ലാലിസം വിവാദമാകുമ്പോൾ..

35 ആം ദേശീയ ഗെയിംസ് തിരുവനന്തപുരത്ത് കൊടിയേറിയപ്പോൾ ഇന്ത്യയിലെ ഏറ്റവും വലിയ കായിക മാമാങ്കത്തിന് മാത്രമല്ല, ഒരു പിടി വിവാദങ്ങൾക്ക് കൂടിയാണ് അതിനൊപ്പം തുടക്കം കുറിച്ചത്. മാസങ്ങൾക്ക് മുന്നേ തന്നെ അഴിമതി ആരോപണങ്ങളിൽ കുടുങ്ങിയ സംഘാടകർ ഒരുക്കിയ ഉദ്ഘാടന പരിപാടിയിലെ കല്ലുകടിയായിരുന്നു ലാലിസം. മാസങ്ങൾക്ക് മുന്നേ തന്നെ മോഹൻ ലാൽ ഒരു മ്യൂസിക് ബാൻഡ് തുടങ്ങുന്നുവെന്നും സംഗീത സംവിധായകൻ രതീഷ്‌ വേഗയുമായി സഹകരിച്ചാണ് ഇത്തരം ഒരു സംരംഭത്തിനു തുടക്കം കുറിക്കുന്നതെന്നും മാധ്യമങ്ങളിൽ വാർത്തകൾ വന്നിരുന്നു. ദേശീയ ഗെയിംസിന്റെ ഉദ്ഘാടനത്തോടനുബന്ധിച്ച് ലാലിസം എന്ന് പേരുള്ള ഈ ബാൻഡിന്റെ ആദ്യ പെർഫോർമൻസ് നടക്കും എന്ന വാർത്ത പുറത്ത് വന്നപ്പോൾ, വാനോളം പ്രതീക്ഷകളായിരുന്നു മോഹൻലാലിന്റെ ആരാധകർക്ക്. എന്നാൽ ഉദ്ഘാടന ദിവസം എല്ലാം കൈവിട്ടു പോകുന്ന ഒരു കാഴച്ചയാണ് നാമെല്ലാം കണ്ടത്. വ്യത്യസ്തമായി അവതരിപ്പിക്കാനുള്ള ശ്രമം അവരുടെ ഭാഗത്ത് നിന്നുണ്ടായെങ്കിലും, പലവുരു പിഴവുകൾ കൊണ്ട് റെക്കോർഡ് ചെയ്ത പാട്ടുകൾക്ക് ചുണ്ടനക്കുക എന്ന അധര വ്യായാമം മാത്രമായിരുന്നു അവരുടെ പ്രകടനം എന്ന് ജനങ്ങൾ തിരിച്ചറിഞ്ഞു. അദ്ദേഹത്തിന്റെ പരിപാടി തീരുന്നതിനു മുന്നേ തന്നെ കാണികൾ ഒഴിഞ്ഞു പോയതും ആ പരിപാടിയുടെ ശോഭ കെടുത്തി. ഈ പ്രോഗ്രാമിന്റെ പരാജയം സോഷ്യൽ മീഡിയയിൽ വലിയൊരു ചർച്ചക്ക് കളമൊരുക്കുകയാണ് ചെയ്തത്. കെട്ടടങ്ങി എന്ന് കരുതിയ 2 കോടിയുടെ വിവാദം ഉടൻ തന്നെ തലപൊക്കുകയും ലാലിസത്തെ തലനാരിഴ കീറി വിശകലം ചെയ്ത് വിമർശനത്തിന്റെ പരകോടിയിൽ നിൽക്കുന്ന അഭിപ്രായ പ്രകടനങ്ങളാണ് പിന്നീട് നാം കണ്ടത്. സോഷ്യൽ മീഡിയയിൽ വിവാദങ്ങൾ കത്തി നിൽക്കുമ്പോൾ ലാലിസം ബാൻഡ് പിരിച്ചു വിട്ടതായി ചില മാധ്യമങ്ങൾ റിപ്പോർട്ട് ചെയ്യുകയും രതീഷ്‌ വേഗ അത് നിഷേധിച്ചു കൊണ്ട് കടന്നു വരികയും ചെയ്തിരുന്നു. സോഷ്യൽ മീഡിയയിലെ വിവാദങ്ങൾ കത്തിപ്പടരുമ്പോൾ തന്നെ കലാ-സാംസ്കാരിക രംഗത്ത് കാര്യമായ ഒരു ചർച്ച പരസ്യമായി ഉണ്ടായില്ല എന്ന് തന്നെ പറയാം, എന്നാൽ പാലക്കാട് ശ്രീറാം ലാലിസത്തെ വിമർശിച്ച് മുന്നോട്ട് വന്നതോടെ, പല ഭാഗങ്ങളിൽ നിന്നും വിമർശനങ്ങൾ ഉയർന്നു തുടങ്ങി. രാഷ്ട്രീയക്കാരും അതിലേക്ക് കടന്നതോടെ വിമർശങ്ങൾ ചെറിയ തോതിലെങ്കിലും വ്യക്തിഹത്യയിലേക്ക് നീങ്ങി.

ഇതെഴുതുന്ന അവസരത്തിൽ മോഹൻലാൽ പണം തിരികെ നൽകാമെന്ന് സർക്കാരിനെ അറിയിക്കുകയും, അത് തിരിച്ചു വാങ്ങാൻ കഴിയില്ല എന്ന് സർക്കാർ അറിയിക്കുകയും ചെയ്തു കഴിഞ്ഞു. ഈ വിവാദത്തിന്റെ ഭാവി എന്ത് എന്ന് പ്രവചിക്കാൻ കഴിയില്ല. ഒരു പക്ഷേ ഒരു വിവാദത്തിനപ്പുറം നമ്മളോ, സോഷ്യൽ മീഡിയയോ, മാധ്യമങ്ങളോ ചർച്ച ചെയ്യപ്പെടാതെ  പോയ കുറെ അധികം വശങ്ങൾ ഇതിനുണ്ടായിട്ടുണ്ട്. ഒരു ന്യൂനപക്ഷമെങ്കിലും അത് ഉയർത്തി കൊണ്ടു വരുവാൻ ശ്രമിച്ചിരുന്നെങ്കിലും പ്രസ്താവനകളുടെയും ചെളിവാരിയെറിയലിന്റെയും കുത്തൊഴുക്കിൽ അതാരും ശ്രദ്ധിക്കപ്പെടാതെ പോയി എന്ന് വേണം കരുതാൻ. അതിലേക്ക് വിരൽ ചൂണ്ടുവാനുള്ള ഒരു എളിയ ശ്രമം മാത്രമാണിത്.

ലാലിസം പാളിയതെവിടെ?

ലാലിസം എന്ന ബാൻഡിനു രണ്ടു കോടി രൂപ പ്രതിഫലം വാങ്ങുന്നു എന്ന വാർത്ത പുറത്ത് വന്നതോടെ ആദ്യം പ്രതിഷേധവുമായി എത്തിയത് സംവിധായകൻ വിനയനായിരുന്നു. സൂപ്പർ താരങ്ങളോട് സന്ധിയില്ലാ സമരം പ്രഖ്യാപിച്ചിരിക്കുന്ന അദ്ദേഹത്തിന്റെ ആരോപണം പ്രത്യക്ഷത്തിൽ സത്യവുമായിരുന്നു. ദേശീയ ഗെയിംസിന്റെ പ്രചരണ പരിപാടികളിൽ സച്ചിൻ ടെണ്ടൂൽക്കർ പ്രതിഫലം വാങ്ങാതെ പങ്കെടുക്കുമ്പോൾ ലാൽ 2 കോടി വാങ്ങുന്നതിലെ അനൗചിത്യമാണ് അദ്ദേഹം ചൂണ്ടിക്കാട്ടിയത്. ആ വിമർശനത്തിലെ യുക്തി നമുക്ക് മനസ്സിലാക്കാമെങ്കിലും, ലാൽ മാത്രമല്ല, ഇന്ത്യയിലെ തന്നെ പല ഗായകരും അതിൽ പങ്കെടുക്കുന്നുവെന്നും അവരുടെ പ്രതിഫലവുംപരിപാടിയുടെ തയ്യാറെടുപ്പുകൾക്കുമായാണ് രണ്ടു കോടിയെന്നും വിശദീകരണം വന്നപ്പോൾ, അത് പൊതുവെ സ്വീകാര്യമാകുന്ന ഒന്നായി. ഒരാഴ്ചയിലധികം നീണ്ട റിഹേഴ്സലിനൊടുവിൽ ലാലിസം തട്ടിൽ കയറിയപ്പോൾ അമ്പേ പാളി എന്ന് പറയാം. പ്രഗത്ഭാരായ പലരും പിന്നണിയിൽ പ്രവർത്തിച്ചുവെങ്കിലും അവതരണത്തിൽ ഒരു തരത്തിലും പുതുമ പകരുവാൻ പരിപാടിക്ക് കഴിഞ്ഞില്ല. മുന്നേ തന്നെ റെക്കോർഡ് ചെയ്ത പാട്ടുകൾ, പോസിറ്റീവ് ട്രാക്കിട്ട് പ്ലേ ചെയ്ത ശേഷം വരികൾക്കനുസരിച്ച് ചുണ്ടനക്കുക മാത്രമാണ് ചെയ്തത്. പരിശീലത്തിന്റെ കുറവ് കൊണ്ടോ അതോ ആസൂത്രണത്തിലെ പിഴവ് കൊണ്ടോ, ലിപ് സിങ്കിങ്ങ് ഗാനപരിപാടി ഗംഭീരമായി തന്നെ പാളി. പലപ്പോഴും പാട്ട് തുടങ്ങിട്ടും അതൊന്നുമറിയാതെ നിൽക്കുന്ന മോഹൻലാലിനെയും, മറ്റ് ചില അവസരങ്ങളിൽ പാട്ട് തീർന്നിട്ടും പാടിക്കൊണ്ടിരിക്കുന്ന മോഹൻലാലിനെയും നാം കണ്ടു. ലാലിസത്തിന്റെ ഭാഗമായി പങ്കെടുത്ത മറ്റ് ഗായകർക്കാവട്ടെ കാര്യമായ റോൾ ഒന്നും ഉണ്ടായിരുന്നില്ല. പേരിനു മാത്രമായി ഒന്നോ രണ്ടോ പാട്ടുകൾ പാടി, ചുണ്ടനക്കൽ പരിപാടിയിൽ തങ്ങൾക്കുള്ള റോൾ ഭംഗിയായി നിർവഹിച്ചു. ഒരു ബാൻഡിന്റെ പ്രകടനം കാണാനെത്തിയവർക്ക് റെക്കോർഡ് ചെയ്ത് വേദിയിൽ അവതരിപ്പിച്ച ഒരു ബാലെ പോലെയായിരുന്നു ലാലിസം. വമ്പിച്ച ജനാവലിക്ക് മുന്നിൽ അവതരിപ്പിക്കാൻ തുടങ്ങിയ പരിപാടി തീരാറായപ്പോഴേക്കും കാണികൾ ഭൂരിഭാഗവും കൊഴിഞ്ഞു പോയ അവസ്ഥയിലുമായിരുന്നു. വളരെ ഗംഭീരമായി തുടക്കം കുറിക്കേണ്ട ഒരു ബാൻഡ്, ഒന്നുമല്ലാതെ അവസാനിക്കുന്ന കാഴ്ചയാണ് നാം കണ്ടത്.

കലയുടെ മൂല്യമെന്ത്?

'കലയ്ക്ക് നമുക്കൊരു വിലയിടാനാവില്ല' എന്ന് നമ്മുടെ കായിക മന്ത്രി പറയുകയുണ്ടായി. ലാലിസമെന്ന ബാൻഡിനു 2 കോടി രൂപ പ്രതിഫലമായി നൽകുന്നു എന്ന വിവാദം പൊട്ടിപ്പുറപ്പെട്ട അവസരത്തിൽ നടത്തിയ പത്രസമ്മേളനത്തിലാണ് മന്ത്രി ഈ കാര്യം മാധ്യമങ്ങളോട് പറഞ്ഞത്. മന്ത്രി പറഞ്ഞത് വലിയൊരു തത്വമാണെങ്കിലും ഈ കാലഘട്ടത്തിൽ എല്ലാത്തിനും ഒരു വില നിശ്ചയിക്കപ്പെട്ടിട്ടുണ്ട്. ഒരു സിനിമ കാണണമെങ്കിൽ അതിനൊരു നിശ്ചിത തുക നിശ്ചയിച്ചിട്ടുണ്ട്. സിനിമയിൽ അഭിനയിക്കുന്ന നടീ-നടന്മാർക്ക്, അതിലെ അണിയറ പ്രവർത്തകർക്ക് എല്ലാം ഒരു പ്രതിഫലം നിശ്ചയിചിട്ടുണ്ട്. അത് പോലെ തന്നെയാണ് ഒരു ഒരു ബാൻഡും അവരുടെ സമയത്തിന്, അവരുടെ പ്രകടനത്തിന് ഒരു മൂല്യം അവർ തന്നെ നിർണ്ണയിക്കുകയും സംഘാടകർ അത് നൽകുവാൻ ബാധ്യസ്ഥരാകുകയും ചെയ്യും. ലാലിസത്തിനു 2 കോടി എന്നത് മോഹൻലാൽ അദ്ദേഹത്തിന്റെ സമയത്തിനും പ്രതിഭയുടെ മൂല്യത്തിനുമിട്ട വിലയാകാം. ഗെയിംസിന്റെ സംഘാടകർ അദ്ദേഹവുമായി പറഞ്ഞുറപ്പിച്ച തുകയാണത്. ഇനി ഗെയിംസ് സംഘാടകർ മറ്റു ചില കലാകാരന്മാർക്ക് നൽകിയ തുക നമുക്കൊന്ന് പരിശോധിക്കാം. മട്ടന്നൂർ ശങ്കരങ്കുട്ടി ആശാനും അദ്ദേഹത്തിന്റെ നൂറോളം വരുന്ന വാദ്യമേളക്കാർക്കും പ്രതിഫലമായി നൽകിയത് 5.5 ലക്ഷം രൂപയാണ്. പോണ്ടിച്ചേരിയിൽ നിന്നുള്ള തവിൽ വാദ്യ വിദഗ്ദ്ധനായ കരുണാമൂർത്തിയുടെ നേതൃത്വത്തിലുള്ള സംഘത്തിനു പ്രതിഫലമായി നിശ്ചയിക്കപ്പെട്ടത് 2.10 ലക്ഷം രൂപ മാത്രമാണ്. ശോഭനയുടെ നൃത്തസംഘത്തിനും (40 പേർ) ഓർക്കസ്ട്രക്കുമായി നിശ്ചയിക്കപ്പെട്ട പ്രതിഫലം 25 ലക്ഷം രൂപ. കുഞ്ഞാലിമരയ്ക്കാർ എന്ന പരിപാടിക്കായി സംഗീതമൊരുക്കിയ സംഗീത സംവിധായകൻ ശരത്തിന്റെ പ്രതിഫലം, എല്ലാ ചിലവുകളുമടക്കം 12 ലക്ഷം രൂപ.  സംഘാടന സമിതിയിൽ കോഴിക്കോട് അംഗമായിരുന്ന ഗായകൻ വി.ടി മുരളിക്ക്‌ കോഴിക്കോടിന്റെ പാരമ്പര്യം നിറയുന്ന സംഗീത പരിപാടി അവതരിപ്പിക്കുവാൻ അനുവദിച്ച തുക വെറും 20000 രൂപ മാത്രം. കലയ്ക്ക്‌ മൂല്യം നിശ്ചയിക്കാനാവില്ല എന്ന തത്വം പറയാമെങ്കിലും മോഹൻലാലിന്റെ പ്രൊഫഷണൽ പോലുമല്ലാത്ത ബാൻഡിനു, അതും ആദ്യമായി തട്ടിൽ കയറുന്ന ബാൻഡിനു 1.8 കോടി രൂപ പ്രതിഫലമായി നിശ്ചയിക്കപ്പെട്ടപ്പോൾ മറ്റുള്ള കലാകാരന്മാർക്ക് പ്രതിഫലമായി നൽകിയത് തുലോം തുച്ഛമായ സംഖ്യയാണെന്ന് പറയാതെ വയ്യ. കലാ സാംസ്കാരിക രംഗത്ത് നിന്നും പ്രതിഷേധവുമായി മുന്നിട്ടു വന്നവർ ഉയർത്തിയ പ്രധാന വാദഗതി ഈ പ്രതിഫലത്തിലെ വൈരുധ്യമാണ്.  ലാലിസത്തിനു പ്രതിഫലം നിശ്ചയിക്കുന്ന അവസരത്തിൽ അത് മോഹൻലാലും ബാൻഡിന്റെ ഭാഗമായ മറ്റു ചില ഗായകരും മാത്രമാണ് ഇതിൽ ഉണ്ടായിരുന്നത്. പ്രതിഫലത്തെ ചൊല്ലി വിവാദമുയർന്നപ്പോഴാണ് ഹരിഹരൻ, കാർത്തിക്, എം ജി ശ്രീകുമാർ, സുജാത തുടങ്ങിയ ഗായകരെ ഇതിൽ ഉൾപ്പെടുത്തിയത്. അവർക്ക് നാമമാത്രമായ ഗാനങ്ങൾ നൽകി, ഭൂരിഭാഗം പാട്ടുകളും പാടിയത് ലാൽ തന്നെയായിരുന്നു. അതിൽ പങ്കെടുത്ത വിവിധ ഗായകർക്കും അവർക്കുള്ള മറ്റു സൗകര്യങ്ങൾക്കുമായി 2 കോടി രൂപ ആവശ്യമായി വരും എന്ന് പറഞ്ഞത്തിലെ യുക്തിരാഹിത്യം അവരുടെ പ്രകടനത്തിൽ നിന്ന് തന്നെ വെളിവായി എന്ന് വേണം കരുതാൻ. ഒരു നടന്റെ ബാൻഡിനെ ലോഞ്ച് ചെയ്യാൻ പൊതുജനങ്ങളുടെ പണം മുടക്കി അവസരം ഉണ്ടാക്കണമായിരുന്നോ എന്നൊരു ചോദ്യം കൂടി അവിടെ അവശേഷിപ്പിക്കുന്നു ഈ വിവാദങ്ങൾ.

