രണ്ടു പേരും രണ്ടു ലോകത്തില്‍ ജീവിക്കുന്ന കഥാപാത്രങ്ങള്‍. അവരെ പിടിച്ചു താരജോഡികളാക്കിയ ഏഷ്യാനെറ്റിന്റെ കഴിവ് അപാരം തന്നെ...
27. ദേശിയോദ്ഗ്രഥന ചിത്രം - കാണ്ഡഹാര്‍ - ഇത് മറ്റൊരു സമാശ്വാസ സമ്മാനമാണെന്നു തോന്നുന്നു. ദേശിയോദ്ഗ്രഥനമെന്നാല്‍ തീവ്രവാദികളെ വെടിവെച്ചിടുന്നതാണെന്ന അഭിപ്രായമാണ് ഏഷ്യാനെറ്റിനെന്നു തോന്നുന്നു, കാരണം മേജര്‍ രവി എപ്പോള്‍ പടമെടുത്താലും, അതിനു ദേശിയോദ്ഗ്രഥനത്തിനത്തിനുള്ള അവാര്‍ഡ് റിസര്‍വ്വ് ചെയ്തു വയ്ക്കും. ഈ പടത്തിന് അവാര്‍ഡ് കൊടുത്താല്‍ ചുളുവില്‍ ബച്ചനെ താരനിശയ്ക്കു കൊണ്ടു വരാം എന്നതായിരിക്കും ഇതിലെ ഏഷ്യാനെറ്റിന്റെ ബുദ്ധി. ഒരു കൊള്ളാം നടക്കട്ടേ..
ഏഷ്യാനെറ്റിലെ പരിപാടികള്‍ പോലെ തന്നെ, പ്രഹസനമാകുന്നു അവര്‍ നല്‍കുന്ന അവാര്‍ഡും. ലാലേട്ടന്റെ ഭാഷയില്‍ പറഞ്ഞാല്‍ അവര്‍ അവരുടെ നിലവാരം കാണിച്ചുവെന്നേയുള്ളൂ എന്നും പറയാം. ആദ്യകാലങ്ങളില്‍ അവാര്‍ഡെന്നാല്‍ കഴിവിനു ലഭിക്കുന്ന അംഗീകാരമായിരുന്നു, കഴിവിലേക്കുള്ള ചൂണ്ടുപലകയായിരുന്നു. ഓരോ അവാര്‍ഡിനേയും വലിയ ആദരവോടെയാണ് കാലാകാരന്മാരും, പ്രേക്ഷകരും കണ്ടിരുന്നത്. അതു കൊണ്ടു തന്നെ ഒരു അവാര്‍ഡു ലഭിക്കുക എന്നാല്‍ അതിനെ വളരെ വലിയ ഒരു അംഗീകാരമായിട്ടായിരുന്നു കണ്ടിരുന്നത്. എന്നാല്‍ ഇത്തരം പ്രഹസനങ്ങള്‍ അവാര്‍ഡിന്റെ മൂല്യമിടിക്കുമെന്നതില്‍ തര്‍ക്കമില്ല. വാണീജ്യ താല്പര്യങ്ങളുടെ പേരില്‍ ഇങ്ങനെ അവാര്‍ഡുകള്‍ നല്‍കിയാല്‍ ഭാവിയില്‍ അവാര്‍ഡുകള്‍ക്കേ വിലയില്ലാതാവും. അതു കൊണ്ടു ഈ അവസരത്തില്‍ എനിക്ക് ഏഷ്യാനെറ്റിനോട് അഭ്യര്‍ത്ഥിക്കാനുള്ളത്, ഇത്തരം പ്രഹസനങ്ങള്‍ അവസാനിപ്പിക്കണം. അവാര്‍ഡു കൊടുക്കണമെങ്കില്‍, അത് അതിന്റെ യഥാര്‍ത്ഥ ഉടമയെ കണ്ടെത്തി ഏല്‍പ്പിക്കണം, അപ്പോഴേ അതിനു മൂല്യമുണ്ടാകൂ...
.jpg)