ലാലിസത്തെ പ്രതിരോധിച്ചാൽ...

ഏകദേശം 27 വർഷത്തെ ഇടവേളക്ക് ശേഷമാണ് ദേശീയ ഗെയിംസ് കേരളത്തിൽ എത്തുന്നത്.  അതിനു വേണ്ട സംവിധാനങ്ങൾ ഒരുക്കുന്നതിൽ പരാജയപ്പെട്ടു എന്ന് പഴി കേൾക്കുന്ന അവസരത്തിലാണ് സംഘാടകർ ലാലിസത്തെ ഉദ്ഘാടനത്തിലേക്ക് കൊണ്ടു വരുന്നത്. എ ആർ രഹ്മാനെയായിരുന്നു അവർ ആദ്യം ഉദ്ദേശിച്ചിരുന്നതെന്നും അദ്ദേഹത്തിന്റെ പ്രതിഫലം താങ്ങാൻ വയ്യത്തതിനാൽ മോഹൻലാലിനോട് ഇതിൽ പങ്കെടുക്കാൻ ആവശ്യപ്പെടുകയായിരുന്നു. ലാലിസം എന്ന ബാൻഡിനെ കുറിച്ചുള്ള  വാർത്തകൾ പുറത്ത് വന്നിട്ട് കുറച്ചു നാളുകൾ ആയി എങ്കിലും ഈ ഒരു പ്രോഗ്രാമിന് വേണ്ടിയാകണം ആദ്യമായി അവർ റിഹേഴ്സൽ ചെയ്തിട്ടുണ്ടാകുക. കുറഞ്ഞ സമയത്തിൽ തട്ടിക്കൂട്ടിയെടുത്ത ഒരു പ്രോഗ്രാം തന്നെയാണിത് എന്ന് വ്യക്തം. ഇന്നത്തെ പല ഗാനമേളകളും പോലെ പാട്ടുകൾ റെക്കോർഡ് ചെയ്ത്, സ്റ്റേജിൽ പോസ്റ്റീവ് ട്രാക്ക് തന്നെ പ്ലേ ചെയ്ത് ചുണ്ടനക്കുക എന്ന വഴി തന്നെയാണ് അവരും സ്വീകരിച്ചത്. പലപ്പോഴും കാണികൾ അറിയുന്നില്ലെങ്കിലും, കേരളത്തിലെ ഒട്ടുമിക്ക ഗായകരും അവലംബിക്കുന്ന ഒരു രീതിയാണിത്. അവർക്കതിൽ വിജയിക്കാൻ കഴിയുന്നു എന്നിടത്താണ് ഗാനമേളയുടെ വിജയം. പഴയകാലത്ത് ഓർക്കസ്ട്രയുടെ അഭാവത്തിൽ, ഗാനമേളകളിൽ മൈനസ് ട്രാക്കിട്ട് പാട്ടുകൾ പാടിയിരുന്നു. ഇന്നത് സാങ്കേതികത വളർന്നതിനാൽ പോസിറ്റീവ് ട്രാക്ക് തന്നെ ഇട്ട് അധരവ്യായാമം നടത്തുന്ന പ്രവണതയാണ് കൂടുതലും. പല റിയാലിറ്റി ഷോകളിൽ വരെ ഇത് സംഭവിക്കുന്നു എന്ന് പാലക്കാട് ശ്രീറാം വെളുപ്പെടുത്തിയത് നമുക്ക് മുന്നിൽ നിൽക്കുന്നു. കുറഞ്ഞ സമയത്തിനുള്ളിൽ പരിപാടികൾ ആസൂത്രണം ചെയ്ത് നടത്തിയത്തിലെ പിഴവുകളാണ് ഈ പരിപാടി പരാജയപ്പെടാനുള്ള കാരണം എന്നാണ് ഞാൻ കരുതുന്നത്. തന്റെ ബാൻഡിന്റെ ആദ്യ പെർഫോർമൻസിനു അദ്ദേഹം തിരഞ്ഞെടുത്ത വേദി തെറ്റായി പോയി എന്ന് തോന്നുന്നു. ഇതൊരു പൊതു പരിപാടിയായിരുന്നു, അത്തരം ഒരു വേദി തന്റെ ബാൻഡ് തുടക്കം കുറിക്കാൻ അനുയോജ്യമാണോ എന്നൊരു സംശയമുണ്ട്, പ്രത്യേകിച്ചും ആസൂത്രണത്തിലും ആവിഷ്കാരത്തിലും പല തരം ന്യൂനതകളെ മറികടന്നാണ് തങ്ങൾ ഈ പരിപാടി അവതരിപ്പിച്ചത് എന്ന് രതീഷ്‌ വേഗ തന്നെ സമ്മതിക്കുമ്പോൾ. അവർക്ക് 100 ശതമാനം സ്വാതന്ത്ര്യത്തോടെ ആസൂത്രണം നടത്തി കൂടുതൽ ആത്മവിശ്വാസത്തോടെ നടത്താൻ കഴിയുന്ന ഒരു വേദി, അതായിരുന്നു ഉചിതമായ ഒരു വേദി. ആ തിരഞ്ഞെടുപ്പിലെ വീഴ്ചയും ആ പരാജയത്തിന്റെ ആക്കം കൂട്ടി എന്ന് നിസ്സംശയം പറയാം.

ലാലിസമായിരുന്നോ ഉചിതം?

ബാൻഡുകൾക്ക് ഒരു പഞ്ഞവുമില്ലാത്ത ഒരു നാടാണ് കേരളം. അവിയൽ, തൈക്കുടം ബ്രിഡ്ജ്, ആഗം, മദർ ജെയിൻ തുടങ്ങി ജനപ്രീതി ആർജ്ജിച്ച ഒട്ടേറെ ബാൻഡുകൾ നമുക്കുണ്ട്. പല വേദികളിലായി നിരവധി ലൈവ് പ്രോഗ്രാമുകൾ അവതരിപ്പിക്കുകയും വിജയിപ്പിക്കുകയും ചെയ്ത ബാൻഡുകളാണവ.  ഒരു പക്ഷേ അവർക്ക് ലഭിക്കേണ്ടിയിരുന്ന ഒരു അവസരമായിരുന്നു ലാലിസത്തിനു ലഭിച്ചത് എന്ന് കൂടി പറയാം. മോഹൻലാൽ എന്ന നടന്റെ താരമൂല്യം കൊണ്ടാകാം ലാലിസത്തിനു നറുക്ക് വീണത്, പക്ഷേ ഇതിനേക്കാൾ നല്ലൊരു പ്രകടനം കാഴ്ചവയ്ക്കുവാൻ ആ ബാൻഡുകൾക്ക് കഴിയുമായിരുന്നു എന്നത് ഒരു വസ്തുതയായി അവശേഷിക്കുന്നു.  ദേശീയ ഗെയിംസ് ആയതിനാൽ നമ്മുടെ രാജ്യത്തിന്റെ വിവിധ ഭാഗത്ത് നിന്നുള്ള കലാകാരന്മാരെ ഉൾപ്പെടുത്തിയുള്ള കലാരൂപങ്ങൾ അവതരിപ്പിക്കുവാനുള്ള ഒരു ശ്രമം സംഘാടകരുടെ ഭാഗത്ത് നിന്നുമുണ്ടായില്ല. തനി കേരളീയമായ പരിപാടികൾ മാത്രമാണുണ്ടായിരുന്നത് എന്ന വിമർശനവും ഉയർന്നു കേൾക്കുന്നു.

മോഹൻലാൽ ഒരു മികച്ച നടൻ, പക്ഷേ ബാൻഡ്...?

കഴിഞ്ഞ 36 വർഷമായി മലയാള സിനിമയിൽ നിറഞ്ഞു നിൽക്കുന്ന നടന വൈഭവം അതാണ്‌ മോഹൻലാൽ. പല പല വേഷങ്ങളിൽ, ഭാവങ്ങളിൽ നമ്മെ ചിരിപ്പിക്കുകയും ചിന്തിപ്പിക്കുകയും, കരയിക്കുകയും ഒക്കെ ചെയ്ത നടൻ. രണ്ട് ദേശീയ പുരസ്കാരം, ഒട്ടനവധി സംസ്ഥാന പുരസ്കാരങ്ങൾ, പത്മശ്രീ, അദ്ദേഹത്തെ തേടിയെത്താത്ത ആദരങ്ങൾ ചുരുക്കം. ഒരു നടൻ എന്ന നിലയിൽ മലയാളികൾ അദ്ദേഹത്തെ ആദരിക്കുകയും സ്നേഹിക്കുകയും ചെയ്യുന്നു. ചില സിനിമകളിൽ അദ്ദേഹം പാടിയിട്ടുമുണ്ട്. ലാലിസത്തിൽ അദ്ദേഹത്തിന്റെ പങ്കാളിയായ രതീഷ്‌ വേഗ ഈണം പകർന്ന ആറ്റുമണൽ പായയിൽ എന്ന ഗാനം കൊച്ചു കുട്ടികൾ വരെ ഏറ്റുപാടിയതുമാണ്. പക്ഷേ ഒരു പ്രൊഫഷണൽ ബാൻഡ് തുടങ്ങുക, അതിലെ പ്രധാന ഗായകനായി താൻ തന്നെ മാറുക എന്നത് എത്രത്തോളം യുക്തിപരമായ തീരുമാനമാണെന്ന് ഇപ്പോഴെങ്കിലും അദ്ദേഹം ചിന്തിക്കുന്നുവെങ്കിൽ നല്ലത് എന്ന് ഞാൻ കരുതുന്നു. ആ ബാൻഡിനു ലാലിസം എന്ന പേരിട്ടത് തന്നെ ആത്മരതിപരമായ ഒരു മനോഭാവത്തിന്റെ ദൃഷ്ടാന്തമായി വേണം കരുതാൻ. സംഗീതത്തെ കുറിച്ച് പറയുവാൻ ഞാൻ ആളല്ല, എന്നിരുന്നാലും ഒരു സിനിമക്ക് വേണ്ടി, സംഗീത സംവിധായകന്റെ നിർദ്ദേശത്തിൽ മ്യൂസിക് കണ്‍സോളിൽ നിന്ന് പാടുന്നതു പോലെയല്ല ഒരു വേദിയിൽ ലൈവായി പാടുന്നത്. കൊടികെട്ടിയ ഗായകർ വരെ സമ്മതിച്ചു തരുന്ന ലളിതമായൊരു സത്യമാണത്. പണ്ടത്തെ പോലെ ഓർക്കസ്ട്രക്കൊപ്പം ലൈവ് പാടി പാട്ടുകൾ റിക്കോർഡ് ചെയ്യുന്ന സംവിധാനം മണ്‍മറഞ്ഞിട്ട് വർഷങ്ങളാകുന്നു. കണ്‍സോളിൽ ഗാനത്തിന്റെ ഒരോ ഭാഗങ്ങളും പഞ്ച് ചെയ്തെടുത്ത് മിക്സ്‌ ചെയ്താണ് നാമിന്നു കേൾക്കുന്ന ഗാനങ്ങൾ നമുക്ക് മുന്നിൽ എത്തുന്നത്. ഫാൻസിനു ദഹിക്കുമെങ്കിലും സംഗീത പ്രേമികളെ ആനന്ദിപ്പിക്കുന്ന ഒന്നല്ല അദ്ദേഹത്തിന്റെ ഗാനങ്ങൾ. അത് കൊണ്ടു തന്നെ മോഹൻലാൽ ഒരു ബാൻഡ് തുടങ്ങുന്നു എന്ന വാർത്ത കേട്ടപ്പോൾ മനസ്സിലേക്ക് ഓടിയെത്തിയ ആശങ്കയും അത് തന്നെയായിരുന്നു.

വിമർശനങ്ങൾക്കു പിന്നിൽ...

ലാലിസത്തിന്റെ ആദ്യ പ്രകടനം പ്രേക്ഷകരെ നിരാശപ്പെടുത്തി എന്നത് സത്യം. ആരാധകരെ വരെ മുഷിപ്പിച്ചു അതെന്ന് പ്രതികരണങ്ങൾ വ്യക്തമാക്കുന്നു. കലാ സാംസ്കാരിക രംഗത്തുള്ളവർ ഈ വിവാദത്തിലേക്ക് കടക്കാതെ മാറി നിന്നപ്പോൾ, ഗായകൻ വി ടി മുരളിയും പാലക്കാട് ശ്രീരാമുമാണ് വിമർശനങ്ങളുമായി ആദ്യം കടന്നു വന്നത്. പക്ഷേ ആ ഊർജ്ജം സംഭരിച്ച് മോഹൻലാലിനെതിരെ ആഞ്ഞടിച്ചത് ചില രാഷ്ട്രീയക്കാരായിരുന്നു. ചാനലുകൾക്ക് നൽകിയ അഭിമുഖങ്ങളിലും ചാനൽ ചർച്ചയിലും മോഹൻലാലിനെതിരെ ഒളിഞ്ഞും തെളിഞ്ഞും അവർ അമ്പെയ്യുന്നത് നമ്മൾ കണ്ടതാണ്. ലാലിസത്തിന് മാത്രമല്ല, അതിനു മുന്നേ അവതരിപ്പിച്ച കുഞ്ഞാലി മരയ്ക്കാർ അനുസ്മരണ പരിപാടിക്കും നിലവാരമില്ലയിരുന്നുവെന്നും ചിലർ ചാനൽ ചർച്ചയിൽ വാശിയോടെ വാദിക്കുന്നത് കണ്ടു. ഭരണ പക്ഷത്ത് നിന്നവർ മന്ത്രിമാരെയും സംഘാടകരേയും സംരക്ഷിച്ചു കൊണ്ട് മോഹൻലാലിനെ ഒറ്റപ്പെടുത്തി ആക്രമിക്കുവാനാണ് ശ്രമിച്ചത്. പ്രതിപക്ഷമോ കിട്ടിയ അവസരം മുതലാക്കി രാഷ്ട്രീയമായ വിരോധം തീർക്കുകയാണ് ചെയ്തത്. പക്ഷേ ഇതിലെല്ലാം അന്തർലീനമായ ഒരു വസ്തുത ലാലിസത്തിന്റെ പേരിൽ അദ്ദേഹത്തെ താറടിക്കുന്നുവെങ്കിലും, യഥാർഥ കാരണം മറ്റൊന്നാണെന്നതാണ്. ദി കംപ്ലീറ്റ്‌ ആക്ടർ എന്ന സൈറ്റിലെ ബ്ലോഗിലൂടെ മോഹൻലാൽ സ്ഥിരമായി ആരാധകരുമായി സംവദിക്കുന്നുണ്ട്. കഴിഞ്ഞ കുറച്ചു കാലമായി അദ്ദേഹത്തിന്റെ വാക്കുകൾ പലതും കുത്തി നോവിച്ചത് ഇവിടെ വികസനത്തിന്റെ സാരഥികളായി സ്വയം വാഴ്ത്തുകയും എന്നാൽ നാടിനു വേണ്ടി കാര്യമായൊന്നും ചെയ്യാതെ അധികാര ദുർവിനയോഗം ചെയ്യുന്ന ചില രാഷ്ട്രീയക്കാരെയാണ്. അദ്ദേഹത്തിന്റെ വാക്കുകളുടെ മൂർച്ഛ കൊണ്ട് അദ്ദേഹത്തിന്റെ ബ്ലോഗുകൾ പലതും ചർച്ചയായിരുന്നു.  അദ്ദേഹം ഫോർ എ ബെറ്റർ ടുമോറോ എന്ന തലക്കെട്ടിൽ അന്റാർട്ടിക്കയിൽ നിന്നുമെഴുതിയ ലേഖനം അവയിലൊന്നായിരുന്നു. മാധ്യമങ്ങളും നവ മാധ്യമങ്ങളും അത് ഉയർത്തിക്കാട്ടി നമ്മുടെ രാഷ്ട്രീയക്കാരെ പ്രതിക്കൂട്ടിലാക്കുകയും ചെയ്തിരുന്നു. അധ്യാപക ദിനത്തിൽ പ്രധാനമന്ത്രി കുട്ടികളോടായി പറഞ്ഞ വാക്കുകളെ പ്രകീർത്തിച്ചെഴുതിയ ബ്ലോഗും രാഷ്ട്രീയക്കാരെ ചൊടിപ്പിച്ചു എന്ന് കണ്ടതാണ്. തനിക്ക് വിവിധ സ്ഥാനമാനങ്ങൾ നേടാനായി മോഹൻലാൽ എന്ന 'നായർ' നടത്തുന്ന പ്രീണനമാണത് എന്ന് ഒരു യുവ എം എൽ എ തന്റെ ഫേസ്ബുക്കിൽ കുറിച്ചതും നാം കണ്ടു. ഇങ്ങനെ പലതരത്തിൽ അഭിമാനം വൃണപ്പെട്ട് നിന്നവർ ഒരവസരം കിട്ടിയപ്പോൾ ഒന്നിച്ചൊന്നായി വളഞ്ഞിട്ട് ലാലിനെ ആക്രമിക്കുവാൻ കിട്ടിയ സമയം നന്നായി ഉപയോഗപ്പെടുത്തി എന്ന് വേണം കരുതാൻ. സർക്കാരിന്റെ പണം മോഹൻലാൽ അടിച്ചു മാറ്റി എന്നൊരു വികാരം സൃഷ്ടിക്കുന്നതിൽ അവർ വിജയിച്ചു എന്ന് ഞാൻ വിശ്വസിക്കുന്നു. അത് വഴി ഇനി ലാലിന്റെ ഭാഗത്ത് നിന്ന് ഇനിയുണ്ടാകുന്ന വിമർശനങ്ങളെ ഒരു മറുവാദത്തിലൂടെ പ്രതിരോധിക്കാൻ കഴിയുമെന്ന ഒരു തന്ത്രം. സന്ദേശം സിനിമയിൽ ശങ്കരാടി ഉപദേശിക്കുന്ന അതേ രാഷ്ട്രീയ കുബുദ്ധി. ഈ ആരോപണങ്ങൾ അദ്ദേഹത്തെ സ്പർശിക്കും എന്ന് ഞാൻ കരുതുന്നില്ല. എന്നാൽ ഇത്തരം ആരോപണങ്ങൾ അദ്ദേഹത്തെ നോവിച്ചിട്ടുണ്ടാകാം. തനിക്ക് ചിലവായ പണം ഒരു ചെക്കിലൂടെ മടക്കി നൽകി ആ ഉദ്യമത്തെ മുളയിലെ നുള്ളിയിരിക്കുകയാണ് മോഹൻലാൽ. അഴിമതിയും സ്വജനപക്ഷപാതവും നടത്തിയിട്ടും കോഴ വാങ്ങിയിട്ടും ഒരുളുപ്പുമില്ലാതെ മന്ത്രിക്കസേരയിലിരുന്ന് നമ്മെ ഭരിക്കുന്ന അഴിമതി വീരന്മാരുടെയും ചാനലുകളിൽ വന്നിരുന്ന് ലാലിസത്തെ കുറിച്ച് ഘോരഘോരം പ്രസ്ഥാവനകൾ നടത്തിയ അവരുടെ ഇറാൻമൂളികളുടേയും മുഖത്തേക്കാണ് താങ്കൾ ആ പണം പിച്ചക്കാശു പോലെ എറിഞ്ഞു കൊടുത്തത്. ആ ആർജ്ജവത്തെ,  അഭിനന്ദിക്കാതെ വയ്യ. അതിനൊരു സല്യൂട്ട്.

സോഷ്യൽ മീഡിയയിൽ തിളങ്ങിയ ലോലിസം

എന്തിനും ഏതിനും അഭിപ്രായം പ്രകടിപ്പിക്കുവാൻ നമുക്ക് ലഭിച്ച ഒരു വേദിയാണ് നവമാധ്യമങ്ങൾ. ഇത്തരം ഒരു വേദിയുടെ അഭാവത്തിൽ, കാമ്പസുകളിൽ ഈ ആശയങ്ങൾ പരസ്പരം പങ്കു വച്ചിരുന്ന ഒരു യുവ തലമുറ നമുക്കുണ്ടായിരുന്നു. എന്നാൽ നവമാധ്യമങ്ങളുടെ രംഗപ്രവേശത്തോടെ 'വിർച്വൽ' ആയെങ്കിലും പ്രതികരിക്കുവാൻ ആളുകൾക്ക് കഴിയുന്നു എന്ന് മനസ്സിലാക്കാം. പക്ഷേ അഭിപ്രായ പ്രകടനങ്ങൾക്കും വിമർശനങ്ങൾക്കുമപ്പുറം വ്യക്തിഹത്യയിലേക്കും ശബ്ദതാരവലിയിൽ പോലുമില്ലാത്ത പദങ്ങളിലൂടെ ആളുകളെ, പ്രത്യേകിച്ചും  സെലിബ്രിട്ടികളേയും ആക്ഷേപിക്കുകയും അധിക്ഷേപിക്കുകയും ചെയ്യൂന്ന ഒരു പ്രവണത നാം കണ്ടിട്ടുണ്ട്. സച്ചിനെ അറിയില്ല എന്ന് പറഞ്ഞ ഷറപ്പോവക്കു ലഭിച്ച പ്രതികരണവും മോഹൻലാലിന്റെ സൈറ്റ് ഹാക്ക് ചെയ്തതിനെ തുടർന്ന് പാക്കിസ്ഥാൻ ആർമിയുടെ ഫേസ്ബുക്ക് പേജിൽ നടത്തിയ കോലാഹലങ്ങളുമെല്ലാം നാം കണ്ടതാണ്. ലാലിസത്തെയും നവമാധ്യമങ്ങൾ വെറുതെ വിട്ടില്ല എന്ന് പറയാം. ലാലിസം ദൂരദർശനിൽ സംപ്രേക്ഷണം ചെയ്തു തുടങ്ങിയതു മുതൽ ഫേസ്ബുക്കിലും ട്വിറ്റരിലും അതിനെക്കുറിച്ചുള്ള കമന്റുകൾ വന്നു തുടങ്ങിയിരുന്നു. പരിപാടി ഒരു പരാജയത്തിലേക്ക് കൂപ്പു കുത്തിയതോടെ വിമർശനങ്ങൾ എല്ലാ പരിധികളും ലംഘിച്ചു മുന്നേറി. കഴിഞ്ഞ 36 വർഷമായി അഭ്രപാളികളിൽ നമ്മെ വിസ്മയിപ്പിച്ച ഒരു നടനെന്ന പരിഗണന പോലുമില്ലാതെയാണ് പല വിമർശനങ്ങളും ഉയർന്നു വന്നത്. സൂപ്പർ താരങ്ങളുടെ ഫാൻസ്‌ തമ്മിലുള്ള മത്സരം എന്നാൽ അധോലോക രാജാക്കന്മാർക്കിടയിലുള്ള കുടിപ്പകയേക്കാൾ രൂക്ഷമാണ്. വർഷങ്ങളായി തുടരുന്ന ഈ നിഴൽയുദ്ധത്തിലെ അവസാന കണ്ണിയായി ലാലിസത്തെ കുറിച്ചുള്ള വിമർശനങ്ങൾ. ഒരു സൂപ്പർസ്റ്റാറിന്റെ വീഴ്ച മറ്റേ സൂപ്പർ സ്റ്റാറിന്റെ ഫാൻസ്‌ നന്നായി ആസ്വദിച്ചു. ട്രോളെന്ന പേരിൽ ഫേസ്ബുക്കിലും വാട്ട്സാപ്പിലും പടച്ചു വിട്ട തമാശകൾ പലപ്പോഴും എല്ലാ സീമകളും ലംഘിച്ചവയായിരുന്നു. സാധാരണ ഇത്തരം കാര്യങ്ങളിൽ മുന്നിട്ടിറങ്ങുന്ന മോഹൻലാൽ ഫാൻസ്‌ ഇത്തവണ ഒന്നും ചെയ്യാനാകാതെ, ഒരു ന്യായീകരണവും പറയാനില്ലാതെ വിഷണ്ണരായി നിൽക്കുന്ന കാഴ്ചയും കണ്ടു. മോഹൻലാലിന്റെ കത്ത് പുറത്ത് വരുന്നത് വരെ ഈ കോലാഹലങ്ങൾ തുടർന്നു. മോഹൻലാൽ എന്ന അഭിനയ പ്രതിഭയെ മറന്നു കൊണ്ട് നടത്തിയ ഇത്തരം പ്രചാരണങ്ങൾ അപ്പോഴെങ്കിലും കെട്ടടങ്ങിയതിൽ നമുക്ക് ആശ്വസിക്കാം. ഒരു പക്ഷേ ഇത്തരം ഒരു പ്രതികരണം മോഹൻലാൽ ഒരിക്കലും പ്രതീക്ഷിച്ചിട്ടുണ്ടാവില്ല. അദ്ദേഹത്തിന്റെ കത്തിൽ നിന്നും അത് വ്യക്തമാണ്. സോഷ്യൽ മീഡിയയിൽ എന്തിനും ഏതിനും പടവാളെടുക്കുന്ന പ്രവണത നാം മാറ്റേണ്ടതില്ലേ എന്ന ചോദ്യം സ്വയം വിമർശനാത്മകമായി ചോദിക്കുവാൻ ഞാൻ ഈ അവസരം വിനയോഗിക്കുന്നു.

സോഷ്യൽ മീഡിയയിലെ ചില പ്രതികരണങ്ങൾ താഴെ ചേർക്കുന്നു.

Y do u need mohanlal to lipsync his own songs? And national games? #Lalisom y do it mohanlal?#Mohanlal #Lalisom #Lolisom
— Chaitanya (@chait2310) February 2, 2015

പരിപാടി കാണാത്തവർ കൂടി വന്നു കളിയാക്കിയിട്ടു പോണ് #lolisom #Lalisom
— പിഷാരടിയുടെ കുട്ടുകാ (@premnabil) February 1, 2015

ലാലേട്ടാ ഇതല്ല ലാലിസം താങ്കള്‍ അങ്ങ്‌ അഭിനയിച്ച്‌ വിസ്മയിപിച്ച കഥാപാത്രങ്ങളിൽ ഞങ്ങൾ കണ്ടതാണു ലാലിസം.
— ജെയിംസ് ബോണ്ട്™ (@bond_alive) February 1, 2015

ഇതിലും സൂപ്പർ നമ്മടെ Avial, Vidwan, Thaikudam Bridge, Mother Jane -ഉഗളുടെ ഒരു collaboration ആയിരനു. #NationalGames #Lolisom
— poLarOids (@nummadekochi) January 31, 2015

അതിർത്തിയിലെ നുഴഞ്ഞുകയറ്റക്കാരെ പാടി ഓടിക്കാൻ ലഫ്റ്റനന്റ്‌ കേണൽ മോഹൻലാലിന്റെ ലാലിസം ബാന്റിനെ സർക്കാർ ചുമതലപ്പെടുത്തി.
— Nauphal (@Nauphal) January 31, 2015

ലാലിസം ഒരു ബോറിസം...
— അശ്വതി (@Ash_AR_Speaks) January 31, 2015

Always love you Laletta. But #Lalisom band shouldn't have ever made. Having said that , no matter in trying. So, #Respect .
— Hisham (@hishh) February 2, 2015

The ferocious Mohanlal fans have taken a real hiding after #Lalisom. 48 hours and still dead mute :( Mammootty fans having a field day, btw.
— Anish Sahadevan (@scorpiosaurus) February 2, 2015

കുട്ടി കാര്യവട്ടം കാര്യവട്ടം എന്ന് കേട്ടിട്ടുണ്ടോ?അവിടെ തിങ്ങിനിറഞ്ഞ അമ്പതിനായിരത്തോളം ജനങ്ങളെ ഒറ്റ പാട്ടുകൊണ്ടോഴിപ്പിച്ചവനാ ഞാൻ #lalisom
— khaleelRM (@khaleelRM) February 1, 2015

Why mohanlal uses the show for his band promotion? National media is watching and he sings like some antakshari game.#lalisom
— Nomadic Indian (@epvarunkumar) January 31, 2015

ഉദിത് നാരായണ്‍റ്റെ മൈക്ക് പിടുത്തം കണ്ടാലേ അറിയാരുന്നു അയാൾ പാടുന്നില്ലാന്ന്! So Pathetic #Lalisom
— Renjith (@MrCo_OL) January 31, 2015

രതീഷ്‌ വേഗം പറയൂ രണ്ടു കോടി എന്ത് ചെയ്തു? #lalisom
— ബാലേട്ടന്‍ (@bal_ettan) January 29, 2015

ലാലിസം ബാൻ്റിനെ ഇനി പള്ളിപ്പെരുന്നാളിൻ്റെ പ്രദക്ഷിണത്തിനു കൊട്ടുന്ന ബാൻ്റുസെറ്റിൻ്റെ കൂടെപോലും നിർത്താൻ കൊള്ളൂല്ല.. അവരൊക്കെ പൊളപ്പനാ
— കാഞ്ഞിരപളളി അച്ചായൻ (@Achayan_here) February 2, 2015

ലാലിസം മുഴുവനായിരുന്നു കണ്ട ഏതോ കായികതാരം ഹൃദയാഘാതം വന്ന് മരിച്ചുവത്രേ....
— സ്വാമി ട്വിറ്ററാനന്ദ (@fannaforu) February 2, 2015

എന്തൊക്ക ആയിരുന്നു രണ്ട് കോടി,മുപ്പത്തഞ്ച് വര്‍ഷം ,മ്യൂസിക് ട്രൂപ്പ് ,ലാലിസം അവസാനം ഘരാനാ മാജിക് പീക്കോക്ക്  ശവമായി.
— രാജകണ്ണ് (@deve_dee) January 31, 2015

ഫസ്റ്റ് ഇമ്പ്രെഷൻ ഈസ്‌ ദി ബെസ്റ്റ് ഇമ്പ്രഷൻ തിയറി നോക്കിയാൽ ലാലിസം ബാൻഡിന്റെ കാര്യം പോക്കാണ് .
— ചാത്തൻ (@chathan_) January 31, 2015

Meanwhile somewhere in Kerala Sreenivasan is already planning the script for the next Saroj Kumar movie. #Lolisom #Lalism #Lalisom
— Vineeth K.E (@kevnuker) February 2, 2015

ലാലിസത്തെ സംബന്ധിച്ച വിവാദങ്ങൾ കെട്ടടങ്ങി എന്ന് കരുതുന്നു. മോഹൻലാൽ തിരിച്ചു നൽകിയ പണം സർക്കാർ സ്വീകരിച്ച് ഈ വിവാദം ഇനി മുന്നോട്ട് കൊണ്ടു പോകാതിരിക്കട്ടെ എന്ന്പ്രാർഥിക്കാം. ഒരു പക്ഷേ മാധ്യമങ്ങളും ഫാൻസും ചേർന്നു സൃഷ്ടിച്ച ഒരു ഹൈപ്പ്, അത് ലാലിസത്തെ വളർത്തുന്നതിലുപരി തളർത്തുന്നതിനാണ് കാരണമായത്. മോഹൻലാൽ എന്ന നടനെ ഇഷ്ടപ്പെടുന്ന എനിക്ക്, വ്യക്തിപരമായി ആ ബാൻഡിനോടുള്ള വിയോജിപ്പ് ഞാൻ മുന്നേ എഴുതി കഴിഞ്ഞു. പക്ഷേ അത് അദ്ദേഹത്തിന്റെ സ്വാതന്ത്യമാണ്. അദ്ദേഹത്തിന്റെ ഭാഗത്ത് നിന്നുമുണ്ടായ പിഴവുകൾ അദ്ദേഹം തിരുത്തും എന്ന് ഞാൻ കരുതുന്നു. ഇനി ഈ ബാൻഡുമായി മുന്നോട്ട് പോകുന്നുവെങ്കിൽ, വ്യക്തമായ ഒരു പദ്ധതിയോടെ, ആസൂത്രണത്തോടെ, അതിലുപരി പാളിച്ച പറ്റാത്ത ഒരാവിഷ്കാരത്തോടെ അത് തിരികെ വരും എന്ന് കരുതാം. കലാകാരന്മാർ പൊതുവെ അങ്ങനെയാണ്, സമൂഹം അവരെ എഴുതി തള്ളുന്ന അവസരത്തിൽ ഒരു ഫീനിക്സ് പക്ഷിയെ പോലെ തിരികെ വരുവാൻ അവർക്ക് കഴിയും. അതാണ്‌ കലയുടെ ശക്തി, കലാകാരന്റെ ധൈര്യം. മോഹൻലാലും അതിൽ നിന്ന് വിഭിന്നനല്ല എന്ന് ഞാൻ വിശ്വസിക്കുന്നു. എല്ലാ വിധ ആശംസകളും!

കടപ്പാടുകൾ
ഫോട്ടോ: ലാലിസം - ഒഫീഷ്യൽ ഫേസ്ബുക്ക് പേജ്
ആർ ടി ഐ ഡോക്യുമെന്റ്സ് - ദി ന്യൂസ് മിനിട്ട്
വീഡിയോ - യൂട്യൂബ് അക്കൗണ്ട് ബാലു കൃഷ്ണ
ലിങ്കുകൾ - മോഹൻലാൽ ബ്ലോഗ്, മനോരമ ചാനൽ
ട്വീറ്റുകൾ - ട്വിറ്റരിൽ ലാലിസത്തെ തുടർന്നു വന്ന ട്വീറ്റുകൾ.

ഗിരീഷ് പുത്തഞ്ചേരിയെ ഓര്‍ക്കുമ്പോള്‍....

ഒരു വര്‍ഷം മുന്നെ, കഴിഞ്ഞ ഫെബ്രുവരി 10ന്  നമുക്കു മുന്നിലേക്ക് ഗിരീഷ് പുത്തഞ്ചേരിയുടെ മരണവാര്‍ത്ത ന്യൂസ് ചാനലുകളില്‍ ബ്രേക്കിങ് ന്യൂസായാണ് കടന്നു വന്നത്. ഒരു പക്ഷേ മലയാള സിനിമാഗാന ശാഖയെ സ്നേഹിക്കുന്നവര്‍ക്ക്, അത് ബ്രേക്കിങ് ന്യൂസിനേക്കാള്‍ ഒരു ഷോക്കിങ് ന്യൂസായിരുന്നു. മഹാനായ ആ കവി നമ്മെ വിട്ടു പോയിട്ട് ഇന്ന്‍ ഒരു വര്‍ഷം തികയുകയാണ്. അദ്ദേഹത്തെ മലയാളികള്‍ക്കു പരിചയപ്പെടുത്തേണ്ട കാര്യമില്ല. വയലാറും ശ്രീകുമാരന്‍ തമ്പിയും ഓ.എന്‍.വിയും അടക്കി വാണിരുന്ന മലയാള ഗാനരചനാ ശാഖയിലേക്ക്‌ ഒരു സുപ്രഭാതത്തില്‍ മനസ്സില്‍ നിറയെ കവിതയും ജീവിതാനുഭവങ്ങളുമായി ഒരു കടന്നു വന്ന ചെറുപ്പക്കാരനായിരുന്നു ഗിരീഷ്‌ പുത്തഞ്ചേരി. ഭാവ സാന്ദ്രമായ ഗാനങ്ങളെഴുതി മലയാളികളുടെ മനസ്സില്‍ സ്ഥാനം പിടിക്കുവാന്‍‍, ഗിരീഷ് പിന്നെ അധിക സമയമെടുത്തില്ല. ചകവാളത്തിനപ്പുറം എന്ന ചിത്രത്തിലെ ഗാനങ്ങള്‍ക്ക് വരികളൊരുക്കിയാണ് ഗിരീഷ് പുത്തഞ്ചേരി സിനിമാഗാന രചനയിലേക്ക് കടന്നു വന്നത്. അതിനു മുന്നെ ആകാശവാണിയുടെ വിവിധ നിലയങ്ങള്‍ക്കായി ലളിതഗാനങ്ങളും, എച്ച്.എം.വി., തരംഗിണി തുടങ്ങിയ റെക്കോഡിങ് കമ്പനികള്‍ക്കുവേണ്ടിയും ടെലിവിഷന്‍ ചാനലുകള്‍ക്കുവേണ്ടിയും ഗാനങ്ങള്‍ എഴുതിയിരുന്നു. എന്നാല്‍ ജോണിവാക്കര്‍ എന്ന ചിത്രത്തിലെ ഗാനങ്ങളാണ് ഗിരീഷിന്റെ കരിയറിലെ വഴിത്തിരിവായത്. അതു ഹിറ്റായതോടെ ഗിരീഷ് മലയാള സിനിമയുടെ ഭാഗമായി മാറുകയായിരുന്നു. പിന്നീട് ഹിറ്റു ഗാനങ്ങളുടെ ഒരു പരമ്പര തന്നെ സൃഷ്ടിച്ചു കൊണ്ടായിരുന്നു ഗിരീഷ് മലയാളികളുടെ മനസ്സിലേക്ക് നടന്നു കയറിയത്. രവീന്ദ്രന്‍ മാഷിനൊപ്പവും, വിദ്യാസാഗറിനൊപ്പവും, എം.ജയചന്ദ്രനൊപ്പവുമാണ് ഗിരീഷ് ഏറ്റവും കൂടുതല്‍ ഹിറ്റുകള്‍ സൃഷ്ടിച്ചിട്ടുള്ളത്. അദ്ദേഹത്തിന്റെ മരണശേഷം പുറത്തിറങ്ങിയ ശിക്കാര്‍ എന്ന ചിത്രത്തിലെ ഗാനങ്ങളും മലയാളികളെ തെല്ലൊന്നുമല്ല ആകര്‍ഷിച്ചത്.

ഉപജീവന മാര്‍ഗ്ഗത്തിനായി സിനിമാഗാനങ്ങളെഴുതുവാന്‍ വരികയും, പിന്നീട്, അദ്ദേഹം മലയാള സിനിമയുടെ തന്നെ അവിഭാജ്യ ഘടകമായി മാറി. അദ്ദേഹത്തിന്റെ മരണ ശേഷം, വളരെയധികം ഗാനരചയിതാക്കള്‍ കടന്നു വന്നുവെങ്കിലും, അവരൊന്നും ഗിരീഷിന് പകരം വയ്ക്കാന്‍ കഴിയില്ല എന്ന സത്യം വേദനയോടെ നാം തിരിച്ചറിയുന്നു. സ്വന്തം ജീവിതാനുഭവങ്ങളുടെ വെളിച്ചത്തില്‍ വരികളൊരുക്കുകയാണ് ഗിരീഷ് ചെയ്തിട്ടുള്ളത്. കഥയെയും, കഥാപാത്രങ്ങളേയും അടുത്തറിയുകയും, തന്നെ കഥാപാത്രത്തിന്റെ സ്ഥാനത്തു നിര്‍ത്തി, കാവ്യ ഭംഗി നഷ്ടപ്പെടാതെ, ട്യൂണുകള്‍ക്കൊപ്പിച്ച് വരികളെഴുതുവാന്‍ ഗിരീഷിനുണ്ടായിരുന്നു പ്രാവീണ്യം പുതിയ തലമുറയിലെ ഗാനരചയിതാക്കള്‍ക്കുണ്ടോ എന്നു സംശയിക്കേണ്ടിയിരുന്നു. അവിടെയാണ് അദ്ദേഹം വ്യത്യസ്തനാവുന്നതും, അദ്ദേഹത്തിന്റെ വിടവാങ്ങള്‍ നമുക്ക് വല്ലത്ത ഒരു ശൂന്യത സമ്മാനിക്കുന്നതും... ഗിരീഷ് പുത്തഞ്ചേരി മരിക്കുന്നില്ല... അദ്ദേഹത്തിന്റെ വരികളിലൂടെ എന്നും മലയാളികളുടെ മനസ്സില്‍ അദ്ദേഹം ജീവിക്കും, അനശ്വരനായി....

ഈ പോസ്റ്റിലെ കാര്‍ട്ടൂണ്‍ ഞാന്‍ കടം കൊണ്ടതാണ്. ഇതു വരച്ച ശ്രീ.ജെ.കാരപ്പറമ്പലിന് എന്റെ ഹൃദയം നിറഞ്ഞ നന്ദി ഞാന്‍ ഈ സമയത്ത അറിയിക്കുന്നു.

ഇതാ മറ്റൊരു പ്രഹസ്സനം.....

ഏഷ്യനെറ്റില്‍ സംപ്രേക്ഷണം ചെയ്തു വന്ന ഐഡിയാ സ്റ്റാര്‍ സിംഗര്‍ സീസണ്‍ 4ന്റെ വിജയിയായി ജോബിജോണിനെ തിരഞ്ഞെടുത്തു.തിരുവന്തപുരത്ത് ഞായാറാഴ്ച നടന്ന മെഗഷോയില്‍ ശരത്, എം.ജി. ശ്രീകുമാര്‍, കെ.എസ്. ചിത്ര, എന്നീ സ്ഥിരം ജൂറി അംഗങ്ങളും ഫൈനലിലെ പ്രത്യേക ജഡ്ജുമായ എസ്.പി. ബാലസുബ്രഹ്മണ്യം തുടങ്ങിയവര്‍ ചേര്‍ന്നാണ് വിജയികളെ തിരെഞ്ഞെടുത്തത് .ഇത് കൂടാതെ പ്രേക്ഷകരുടെ എസ് എം എസ്സും വിജയിയെ നിര്‍ണയിക്കുന്നതില്‍ പ്രധാന പങ്ക് വഹിച്ചിരുന്നു .കോഴിക്കൊട് സ്വദേശിയായ ജോബി ജോണിന് ഒരു കോടി രൂപ വിലയുള്ള വില്ലയാണ് സമ്മാനമായി ലഭിച്ചത്. പാലക്കാട്ടുനിന്നുള്ള ശ്രീനാഥ് രണ്ടാംസ്ഥാനാം നേടിയപ്പോള്‍ മുംബൈയില്‍ നിന്നുള്ള പ്രീതിവാര്യര്‍ മൂന്നാം സ്ഥാനവും കോട്ടയത്തുനിന്നുള്ള അഞ്ജുജോസഫ് നാലാം സ്ഥാനവും നേടി ചെന്നൈയില്‍ നിന്നുള്ള വിദ്യാശങ്കറിനാണ് അഞ്ചാം സ്ഥാനം.

വിധിപ്രഖ്യാപനത്തിന്റെ ആവേശവും, വിജയിയുടെ ആഹ്ലാദ പ്രകടനവും കഴിയുമ്പോള്‍ സംഗീതത്തെ സ്നേഹിക്കുന്ന പ്രേക്ഷകര്‍ അറിയാതെ ചോദിച്ചു പോകുന്നു. ഈ സ്റ്റാര്‍ സിങ്ങര്‍ പദവി എത്തിച്ചേര്‍ന്നിരിക്കുന്നത്‌ യഥാര്‍ത്ഥ കരങ്ങളിലാണോ? ഒരു സാധാരണക്കാരനായ സംഗീതാസ്വാദകനായ എനിക്ക്‌ തോന്നിയത്‌, അല്ല എന്നാണ്. ചാനല്‍ ഏഷ്യാനെറ്റാവുമ്പോള്‍ എന്തും സംഭവിക്കാം എന്നറിയാം. എന്നിരുന്നാല്‍ പോലും, ഇത്ര വലിയ ഒരു വങ്കത്തരമാകും ഈ വിധി എന്നു ഒട്ടും പ്രതീക്ഷിച്ചില്ല. ജോബി ഒരു നല്ല ഗായകനാണ് എന്നതില്‍ യാതോരു സംശയവുമില്ല. അതു അദ്ദേഹം പല തവണ തെളിയിച്ചിട്ടുള്ളതുമാണ്. എന്നാല്‍ ഫൈനലിസ്റ്റുകളായ ശ്രീനാഥിനേയോ പ്രീതിയെയോ മറികടക്കാനുള്ള ടാലന്റ്‌ അദ്ദേഹത്തിന് ഉണ്ടെന്ന്‌ ഞാന്‍ വിശ്വസിക്കുന്നില്ല. രണ്ടു, ക്ലാസിക്കലി ട്രെയിന്‍‌ഡ് ഗായകരാണ് ശ്രീനാഥും പ്രീതിയും. ജോബിയേക്കാള്‍ ശ്രുതിശുദ്ധമായി, അനായാസമായി പ്ലാനുകള്‍ പാടാനും കഴിവുള്ളവരാണ് ഇവര്‍ രണ്ടു പേരും. ഫൈനലില്‍ അതങ്ങനെ തന്നെയായിരുന്നു. പിന്നെ എങ്ങനെ ജോബി വിജയിയായി? ഏഷ്യാനെറ്റിന്റെ ഉത്തരം എസ്.എം.എസ് എന്നായിരിക്കും. ഏകദേശം 5 ലക്ഷം എസ്.എം.എസ്സുകളാണ് ജോബിക്കു കിട്ടിയത്‌. ശ്രീനാഥിനു കിട്ടിയത്‌ ഒന്നര ലക്ഷവും, പ്രീതിക്കു കിട്ടിയത്‌ വെറും അരലക്ഷവും. അങ്ങനെ എസ്.എം.എസ്സിന്റെ ബലത്തില്‍ ജോബി വിജയിയായി. ഇവിടെ പരാജയപ്പെട്ടത്‌ ശ്രീനാഥോ പ്രീതിയോ അല്ല, ശുദ്ധസംഗീതമാണ്. മികച്ച ഗായകനെ കണ്ടെത്താനുള്ള ഒരു ഷോയാണ്.

ഈ ഷോയ്കു മുന്നെ 5 ഫൈനലിസ്റ്റുകളുടെ നേട്ടങ്ങള്‍ ഇതാണ്.

1. ശ്രീനാഥ്‌ - ജനപ്രിയഗായകന്‍ ഗന്ധര്‍വ്വ സംഗീതം, യുവജനോത്സവം ലളിത ഗാനം, ശാസ്ത്രീയ സംഗീതം ഒന്നാം സ്ഥാനം
2. പ്രീതി വാര്യര്‍ - ഒന്നാം സ്ഥാനം രാഗാലയ, അമൃതാ ടിവി, വിവിധ മത്സരങ്ങളില്‍ ഒന്നാം സ്ഥാനം
3. വിദ്യാശങ്കര്‍ - ജയ ടിവി രാഗമാലിക, രാജ് ടിവി രാഗഗീതം വിജയി
4. ജോബി ജോണ്‍ - കാലിക്കറ്റ് സര്‍വകലാശാല ലളിതഗാനം ഒന്നാം സ്ഥാനം, കേരളോത്സവം ലളിതഗാനം ഒന്നാം സ്ഥാനം.
5. അഞ്ജു ജോസഫ്‌ - ഗന്ധര്‍വ്വ സംഗീതം മൂന്നാം സ്ഥാനം, പി.ഭാസ്കരന്‍ സംഗീതോത്സവം വിജയി

ഇതില്‍ നിന്നും നമുക്ക്‌ മനസ്സിലാവുന്ന ഒരു കാര്യമുണ്ട്‌. ജോബി ഒരു നല്ല ഗായകനാണെങ്കില്‍ കൂടി, ശാസ്ത്രീയ സംഗീതം അഭ്യസിച്ച മറ്റു മത്സരാര്‍ത്ഥികളേക്കാള്‍ ഒരു ചുവടു പിന്നിലാണ് അദ്ദേഹം, പക്ഷേ അദ്ദേഹം നന്നായി ഇം‌പ്രൂവ്‌ ചെയ്തിട്ടുമുണ്ട്‌. പക്ഷേ അതൊന്നും ഇവരെ മറികടക്കാന്‍ തക്കവണ്ണം ഉയര്‍ന്നിട്ടില്ല എന്നതു തന്നെയാണ് എന്റെ പക്ഷം.

ഇതിനു മുന്നെയുള്ള സീസണുകളിലെല്ലാം ഈ എസ്.എം.എസ് കളികള്‍ നടത്തിയിട്ടുണ്ട്‌. അതൊക്കെ സ്റ്റൂഡിയോക്കുള്ളില്‍ ആയിരുന്നു. എന്നാല്‍ ആദ്യമായാണ് ഫൈനലില്‍ ഇത്തരം ഒരു കളി നടക്കുന്നത്‌. ഐഡിയ സ്റ്റാര്‍ സിംഗര്‍ മത്സരാര്‍ത്ഥികള്‍, പോസ്റ്ററുകളും ഫ്ലക്സ് ബോര്‍ഡുകളും വച്ച്‌ എസ്.എം.എസ്സ് വോട്ടു ചോദിക്കുന്ന പ്രവണത നാം കണ്ടു തുടങ്ങിയിട്ട്‌ അധികകാലമായില്ല. വോട്ട്‌ ചോദിച്ച്‌, ഓര്‍ക്കുട്ട് കമ്മ്യൂണിറ്റികള്‍ വരെ വന്നു തുടങ്ങി. ജോബിയെ പിന്തുണച്ചവരെല്ലം, അദ്ദേഹത്തോടുള്ള സ്നേഹം കൊണ്ടാവാം വോട്ടു ചെയ്തിട്ടുണ്ടാവുക. അദ്ദേഹത്തിന്റെ ജീവിത പ്രശ്നങ്ങളെല്ലാം തന്നെ ചാനലിലൂടെ പുറത്തു വന്നിരുന്നു. അതാവും ആളുകളെ അദ്ദേഹത്തെ പ്രോത്സാഹിപ്പിക്കാന്‍ പ്രേരിപ്പിച്ചത്‌.  പക്ഷേ, അത്തരം ഒരു പ്രോത്സാഹനം കൊണ്ട്‌ അദ്ദേഹത്തെ അനര്‍ഹമായ ഒരു പൊസിഷനിലാണ് അവര്‍ എത്തിച്ചത്‌. സ്നേഹദയാവായ്പിനപ്പുറം ഇതൊരു മികച്ച ഗായകനെ കണ്ടെത്താനുള്ള വേദിയാണെന്ന്‌ പലരും മറന്നു കഴിഞ്ഞു.  ഇതിനു മുന്നെയുള്ള രണ്ടു സീസണിലെ വിജയികള്‍, നജീം അര്‍ഷാദും വിവേകാനന്ദനും, സ്റ്റാര്‍ സിംഗര്‍ പദവിക്ക് അവര്‍ അനുയോജ്യരായിരുന്നു, അവരേക്കാള്‍ മികച്ച ഗായകര്‍ ഫൈനലില്‍ ഉണ്ടായിരുന്നില്ല എന്നതായിരുന്നു യാഥാര്‍ത്ഥ്യം. പക്ഷേ ഇവിടെ മികച്ച ഗായകര്‍ എസ്.എം.എസ്സിന്റെ പേരില്‍ പിന്തള്ളപ്പെടുന്നത്‌ ദുഖകരമായ വസ്തുതയാണ്. എന്തായാലും ഒരു മികച്ച ഗായകനെ കണ്ടെത്താനുള്ള മത്സരത്തിന്റെ വിധി ഇങ്ങനെ ഒരു ദുരന്തത്തില്‍ അവസാനിച്ചത്‌ കഷ്ടമായി. മികച്ച ഗായകനെന്നാല്‍ ഏറ്റവും കൂടുതല്‍ എസ്.എം.എസ്സ്‌ ലഭിക്കുന്നവനല്ല എന്ന യാഥാര്‍ത്ഥ്യം ഒന്നു കൂടെ അടിവരയിടുകയാണ് ഈ മത്സര ഫലത്തിലൂടെ... എന്തായാലും ഈ പ്രഹസ്സനം ഇവിടെ അവസാനിക്കുന്നില്ല.. സീസണ്‍ 5 തുടങ്ങിക്കഴിഞ്ഞു...

അവലംബം: ഐഡിയ സ്റ്റാര്‍ സിംഗര്‍ വിവിധ സീസണുകള്‍ & ഈ പ്രൊഫൈല്‍ ലിങ്ക്‌.

ഇനി കടന്നു വരാത്ത പദനിസ്വനം....

വയലാറും ശ്രീകുമാരന്‍ തമ്പിയും ഓ.എന്‍.വിയും അടക്കി വാണിരുന്ന മലയാള ഗാനരചനാ ശാഖയിലേക്ക്‌ ഒരു സുപ്രഭാതത്തില്‍ മനസ്സില്‍ നിറയെ കവിതയും ജീവിതാനുഭവങ്ങളുമായി ഒരു ചെറുപ്പക്കാരന്‍ കടന്നു വന്നു. ഗിരീഷ്‌ പുത്തഞ്ചേരി... ലാളിത്യമാര്‍ന്ന വരികളിലൂടെ അദ്ദേഹം മലയാളികളുടെ മനസ്സിലേക്കാണ് പിച്ചവച്ചത്‌... എന്നാല്‍ ഈ കഴിഞ്ഞ ഫെബ്രുവരി 11ന് അദ്ദേഹം നമ്മെ വിട്ടു പിരിഞ്ഞു. ഗിരീഷ്‌ പുത്തഞ്ചേരിയുടെ ഗാനങ്ങളെ കോര്‍ത്തിണക്കി ഒരു ലേഖനമെഴുതണമെന്ന്‌ പാഥേയം ആവശ്യപ്പെട്ടപ്പോള്‍ സത്യത്തില്‍ ഞാന്‍ ഒരു വിഷമവ്രുത്തത്തിലാകുകയായിരുന്നു. ഏകദേശം 328 ചിത്രങ്ങളിലായി 1556 ഗാനങ്ങള്‍ അദ്ദേഹം എഴുതിയിട്ടുണ്ട്‌. അതെല്ലാം ഒന്നിനൊന്നു മികച്ചതും. അവയെല്ലാം ഉള്‍പ്പെടുത്തി ഒരു ലേഖനമെഴുതുക എന്നത് സാധ്യമായ ഒരു കാര്യമല്ല... അതിനാല്‍ അദ്ദേഹത്തിന്റെ ഗാനങ്ങളില്‍ എനിക്ക്‌ ഏറ്റവും ഇഷ്ടപ്പെട്ട പത്തു ഗാനങ്ങളെക്കുറിച്ച്‌ ഞാന്‍ എഴുതുകയാണ്... എനിക്കു മാത്രമല്ല, മലയാളികള്‍ക്കെല്ലാം ഈ ഗാനങ്ങള്‍ ഇഷ്ടമായിരിക്കുമെന്ന്‌ ഞാന്‍ വിശ്വസിക്കുന്നു...

സൂര്യകിരീടം വീണുടഞ്ഞു : ദേവാസുരമെന്ന ചിത്രത്തില്‍ ഈ ഗാനത്തിന് ഈണം പകര്‍ന്നിരിക്കുന്നത്‌ എം.ജി രാധാക്രുഷ്ണനാണ്. ആലാപനം എം.ജി ശ്രീകുമാറും. കഥാഗതിയിലെ അതി പ്രധാനമായ ഒരു ഗാനമാണിത്‌. ചെയ്ത പാപങ്ങളെ തിരിച്ചറിച്ച്‌, അതില്‍ മനം നൊന്ത്‌ ഒരു മാനസാന്തരത്തിലൂടെ കടന്നു പോകുന്ന നായകന്റെ മനോഗതിയെ അതി ഭംഗിയായി വരികളാക്കുവാന്‍ ഗിരീഷ്‌ പുത്തഞ്ചേരിക്കു കഴിഞ്ഞിട്ടുണ്ട്‌. “ഇഹപരശാപം തീരാനമ്മേ ഇനിയൊരുജന്മം വീണ്ടും തരുമോ“ എന്ന ഒരൊറ്റവരി, ആ കഥാപാത്രത്തിന്റെ ഉള്ളിലേക്ക്‌ എത്രമാത്രം ഗിരീഷ്‌ കടന്നു ചെന്നിട്ടുണ്ട്‌ എന്ന്‌ മനസ്സിലാക്കാന്‍. എന്നാല്‍ ട്രിവാന്‍ഡ്രം ക്ലബ്ബിലെ മുറിയിലിരുന്ന്‌ 10 മിനിട്ടു കൊണ്ടാണ് ഇത്‌ ഗിരീഷ്‌ എഴുതി തീര്‍ത്തതെന്ന്‌ എം.ജി രാധാക്രുഷ്ണന്‍ സാക്ഷ്യപ്പെടുത്തുന്നു. അതില്‍ നിന്നു തന്നെ, അദ്ദേഹത്തിന്റെ ഉള്ളില്‍ നിറഞ്ഞു നില്‍ക്കുന്ന കവിത്വത്തെ നമുക്ക്‌ മനസ്സിലാക്കാന്‍ സാധിക്കും.

ആരോ വിരല്‍ മീട്ടി: വിദ്യാസാഗറിന്റെ സംഗീതത്തില്‍ പ്രണയവര്‍ണ്ണങ്ങള്‍ എന്ന സിബി മലയില്‍ ചിത്രത്തിലെ ഒരു ഗാനമാണിത്‌. ഈ ചിത്രത്തിന്റെ കമ്പോസിങ്‌ സമയത്ത്‌, വിദ്യാസാഗര്‍ ഹാര്‍മോണിയത്തില്‍ വായിച്ച ഒരു ഈണം കേട്ട്‌, ആരോ വിരല്‍ മീട്ടി എന്ന് ഗിരീഷ്‌ പറയുകയായിരുന്നു. ആ മൂന്നു വാക്കുകള്‍ കൊണ്ട്‌ നിമിഷ നേരം കൊണ്ട്‌ ഗിരീഷ്‌ ഒരു കവിത രചിച്ചു. അതിനു പിന്നീട്‌ വിദ്യാസാഗര്‍ ആകര്‍ഷകമായ ഈണം നല്‍കുകയുമായിരുന്നു. “വെണ്ണിലാവു പോലും നിനക്കിന്നെരിയും വേനലായി“ എന്ന്‌ ഗിരീഷ്‌ എഴുതി തീര്‍ത്തപ്പോള്‍, സിബി മലയില് സ്രുഷ്ടിച്ച മഞ്ജുവാര്യരുടെ കഥാപാത്രത്തിന്റെ മാനസിക വ്യാപാരങ്ങള്‍ അതില്‍ പ്രതിഫലിക്കയായിരുന്നു. ഒരു സംവിധായകന്‍ തന്നില്‍ നിന്നും ആഗ്രഹിക്കുന്നതെന്ത്‌ എന്ന്‌ മനസ്സിലാക്കി അതിനൊപ്പിച്ച കവിതകള്‍ നിമിഷ നേരം കൊണ്ട്‌ എഴുതുവാന്‍ ഗിരീഷിനു കഴിഞ്ഞിരുന്നു.

പിന്നെയും പിന്നെയും ആരോ കിനാവിന്റെ : ഗിരീഷിന്റെ തൂലികയില്‍ നിന്നും ജന്മമെടുത്ത മറ്റൊരു മനോഹരമായ പ്രണയഗാനം. ക്രുഷ്ണഗുഡിയില്‍ ഒരു പ്രണയകാലത്ത്‌ എന്ന കമല്‍ ചിത്രത്തിനായി വിദ്യാസാഗര്‍ ഈണം പകര്‍ന്ന ഗാനമാണിത്‌. ചിത്രത്തിലെ ഈ രംഗത്തിനായി വിദ്യാസാഗറും കമലും ചേര്‍ന്ന്‌ കൂടിയാലോചനകള്‍ നടത്തി ഒരു ട്യൂണുണ്ടാക്കി, എന്നാല്‍ ഗിരീഷ്‌ എത്രയെഴുതിയിട്ടും, കമല്‍ ഉദ്ദേശിച്ച പ്രണയത്തിന്റെ തീവ്രത ആ വരികള്‍ക്ക്‌ കിട്ടുന്നില്ല. ഗിരീഷ്‌ പലവട്ടാം മാറ്റി എഴുതിയെങ്കിലും കമലിന് എന്തോ ചേര്‍ച്ചയില്ലായ്മ തോന്നി. ഒടുവില്‍ വിദ്യാസാഗര്‍ ഒരു നിര്‍ദ്ദേശം മുന്നോട്ടു വച്ചു. ഗിരീഷ്‌ എഴുതട്ടെ, ഞാന്‍ മറ്റൊരു ട്യൂണി അതിനിടാം. അതു പറഞ്ഞ്‌ നിമിഷങ്ങള്‍ക്കകം വരികള്‍ റെഡി. ആ ഗാനമാണ് യേശുദാസിന്റെ അനുഗ്രഹീത ശബ്ദത്തിലൂടെ നാം കേട്ടത്‌...

ജൂണിലെ നിലാ മഴയില്‍: എം.ജയചന്ദ്രന്റെ സംഗീത സംവിധാനത്തില്‍ വിജി തമ്പി സംവിധാനം ചെയ്ത നമ്മള്‍ തമ്മില്‍ എന്ന ചിത്രത്തിലെ ഗാനമാണിത്‌. മഴയുടെ പശ്ചാത്തലത്തിലുള്ള പ്രണയഗാനമെന്നാണ് വിജി തമ്പി ഈ പാട്ടിനെ പറ്റി ഉദ്ദേശിച്ചിരുന്നത്‌. ജയചന്ദ്രന്റെ ട്യൂണ്‍ കേട്ട ശേഷം ഗിരീഷ്‌ ഒരു കവിതയെഴുതി. എന്നാല്‍ ഗിരീഷിനു തന്നെ അതില്‍ ഒരു ത്രുപ്തി തോന്നിയില്ല. അദ്ദേഹം അത്‌ മാറ്റി മറ്റൊരു കവിതയെഴുതി, അതും നിമിഷ നേരം കൊണ്ട്‌. അതാ‍ണ് ജൂണിലെ നിലാമഴയില്‍ എന്ന ഗാനം. “ഇതളായ് വിരിഞ്ഞ പൂവു പോല്‍ ഹൃദയം കവര്‍ന്നു തന്നു നീ“ എന്ന വരികളില്‍ഊടനീളം നിറഞ്ഞു നില്‍ക്കുന്നത്‌ പ്രണയമെന്ന ഭാവമാണ്.... അദ്ദേഹം ആദ്യമെഴുതിയ ഗാനം പിന്നീട്‌ വിദ്യാസാഗര്‍ പട്ടാളം എന്ന ചിത്രത്തില്‍ ഒരു ഗാനമാക്കി.,.. ആരോരാള്‍ പുലര്‍ മഴയില്‍... എന്ന ഗാനം...

കണ്ണു നട്ടു കാത്തിരുന്നിട്ടും: കഥാവശേഷന്‍ എന്ന ടി.വി ചന്ദ്രന്‍ ചിത്രത്തില്‍ എം.ജയചന്ദ്രന്‍ ഈണം പകര്‍ന്ന ഗാനമാണിത്‌. കഥാനായകന്‍ ഒരു കള്ളനെ കൊണ്ട്‌, അയാള്‍ മോഷ്ടിക്കുന്ന ഹാര്‍മോണിയം വായിച്ച്‌ പാട്ടു പാടിക്കുന്നതാണ് ഗാനത്തിന്റെ സന്ദര്‍ഭം. വികാരനിര്‍ഭരമായ സന്ദര്‍ഭത്തില്‍ തന്റെ ജീവിതത്തിലെ കഷ്ടപ്പാടുകളും വേദനകളും ആ കള്ളന്‍ ഓര്‍മ്മിച്ചെടുക്കുകയാണ് ഈ ഗാനത്തിലൂടെ. ഒരിക്കല്‍ ഒരു അഭിമുഖത്തില്‍ ഗിരീഷ്‌ പറഞ്ഞു. താനെഴുതിയ വരി, “കുമ്പിളിൽ വിളമ്പിയ പൈമ്പാലെന്നോർത്തു ഞാൻ, അമ്പിളിക്കിണ്ണത്തെ കൊതിച്ചിരുന്നൂ, അന്നത്തെയന്തിയിൽ അത്താഴപ്പാത്രത്തിൽ അമ്മ തൻ കണ്ണീരോ തിളച്ചിരുന്നു.” ഇത്രയും വികാര തീവ്രമാകാന്‍ കാരണം, തന്റെ ജീവിതത്തിലുണ്ടായ ഒരു അനുഭവമാണ് ഇതെഴുതാന്‍ പ്രേരകമായത്‌ എന്നാണ്. ചെറുപ്പത്തില്‍ താന്‍ അനുഭവിച്ച പട്ടിണിയും പരിവട്ടവും, താന്‍ കണ്ട അമ്മയുടെ കണ്‍നുനീരും കവിതയായി അദ്ദേഹത്തിന്റെ തൂലികയിലെത്തുകയായിരുന്നു എന്നാണ് അദ്ദേഹം പറഞ്ഞത്‌. കഥാപാത്രങ്ങളുടെ സ്ഥാനത്ത്‌ സ്വയം പ്രതിഷ്ഠിച്ച്‌, സ്വന്തം ജീവിതാനുഭവത്തില്‍ നിന്നും കവിതകള്‍ സ്രുഷ്ടിക്കുവാന്‍ ഗിരീഷിനുണ്ടായിരുന്ന കഴിവ്‌ അദ്വിതീയമായിരുന്നു. ഈ ഗാനത്തിന് അദ്ദേഹത്തിന് കേരള സര്‍ക്കാര്‍ അവാര്‍ഡും ലഭിച്ചു.

ഹരിമുരളീ രവം : ഷാജി കൈലാസ്‌ സംവിധാനം ചെയ്ത ആറാം തമ്പുരാന്‍ എന്ന ചിത്രത്തിലെ രവീന്ദ്രന്‍ സംഗീത സംവിധാനം ചെയ്ത്‌ യേശുദാസ്‌ ആലപിച്ച സൂപ്പര്‍ ഹിറ്റ്‌ ഗാനമാണ് ഹരിമുരളീ രവം. സന്ദര്‍ഭത്തിന് അനുയോജ്യമായി ഒരു ഹിന്ദുസ്ഥാനി ടച്ചുള്ള ഗാനം സ്രുഷ്ടിക്കുവാന്‍ രവീന്ദ്രന്‍ മാഷ്‌ തീരുമാനിച്ചപ്പോള്‍ വരികളെഴുതുവാന്‍ ഗിരീഷിനെയാണ് അദ്ദേഹം തിരഞ്ഞെടുത്തത്‌. ഈ ഗാനത്തിന്റെ പിറവിയെ പറ്റിയും ഗിരീഷ്‌ വാചാലനായിട്ടുണ്ട്‌. മദ്രാസ്സില്‍ ചിത്രത്തിന്റെ പൂജയുടെ തലേ ദിവസം രവീന്ദ്രന്‍ മാഷും, ഗിരീഷും ഒരു ഹോട്ടലില്‍ കമ്പോസിങ്ങിനായി റൂമെടുക്കുന്നു. രണ്ടാളും ഒന്നു മിനുങ്ങി കിടന്നുറങ്ങി. രാവിലെ പൂജയ്ക്കു പോകുവാന്‍ പ്രൊഡക്ഷന്‍ എസ്കിക്യൂട്ടീവ് കാറുമായി വന്നപ്പോഴാണ് ഇരുവരും എഴുന്നേല്‍ക്കുന്നത്‌. പാട്ടാണെങ്കില്‍ എവിടെയും എത്തിയിട്ടുമില്ല, മാഷു ചോദിച്ചു, നിന്റെ കയ്യില്‍ വല്ലതും ഉണ്ടോ? എന്റെ കയ്യില്‍ ഒന്നുമില്ല രവിയേട്ടന്റെ കയ്യിലോ..? ഒന്നുമില്ല എന്നു മാഷും. കുളിച്ചു റെഡിയായി പൂജാ സ്ഥലത്തേക്ക്‌ അവര്‍ യാത്രയായി. ആ യാത്രക്കിടയിലാണ് ഹരിമുരളീരവം എന്ന ഹിറ്റു ഗാനം ലഭിക്കുന്നത്‌. സംഗീതത്തില്‍ അവഗാഹമുണ്ടായിരുന്ന ഗിരീഷിന്, മാഷോരുക്കിയ ട്യൂണിന് വരികളെഴുതുവാന്‍ ഒട്ടും പ്രയാസമുണ്ടായിരുന്നില്ല. അതി മനോഹരമായി ഹരിമുരളീ രവത്തിന്റെ വരികള്‍ അദ്ദേഹം എഴുതി തീര്‍ത്തു.

മറന്നിട്ടുമെന്തിനോ: ലാല്‍ ജോസ്‌ സംവിധാനം ചെയ്ത രണ്ടാം ഭാവത്തിലെ ഗാനം, വിദ്യാസാഗറാണ് ഇതിന് സംഗീതമൊരുക്കിയിരിക്കുന്നത്‌. ലാല്‍ ജോസ്‌ സന്ദര്‍ഭം വിവരിച്ചു കൊടുത്തപ്പോള്‍ വിദ്യാസാഗര്‍ ട്യൂണ്‍ പറഞ്ഞു. എന്നാല്‍ ഗിരീഷ്‌ എഴുതിയിട്ട്‌ എല്ലാം പാത്തോസ്‌ തന്നെയാണ് വരുന്നത്‌. പല വരികളും മാറി മാറി എഴുതിയെങ്കിലും എല്ലാം പാത്തോസ്‌ തന്നെ. ഒടുവില്‍ ഗിരീഷ് പറഞ്ഞു. ഈ ട്യൂണിന് എനിക്ക് പാത്തോസ്‌ മാത്രമെ വരുന്നുള്ളൂ. എന്തു ചെയ്യണം? വിദ്യാസാഗര്‍ ഇടപെട്ടു പറഞ്ഞു, ഗിരീഷ്‌ എഴുതൂ, ഞാന്‍ ട്യൂണ്‍ ചെയ്യാം. ഉടനെ ഗിരീഷ്‌ എഴുതി, മറന്നിട്ടുമെന്തിനോ മനസ്സില് തുളുമ്പുന്നു മൌനാനുരാഗത്തിന് ലോല ഭാവം... ആ വരി ലാല്‍ ജോസിനെ വായിച്ചു കേള്‍പ്പിച്ചപ്പോള്‍, വിദ്യാസാഗര്‍ ചിരിക്കുകയായിരുന്നു, ഒരു അര്‍ത്ഥഗര്‍ഭമായ ചിരി. തന്റെ ഹാര്‍മോണിയം എടുത്തു വച്ച്‌ ആ വരികള്‍ക്ക്‌ ട്യൂണൊരുക്കി. അതു മതിയെന്ന്‌ ലാല്‍ ജോസ്‌ പറഞ്ഞു. പിന്നെ ഏറെ താമസിച്ചില്ല, മറന്നിട്ടുമെന്തിനോ എന്ന ഗാനം പിറവി കൊണ്ടു. ലാല്‍ ജോസ്‌ തന്റെ ഇന്റര്‍വ്യൂവില്‍ വളരെ വികാര നിര്‍ഭരമായാണ് ഗിരീഷിന്റെയുള്ളിലെ കവിയെക്കുറിച്ചും, ഈ ഗാനത്തിന്റെ പിറവിയേക്കുറിച്ചും പറഞ്ഞത്‌.

അമ്മ മഴക്കാറിനു കണ്‍നിറഞ്ഞു: ഗിരീഷിന്റെ തൂലികയില്‍ നിന്നും ജന്മം കൊണ്ട മറ്റൊരു അനുപമമായ ഗാനം. ബി.ഉണ്ണിക്രുഷ്ണന്റെ മാടമ്പി എന്ന ചിത്രത്തില്‍ എം.ജയചന്ദ്രന്‍ സംഗീത സംവിധാനം നിര്‍വഹിച്ച ഗാനമാണിത്‌. അമ്മയ്ക്കു വേണ്ടി ഒരു ഗാനം വേണമെന്ന്‌ ഉന്നിക്രുഷ്ണന്‍ പറഞ്ഞപ്പോള്‍, സ്വന്തം അമ്മയെ ഓര്‍ത്തു കൊണ്ടാണ് ഗിരീഷ്‌ ഈ വരികളൊരുക്കിയത്‌. മഴയെ അഗാധമായി പ്രണയിച്ച ആ കവിക്ക്‌ അമ്മ മഴക്കാറിനു കണ്‍ നിറഞ്ഞു എന്നെഴുതുവാനായി അധിക സമയം വേണ്ടി വന്നില്ല എന്നതാണ് സത്യം. ഒരേ സമയം, സംഗീത സംവിധായകനേയും ഗായകനേയും കരയിപ്പിച്ച ഗാനമാണിത്‌. ഹിന്ദോളത്തിലാണ് ഇതിന്റെ സംഗീതമൊരുക്കിയിരിക്കുന്നത്‌. അതില്‍ പോലും ഗിരീഷിന്റെ സംഭാവനയുണ്ട്‌ എന്ന്‌ എം.ജയചന്ദ്രന്‍ അമ്രുത ചാനലിനു നല്‍കിയ ഒരു അഭിമുഖത്തില്‍ പറഞ്ഞിട്ടുണ്ട്‌. മനസ്സില്‍ സംഗീതം നിറഞ്ഞു നിന്നിരുന്നതിനാല്‍, രാഗഭാവമറിഞ്ഞ്‌ വരികളൊരുക്കുവാന്‍ ഗിരീഷിനു കഴിഞ്ഞിരുന്നു എന്ന്‌ സംഗീത സവിധായകര്‍ ഒരു പോലെ സമ്മതിക്കുന്ന കാര്യമാണ്.

ഉറങ്ങാതെ : നേമം പുഷ്പരാജൊരുക്കിയ ഗൌരീ ശങ്കരമെന്ന ഗാനത്തിലെ അതീവ സുന്ദരമായ ഒരു പ്രണയഗാനമാണിത്‌. ഇതിന്റെ സംഗീതം പകര്‍ന്നിരിക്കുന്നത്‌ എം.ജയചന്ദ്രനും. പ്രണയത്തിന്റെ മൂര്‍ത്തീഭാവത്തെ വിളിച്ചറിയിക്കുന്ന ഒരു ഗാനമാണിത്‌. “പാതിരാ വനമുല്ല ജാലകം വഴിയെന്റെ മോതിര വിരലിന്മേൽ ഉമ്മ വെച്ചു..” എന്നെഴുതാന്‍ വളരെയധികം റൊമാന്റിക്കായാ ഒരു കവിക്കു മാത്രമെ കഴിയൂ‍. പ്രണയം മനസ്സില്‍ സൂക്ഷിച്ച ഒരു കവിയായിരുനു ഗിരീഷ്‌. തന്റെ ബാല്യകാലത്തെ നഷ്ടപ്പെട്ട പ്രണയം ഒരു പ്രതികാരമായി കണ്ടതാണ് അതി തീവ്രമാ‍യ പ്രണയഗാനങ്ങള്‍ എഴുതാന്‍ തന്നെ സഹായിച്ചതെന്ന്‌ ഗിരീഷ്‌ പല അഭിമുഖങ്ങളിലും പറഞ്ഞിട്ടുണ്ട്‌. ഈ ഗാനത്തിന് അദ്ദേഹത്തിന് കേരള സര്‍ക്കാര്‍ അവാര്‍ഡും ലഭിച്ചു.

നിലാവിന്റെ നീലഭസ്മക്കുറിയണിഞ്ഞവളേ : അഗ്നിദേവന്‍ എന്ന ചിത്രത്തില്‍ എം.ജി രാധാക്രുഷ്ണന്‍ സംഗീത സംവിധാനം ചെയ്ത്‌, എം.ജി ശ്രീകുമാര്‍ ആലപിച്ച ഗാനമാണിത്‌. രാവിനേയും നിലാവിനേയും അകമഴിഞ്ഞു സ്നേഹിച്ച കവിയായായിരുന്നു ഗിരീഷ്‌. നിലാവിന്റെ നീലഭസ്മക്കുറിയണിഞ്ഞവളെ എന്നു എഴുതുവാന്‍ പ്രണയത്തെ ഇഷ്ടപ്പെടുന്ന, പ്രക്രുതിയെ അകമഴിഞ്ഞു സ്നേഹിക്കുന്ന ഒരു നാട്ടിന്‍ പുറത്തുകാരനെ കഴിയൂ. ലളിത സുന്ദരമായ വരികളിലൂടെ അതി മനോഹരമായി അതു വരച്ചുകാട്ടുവാന്‍ അദ്ദേഹത്തിനുണ്ടായിരുന്ന കഴിവു പ്രകടമാക്കുന്ന ഒരു ഗാനമാണ് നിലാവിന്റെ നീല ഭസ്മക്കുറിയണിഞ്ഞവളേ എന്നത്‌.... ഈ ഗാനത്തിനാണ് ആദ്യമായി ഒരു സംസ്ഥാന അവാര്‍ഡ്‌ അദ്ദേഹത്തെ തേടിയെത്തിയത്‌..

ഈ പത്തു ഗാനങ്ങളിലൊതുക്കി നിര്‍ത്താവുന്നതല്ല ഗിരീഷ്‌ പുത്തഞ്ചേരി എന്ന പ്രതിഭയുടെ സ്രുഷ്ടികള്‍... ദില്‍സേയിലെ ജിയാ ചലെയിലെ മലയാളം വരികള്‍, മായാമയൂരത്തിലെ കൈക്കുടന്ന നിറയെ തിരുമധുരം തരും, രാവണപ്രഭുവിലെ ആകാശദീപങ്ങള്‍ സാക്ഷി.., ബാലേട്ടനിലെ ഇന്നലെ എന്റെ നെഞ്ചിലെ.., പുനരധിവാസത്തിലെ അവാര്‍ഡു നേടിയ കനകമുന്തിരികള്‍.., ഈ പുഴയും കടന്നിലെ രാത്തിങ്കള്‍ പൂത്താലിചാര്‍ത്തി..., മിന്നാരത്തിലെ നിലാവേ മായുമോ..., ഹിറ്റ്ലറിലെ നീയുറങ്ങിയോ നിലാവേ..., വടക്കും നാഥനിലെ കളഭം തരാം..., നന്ദനത്തിലെ സംസ്ഥാന സര്‍ക്കാര്‍ പുരസ്കാരം നേടിയ കാര്‍മുകില്‍ വര്‍ണ്ണന്റെ ചുണ്ടില്‍..., സമ്മര്‍ ഇന്‍ ബെത്‌ലഹേമിലെ എത്രോ ജന്മമായ്.., ഒരു രാത്രി കൂടി വിടവാങ്ങവേ.., കാലാപാനിയിലെ ആറ്റിറമ്പിലെ കൊമ്പിലേ.., അങ്ങനെ ഒരവധിക്കാലത്ത് എന്ന ചിത്രത്തിലെ പുലര്‍വെയിലും പകല്‍മുകിലും..., കന്മദത്തിലെ മൂവന്തി താഴ്വരയില്‍.... അങ്ങനെ മനോഹര ഗാനങ്ങളുടെ നിരനീളുന്നു... അദ്ദേഹത്തിനെ ഗാനങ്ങളില്‍ മിക്കതും മലയാളികള്‍ നെഞ്ചിലേറ്റിയവയുമായിരുന്നു... ലാളിത്യമാര്‍ന്ന വരികളെഴുതി നമ്മെ വിസ്മയിപ്പിച്ച ഗിരീഷിന് അടിപൊളി പാട്ടുകളും വളരെ എളുപ്പത്തില്‍ എഴുതാന്‍ കഴിഞ്ഞിരുന്നു. പ്രണയവര്‍ണ്ണങ്ങളിലെ ആലേലോ പൂലേലോ, നരസിംഹത്തിലെ ധാം ധി നക്ക തില്ലം തില്ലം, ചന്ദ്രലേഖയിലെ അമ്മൂമ്മക്കിളി വായാടി..., അലിഭായിയിലെ ആടിമേഘ ചുവടുവറ്റി.., ജോണിവാക്കറിലെ ശാന്തമീ രാത്രിയില്‍.... എന്നിങ്ങനെ ആ ഗാനങ്ങളുടേയും എണ്ണം വളരെയധികമാണ്.... പദങ്ങളാകുന്ന അമ്പോടുങ്ങാത്ത ആവനാഴിയാണ് താനെന്നു അഹങ്കാരത്തൊടെ പറഞ്ഞിരുന്ന കവിയായിരുന്നു ഗിരീഷ്‌ പുത്തഞ്ചേരി. ഇനിയാ തൂലികയില്‍ വിരിയുന്ന ഗാനങ്ങള്‍ ആസ്വദിക്കുവാനുള്ള ഭാഗ്യം മലയാളികള്‍ക്കില്ലല്ലോ എന്നത്‌ നമ്മള്‍ ഒരോരുത്തരുടേയും സ്വകാര്യ ദുഖമായി തുടരും. ഗിരീഷിലെ കവിയെ നാം പൂര്‍ണ്ണമായും ഉപയോഗിച്ചിരുന്നോ എന്നാലോചിച്ചാല്‍ ഇല്ല എന്നൊരുത്തരമാകും നമുക്ക്‌ ലഭിക്കുക. ആ മഹാപ്രതിഭയ്ക്കു മുന്നില്‍ പ്രണാമം അര്‍പ്പിച്ചു കൊണ്ട്‌.......

ഈ ലേഖനം പാഥേയത്തില്‍ വായിക്കുവാന്‍ ഇവിടെ ക്ലിക്ക്‌ ചെയ്യുക...

സൂര്യകിരീടം വീണുടഞ്ഞു....

ഫെബ്രുവരി 11, 2010, മലയാ‍ള ഗാന ശാഖയ്ക്ക്‌ ഒരിക്കലും മറക്കാനാവാത്ത ഒരു ദിനം.. പിന്നെയും പിന്നെയും മനസ്സിന്റെ പടി കടന്നു വരുന്ന ഗാനങ്ങള്‍ മലയാളിക്ക്‌ സമ്മാനിച്ച മലയാളിയുടെ പ്രിയ ഗാനരചയിതാണ് ഗിരീഷ്‌ പുത്തഞ്ചേരി നമ്മോട്‌ വിട പറഞ്ഞ ദിനം. അസാമാന്യമായ കാവ്യഭാന കൊണ്ട്‌ അനുഗ്രഹീതനായിരുന്നു ഗിരീഷ്‌ പുത്തഞ്ചേരി. തിരക്കഥയിലേക്കിറങ്ങിച്ചെല്ലാനും കഥാപാത്രങ്ങളുടെ മാനസിക സ്ഥിതി തിരിച്ചറിഞ്ഞ് വരികളൊരുക്കുവാനുമുള്ള കഴിവ്‌ ഗിരീഷിനുണ്ടായിരുന്നു. മറ്റു ഗാനരചയിതാക്കളില്‍ നിന്നും വ്യത്യസ്തമായി, സംഗീതത്തിലുണ്ടായിരുന്ന അവഗാഹം, താളാത്മകവും മനോഹരവുമായ വരികളൊരുക്കുന്നതിന് ഗിരീഷിനെ സഹായിച്ചിരുന്നു, ഒരു പക്ഷേ അതു തന്നെയാവും ഗിരീഷിനെ വ്യത്യസ്തനാക്കിയത്‌.

കോഴിക്കോട്ടെ ഒരു സാധാരണ കുടുംബത്തില്‍ ജനിച്ച ഗിരീഷ്, ജന്മം കൊണ്ടു തന്നെ അനുഗ്രഹീതനായിരുന്നു. എന്നാല്‍ ഉപജീവനാര്‍ഥമാണ് അദ്ദേഹം ഗാന രംഗത്തേക്ക്‌ തിരിഞ്ഞത്‌. വിദ്യാഭ്യാസകാലത്തുതന്നെ കവിതാരചനയില്‍ കഴിവ്‌ തെളിയിച്ച അദ്ദേഹം പിന്നീട് ആകാശവാണിയുടെ വിവിധ നിലയങ്ങള്‍ക്കായി ലളിതഗാനങ്ങള്‍ എഴുതിക്കൊണ്ടാണ് സജീവമായത്‌. അതിനു ശേഷം എച്ച്.എം.വി., തരംഗിണി തുടങ്ങിയ റെക്കോഡിങ് കമ്പനികള്‍ക്കുവേണ്ടിയും ടെലിവിഷന്‍ ചാനലുകള്‍ക്കുവേണ്ടിയും ഒട്ടേറെ ഗാനങ്ങള്‍ രചിച്ചു. എന്നാല്‍ സിനിമാ രംഗത്തേക്ക്‌ കടന്ന ഗിരീഷിന്റെ തുടക്കം അത്ര മികച്ചതായില്ല. ആദ്യം കുറെ ചിത്രങ്ങള്‍ക്കായി വരികളൊരുക്കിയെങ്കിലും ഒന്നും തന്നെ ശ്രദ്ധിക്കപ്പെട്ടില്ല. രണ്ടു ദശാബ്ദംമുമ്പ് പുറത്തിറങ്ങിയ 'ചക്രവാളത്തിനപ്പുറം' എന്ന ചിത്രത്തിനുവേണ്ടിയാണ് ആദ്യഗാനം എഴുതിയത്. എന്നാല്‍ രഞ്ജിത്തെഴുതി ജയരാജ്‌ സംവിധാനം ചെയ്ത ജോണിവാക്കറില്‍, എസ്.പി വെങ്കിടേഷിന്റെ ഈണത്തിന് വരികളൊരുക്കിയ ഗിരീഷിന്റെ ഗാനങ്ങള്‍ സൂപ്പര്‍ ഹിറ്റായി. അതോടെ ഗിരീഷ്‌ ശ്രദ്ധിക്കപ്പെട്ടും. ദേവാസുരത്തിലെ സൂര്യകിരീടം വീണുടഞ്ഞു എന്ന ഗാനത്തിന് വരികളെഴുതിയ ഗിരീഷിന്, പിന്നീട്‌ ഒരിക്കലും തിരിഞ്ഞു നോക്കേണ്ടി വന്നിട്ടില്ല. ഏകദേശം 328 ചിത്രങ്ങളിലായി 1556 ഗാനങ്ങള്‍ അദ്ദേഹം രചിച്ചു. 'അഗ്‌നിദേവനി'ലെ ഗാനത്തിന് 1995-ല്‍ ആദ്യത്തെ സംസ്ഥാന ചലച്ചിത്ര അവാര്‍ഡ് അദ്ദേഹത്തെത്തേടിയെത്തി. 1997 (കൃഷ്ണഗുഡിയില്‍ ഒരു പ്രണയകാലത്ത്), 1999 (പുനരധിവാസം), 2001 (രാവണപ്രഭു), 2002 (നന്ദനം), 2003 (ഗൗരീശങ്കരം), 2004 (കഥാവശേഷന്‍) എന്നീ വര്‍ഷങ്ങളിലും മികച്ച ഗാനരചയിതാവിനുള്ള സംസ്ഥാന ചലച്ചിത്ര അവാര്‍ഡ് ഗിരീഷ് സ്വന്തമാക്കി.

ഗിരീഷ്‌ ഏറ്റവും കൂടുതല്‍ ഹിറ്റുകള്‍ സ്രുഷ്ടിച്ചത്‌ വിദ്യാസാഗറിനൊപ്പമായിരുന്നു. അവര്‍ തമ്മിലുള്ള ആത്മബന്ധം വളരെയധികം ഹിറ്റുഗാനങ്ങള്‍ മലയാളിക്ക്‌ സമ്മാനിച്ചു. ട്യൂണിട്ട്‌ പാട്ടെഴുതുക എന്നതിലുപരി, ഗിരീഷിന്റെ വരികള്‍ക്ക്‌ സംഗീതം നല്‍കുക എന്നതാണ് വിദ്യാസാഗര്‍ ചെയ്തത്‌. അതു കൊണ്ടു തന്നെ കവിതാ സ്പര്‍ശമുള്ള വളരെയധികം ഗാനങ്ങള്‍ ആ കൂട്ടുകെട്ടില്‍ നിന്നും പിറന്നു. പിന്നെയും പിന്നെയും, ആരോ വിരല്‍ മീട്ടി, എത്രയോ ജന്മമായി, ഒരു രാത്രി കൂടി വിട വാങ്ങവേ, മറന്നിട്ടുമെന്തിനോ, ആരോരാള്‍ പുലര്‍മഴയില്‍, കരിമിഴി കുരുവിയെ, തൊട്ടുരുമ്മി ഇരിക്കാന്‍, കണ്ണാടി കൂടും കൂട്ടി... അങ്ങനെ തുടരുന്നു ആ നീണ്ട നിര. അന്തരിച്ച സംഗീത സംവിധായകന്‍ രവീന്ദ്രന്റേയും പ്രിയപ്പെട്ട ഗാനരചിയിതാവായിരുന്നു ഗിരീഷ്‌. വരികളെഴുതുന്നത്‌ ഗിരീഷെങ്കില്‍, സംഗീതമൊരുക്കാ‍ന്‍ തനിക്കൊരു പ്രയാസവുമില്ല എന്നായിരുന്നു രവീന്ദ്രന്‍ ഒരിക്കല്‍ പറഞ്ഞത്‌. കാര്‍മുകില്‍വര്‍ണന്റെ, കളഭം തരാം, ഒരു കിളി പാട്ട് മൂളവേ, ഹരി മുരളീരവം, പാടി തൊടിയിലേതോ, ഗംഗേ തുടങ്ങിയ ഹിറ്റു ഗാനങ്ങള്‍ ഈ കൂട്ടുകെട്ടിന്റെ സംഭാവനയാണ്. എം.ജയചന്ദ്രന്‍, എം.ജി രാധാക്രുഷ്ണന്‍, ജോണ്‍സണ്‍ എന്നിവരുമായും ഗിരീഷിന്റെ കൂട്ടുകെട്ട്‌ ഒട്ടേറെ ഹിറ്റു ഗാനങ്ങള്‍ മലയാളിക്ക്‌ സമ്മാനിച്ചു. ഗിരീഷ്‌ ഗാനരചന നടത്തിയ ജോണി വാക്കര്‍, കാശ്മീരം, മിന്നാരം, കാലാപാനി, ഈ പുഴയും കടന്ന്, ചന്ദ്രലേഖ, ഒരു യാത്രാമൊഴി, സമ്മര്‍ ഇന്‍ ബത്‌ലഹേം, കന്മദം, ഒരു മറവത്തൂര്‍ കനവ്, നിറം, രാക്കിളിപ്പാട്ട്, ഗ്രാമഫോണ്‍, മീശമാധവന്‍, ബാലേട്ടന്‍, അച്ചുവിന്റെ അമ്മ, കഥപറയുമ്പോള്‍, വടക്കുംനാഥന്‍, ബനാറസ് തുടങ്ങിയ ചിത്രങ്ങളിലെ ഗാനങ്ങള്‍ ശ്രദ്ധയാകര്‍ഷിച്ചു. ഗാനരചനയില്‍ മാത്രമല്ല, മേലേപ്പറമ്പില്‍ ആണ്‍വീട് എന്ന ചിത്രത്തിന്റെ കഥയും 'കിന്നരിപ്പുഴയോരം', 'പല്ലാവൂര്‍ ദേവനാരായണന്‍', 'വടക്കുംനാഥന്‍', 'മേഘതീര്‍ഥം' എന്നിവയുടെ തിരക്കഥ, സംഭാഷണം എന്നിവയും അദ്ദേഹം രചിച്ചു. ഷഡ്ജം, തനിച്ചല്ല എന്നീ കവിതാ സമാഹാരങ്ങളും പ്രസിദ്ധീകരിച്ചിട്ടുണ്ട്.

ട്യൂണിട്ട്‌ ഗാനമെഴുതുമ്പോള്‍ പല ഗാനരചയിതാക്കളും വാക്കുകള്‍ കൊണ്ട്‌ സര്‍ക്കസ്സുകള്‍ കാണിക്കുന്നത്‌ നാം കണ്ടിട്ടുണ്ട്‌. എന്നാല്‍ ഗിരീഷ്‌ വ്യത്യസ്തനായത്‌ അവിടെയാണ്. സംഗീത സംവിധാ‍യകര്‍ ചിട്ടപ്പെടുത്തുന്ന ട്യൂണുകള്‍ക്ക്‌ അനായാസം വരികളെഴുതുക എന്നത്‌ ഗിരീഷിന്റെ കഴിവായിരുന്നു, എന്നു മാത്രമല്ല, ആ വരികള്‍ക്ക് കാവ്യഭഗി ഒട്ടും നഷ്ടപ്പെടുകയും ചെയ്തിരുന്നില്ല. വെറുതെ ട്യൂണുകള്‍ക്ക്‌ വരികളെഴുതാതെ, തിരക്കഥയെയും കഥാ സന്ദര്‍ഭത്തെയും അടുത്തറിയുവാനും, അതിനൊപ്പിച്ച്‌ വരികളെഴുതുവാനും ഗിരീഷിന് കഴിഞ്ഞിരുന്നു എന്ന്‌ പ്രമുഖ സംവിധായകരെല്ലാം സാക്ഷ്യപ്പെടുത്തുന്നു. കഥാ സന്ദര്‍ഭത്തിന് ചേരുന്നതു വരെ എഴുതിയ വരികളില്‍ മാറ്റം വരുത്തുവാനും ഗിരീഷ്‌ തയ്യാറായിരുന്നു എന്നും അവര്‍ ചൂണ്ടിക്കാണീക്കുന്നു. ഉപജീവന മാര്‍ഗ്ഗത്തിനായി ഗാന രചന ആരംഭിച്ച തന്റെ ശക്തി, വാക്കുകളൊടുങ്ങാത്ത ആവനാഴിയാണെന്ന്‌ അഭിമാനത്തോടെ ഗിരീഷ്‌ പറയുമായിരുന്നു. ഇത്രയധികം വൈവിധ്യം പ്രകടമാക്കുന്ന ഒരു ഗാനരചയിതാവും നമുക്കിന്നില്ല എന്നത്‌ ദുഖകരമായ സത്യമാണ്. ഗിരീഷിന്റെ വിടവാങ്ങല്‍ നമുക്കിടയില്‍ സ്രുഷ്ടിച്ച ആ ശൂന്യത അങ്ങനെ തന്നെ നില്‍ക്കും...

ആ മഹാനായ കലാകാരനു മുന്നില്‍ സാഷ്ടാംഗം നമിക്കുന്നു... ആദരാഞ്ജലികള്‍...

ഓസ്കാര്‍ പ്രഭയില്‍ ഇന്ത്യ

ഞാന്‍ വരുന്നത് ലോകത്തിനു മഹത്തായൊരു ശബ്ദം നല്‍കിയ നാട്ടില്‍ നിന്നാണ്,
ആദ്യം നിശ്ശബ്ദത, പിന്നെയും നിശ്ശബ്ദത, ആ വാക്കാവട്ടെ, ഓം എന്നായിരുന്നു!
‌-റസൂല്‍ പൂക്കുട്ടി

2009 ലെ ഓസ്കാര്‍ വേദി ഇന്ത്യക്കു സ്വന്തം. ലോസ്‌ ഏഞ്ചല്‍സിലെ കൊഡാക്‌ തീയേറ്ററില്‍ അവാര്‍ഡുകള്‍ വിതരണം തുടങ്ങിയപ്പോള്‍ തന്നെ ഭാരതമൊട്ടാകെ മുള്‍മുനയിലായിരുന്നു. ഒടുവില്‍ സ്ലംഡോഗ്‌ മില്ലനയര്‍ എന്ന ചിത്രത്തിലെ ശബ്ദമിശ്രണത്തിന്‌ റസൂല്‍ പൂക്കുട്ടിയും, സംഗീതത്തിനും പശ്ചാത്തല സംഗീതത്തിന്‌ എ.ആര്‍ റഹ്മാനും ഓസ്‌കാര്‍ ലഭിച്ചത്തോടെ ഇന്ത്യ ആവേശത്തിമിര്‍പ്പിലായി. മുംബൈയിലെ ചേരി നിവാസികളുടെ കഥ പറഞ്ഞ സ്‌ലംഡോഗ്‌ മില്യണയര്‍ , എ.ആര്‍ റഹ്‌മാന്‍ (രണ്ട്‌ ഓസ്‌കാര്‍), റസൂല്‍ പൂക്കുട്ടി എന്നിവരുടേത്‌ ഉള്‍പ്പെടെ എട്ട്‌ അവാര്‍ഡുകളാണ്‌ വാരിക്കൂട്ടിയത്‌. 2009 ലെ ഓസ്‌കര്‍ അവാര്‍ഡുകളില്‍ നിറഞ്ഞുനിന്നത്‌ ഇന്ത്യയും സ്‌ലംഡോഗ്‌ മില്യണയര്‍ എന്ന ചിത്രവുമായിരുന്നു.

കൊല്ലം അഞ്ചല്‍ സ്വദേശിയാണ്‌ ശബ്‌ദമിശ്രണത്തിന്‌ ഓസ്‌കര്‍ നേടിയ റസൂല്‍ പൂക്കുട്ടി. ചരിത്രത്തില്‍ ആദ്യമായാണ്‌ ഒരു മലയാളി ഈ നേട്ടം കൈവരിക്കുന്നത്‌. പുരസ്‌കാരം രാജ്യത്തിന്‌ സമര്‍പ്പിക്കുന്നുവെന്ന്‌ അവാര്‍ഡ്‌ സ്വീകരിച്ചുകൊണ്ട്‌ റസൂല്‍ പൂക്കുട്ടി പറഞ്ഞു. ഇയാന്‍ ടാപ്പ്‌, റിച്ചാര്‍ഡ്‌ പ്രൈക്‌ എന്നവര്‍ക്കൊപ്പമാണ്‌ റസൂലിനും അവാര്‍ഡ്‌ ലഭിച്ചത്‌. സംഗീതത്തിന്‌ പുറമേ, സ്‌ലംഡോഗ്‌ മില്യണയറിലെ ഗുല്‍സാര്‍ എഴുതിയ ജയ്‌ ഹോ എന്ന്‌ തുടങ്ങുന്ന ഗാനത്തിനും ഓസ്‌കര്‍ ലഭിച്ചതോടെ റഹ്‌ മാന്‌ ഇത്‌ ഇരട്ട നേട്ടമായി. ഡോക്യുമെന്റററി വിഭാഗത്തില്‍ സ്‌മൈല്‍ പിങ്കിയും അവാര്‍ഡ്‌ നേടിയതോടെ ഇന്ത്യക്ക്‌ ലഭിച്ച അംഗീകാരം നാലായി. റിച്ചാര്‍ഡ്‌ ആറ്റന്‍ബറോയുടെ ഗാന്ധി യെന്ന സിനിമയിലെ വസ്‌ത്രാലങ്കാരത്തിന്‌ ഭാനു അത്തയ്യയും(1982) ആജീവനാന്ത നേട്ടത്തിന്‌ സത്യജിത്‌ റായും(1991) മാത്രമാണ്‌ ഇതിനുമുമ്പ്‌ ഓസ്‌കറില്‍ ആദരിക്കപ്പെട്ടിട്ടുള്ള ഇന്ത്യക്കാര്‍.

സ്‌ലംഡോഗ്‌ മില്യണയറിന്‌ ലഭിച്ച അവാര്‍ഡുകള്‍
1.മികച്ച ചിത്രം
2.സംവിധായകന്‍-ഡാനി ബോയല്‍
3.അവലംബിത തിരക്കഥ-സൈമണ്‍ ബോഫോയി
4.ഛായാഗ്രഹണം-ആന്റണി ഡോഡ്‌ മാന്റലെ
5.സംഗീതം-എ.ആര്‍ റഹ്‌മാന്‍
6.ഗാനം-ജയ്‌ ഹോ
7.ശബ്‌ദമിശ്രണം-റസൂല്‍ പൂക്കുട്ടി
8.ചിത്രസംയോജനം-ക്രിസ്‌ ഡിക്കന്‍സ്‌

സംഗീതത്തിന്റെ രാജകുമാരന്‌ ജന്മദിനാശംസകള്‍

ഇന്ത്യന്‍ സംഗീത ശാഖയുടെ സ്വകാര്യ അഹങ്കാരമായ സംഗീത മാന്ത്രികന്‍ അള്ളാ രഖാ റഹ്മാനെന്ന എ.ആര്‍ റഹ്മാന്‌ എന്റെ സ്നേഹം നിറഞ്ഞ ജന്മദിനാശംസകള്‍. സംഗിതം കൊണ്ട്‌ നമ്മേ വിസ്മയിപ്പിച്ചിട്ടുള്ള അദ്ദേഹത്തിന്റെ ജനനം 1966, ജനുവരി 6ന്‌ ചെന്നയില്‍ ആയിരുന്നു. തെന്നിന്ത്യന്‍ സിനിമകള്‍ക്ക്‌, പ്രത്യേകിച്ച്‌ മലയാളത്തില്‍ നിരവധി ഗാനങ്ങള്‍ക്ക്‌ സംഗീത സംവിധാനം നല്‍കിയ ആര്‍.കെ.ശേഖറാണ്‌ അദ്ദേഹത്തിന്റെ പിതാവ്‌. സംഗീത കുടുംബത്തില്‍ ജനിച്ച റഹ്മാന്റെ ആദ്യനാമം ദിലീപ്‌ കുമാര്‍ എന്നായിരുന്നു. പിന്നീട്‌ കുടുംബമൊന്നാകെ മതം മാറിയപ്പോള്‍ അദ്ദേഹം റഹ്മാനെന്ന നാമം സ്വീകരിച്ചു. വിവിധ വാദ്യോപകരണങ്ങള്‍ വായിച്ചിരുന്ന അദ്ദേഹം ചെറുപ്രായത്തില്‍ തന്നെ പല ബാന്ഡുകളിലും അംഗമായിരുന്നു. അതു വഴി അദ്ദേഹം ഇളയരാജയുടെ ട്രൂപ്പിലും എത്തി. എം.എസ്‌ വിശ്വനാഥന്‍, രമേഷ്‌ നായിഡു എന്നിവരുറ്റെ ട്രൂപ്പുകളില്‍ ജോലി നോക്കിയ അദ്ദേഹം, കുന്നക്കുടി, സാക്കിര്‍ ഹുസൈന്‍ എന്നിവരുമൊത്ത്‌ കലാപരിപാടികള്‍ക്കായി ലോകപര്യടനവും നടത്തി.

1991ല്‍ സ്വന്തമായി പഞ്ചതന്ത്രമെന്ന റെക്കോര്‍ഡിങ് സ്റ്റൂഡിയോ തുടങ്ങിയ അദ്ദേഹം, കുറെ പരസ്യചിത്രങ്ങള്‍ക്ക്‌ സംഗീതസംവിധാനവും നിര്‍വഹിച്ചു. തുള്ളി നീലം ഹായ്‌.. എന്നു തുടങ്ങുന്ന റീഗല്‍ തുള്ളിനീലത്തിന്റെ പരസ്യം ഇന്ത്യക്കാര്‍ മറക്കുമെന്ന്‌ തോന്നുന്നില്ല. 1992ല്‍ മണിരത്നം, തന്റെ ചിത്രത്തിനായി ഒരു പുതുമുഖത്തെ തേടുന്നതിനിടെയാണ്‌ റഹ്മാനെക്കുറിച്ചറിയുന്നതും അദ്ദേഹത്തെ "റോജ"ക്കായി സംഗീത സംവിധാനം ചെയ്യാന്‍ ക്ഷണിക്കുന്നതും. അത്‌ അദ്ദേഹത്തിന്റെ കരിയറിലെ വഴിത്തിരിവായിരുന്നു. ആദ്യ ചിത്രത്തിലൂടെ തന്നെ മികച്ച സംഗീതസംവിധായകനുള്ള രജത കമലം സ്വന്തമാക്കിയ അദ്ദേഹം പിന്നീട്‌ തിരിഞ്ഞു നോക്കിയില്ല. കഴിഞ്ഞ 17 വര്‍ഷമായി നമ്മേ, പല ഭാഷകളില്‍ മികച്ച സംഗീതം നല്‍കി ആനന്ദിപ്പിച്ചു കൊണ്ടിരിക്കുന്നു. മുഖ്യധാരയിലേക്കു വരുന്നതിനു മുന്നെ, അദ്ദേഹം യോദ്ധാ എന്ന മലയാള ചിത്രത്തിനും സംഗീതം നല്‍കി. മിന്‍സാര കനവ്‌, ലഗാന്‍, കണ്ണത്തില്‍ മുത്തമിട്ടാല്‍ തുടങ്ങിയ ചിത്രങ്ങളിലൂടെ അദ്ദേഹം വീണ്ടും മൂന്നു തവണ കൂടി രജത കമലം സ്വന്തമാക്കി. സംഗീത സംവിധായകന്‍ എന്നതിലുപരി, സ്വന്തം സംഗീതത്തില്‍ പാടി മികച്ച ഒരു പിടി ഗാനങ്ങളും അദ്ദേഹം നമുക്ക്‌ സമ്മാനിച്ചു. വെള്ളൈ പൂക്കള്‍, ദില്‍സേ രെ...എന്നിവ ഉദാഹരണങ്ങള്‍ മാത്രം. അദ്ദേഹത്തിന്റെ ആല്‍ബങ്ങളായ വന്ദേമാതരവും ജനഗണമനയും ഇന്ത്യന്‍ സംഗീത പ്രേമികളെ തെല്ലൊന്നുമല്ല സ്വാധീനിച്ചത്‌. വ്യത്യസ്തമായ ഗാനങ്ങള്‍ ഒരുക്കുന്ന അദ്ദേഹം, ഏതാനും ഇംഗ്ലീഷ്‌ ചിത്രങ്ങള്‍ക്കും ഈണം പകര്‍ന്നു. തമിഴ്‌ നാട്‌ സര്‍ക്കാരിന്റേയും ഫിലിം ഫെയര്‍ അവാര്‍ഡുകള്‍ വാരിക്കൂട്ടിയ അദ്ദേഹത്തെ, ഭാരത സര്‍ക്കാര്‍ പത്മശ്രീ നല്‍കി ആദരിച്ചു. അടുത്തിടെ അദ്ദേഹത്തെ ഗോള്‍ഡന്‍ ഗ്ലോബ്‌ അവാര്‍ഡിനും നോമിനേറ്റ്‌ ചെയ്യപ്പെട്ടു.

ഇനിയും മികച്ച ഗാനങ്ങള്‍ ഈ ലോകത്തിനു സംഭാവന ചെയ്യാന്‍ അദ്ദേഹത്തിന്‌ കഴിയട്ടെ എന്നും അദ്ദേഹം ഇനിയും പ്രശസ്തിയുടെ ഔന്നത്യത്തിലെത്തട്ടെ എന്നും ഹൃദയപുരസ്സരം ആശംസിക്കുന്നു....

എ.ആര്‍.റഹ്മാനെക്കുറിച്ച്‌ കൂടുതല്‍ അറിയാന്‍ സന്ദര്‍ശിക്കുക.

ഭീംസെന്‍ജോഷിക്ക്‌ ഭാരതരത്‌നം

ഹിന്ദുസ്ഥാനി സംഗീതത്തിലെ കുലപതി ഭീംസെന്‍ജോഷിക്ക്‌ ഭാരതത്തിലെ പരമോന്നത ബഹുമതിയായ ഭാരതരത്‌നം. ഇന്ത്യന്‍ ശാസ്‌ത്രീയ സംഗീതത്തിന്റെ നവോത്ഥാനത്തിന്‌ നേതൃത്വം നല്‍കിയ ജോഷി കിരാന ഖരാനയിലെ വിവിധ ആലാപന ശൈലികള്‍ക്ക്‌ പൂര്‍ണത നല്‍കി. പദ്‌മവിഭൂഷണ്‍, പദ്‌മഭൂഷണ്‍, പദ്‌മശ്രീ തുടങ്ങിയ ഉന്നത ബഹുമതികള്‍ ഈ എണ്‍പത്താറുകാരനെ തേടിയെത്തിയിട്ടുണ്ട്‌. കിരാന ഖരാന പരമ്പരയിലെ മധുരശബ്ദത്തിന്റെ ഉടമയായ ഭീംസെന്‍ജോഷി ഹിന്ദുസ്ഥാനി സംഗീതത്തിലെ ഏറ്റവും അറിയപ്പെടുന്ന വ്യക്തിത്വങ്ങളിലൊരാളാണ്‌. 1988-ല്‍ ബാലമുരളീകൃഷ്‌ണ, ലതാ മങ്കേഷ്‌കര്‍ എന്നിവരോടൊപ്പം ആലപിച്ച 'മിലേ സുര്‍ മേരാ തുമാര' എന്ന ഗാനം ഇന്ത്യയിലെ അനൗദ്യോഗിക ദേശീയഗാനം എന്ന നിലയില്‍ പ്രശസ്‌തി നേടി. ഈഗാനം ദൂരദര്‍ശന്‍ പലതവണ പ്രക്ഷേപണം ചെയ്‌തിരുന്നു. പ്രശസ്‌ത സംഗീതജ്ഞരായ ലൂയി ബാങ്ക്‌സ്‌, അന്തരിപ്പിച്ച പി. വൈദ്യനാഥന്‍ എന്നിവരാണ്‌ ഈ ഗാനത്തിന്‌ സംഗീതം നല്‍കിയത്‌.

സംഗീതത്തിലെ കുലഗുരുവിനെ തേടിയായിരുന്നു ഭീംസെന്‍ജോഷിയുടെ ജീവിതയാത്ര. ആ യാത്ര ചെന്നെത്തിയതാകട്ടെ, ഭാരതരത്‌നം നേടിയ എം.എസ്‌. സുബ്ബലക്ഷ്‌മിയെപോലെ, പരമമായ, സംഗീതത്തിന്റെ സിംഹാസനത്തില്‍. കര്‍ണാടകത്തിലെ ധര്‍വാറിലെ ഗുരുരാജ്‌ജോഷിയുടെ മകനായ ഭീംസെന്‍ജോഷി ഉസ്‌താദ്‌ അബ്ദുള്‍കരീംഖാന്റെ സംഗീതത്തില്‍ ഭ്രാന്തമായ അഭിനിവേശം പുലര്‍ത്തി. കരിംഖാന്റെ 'ചന്ദ്രീകാ ഹീ ജാനൂണ്‍' എന്ന റെക്കോഡ്‌ കേട്ടാണ്‌ കൊച്ചു ഭീംസെന്‍ പാട്ടുകാരനാവാന്‍ ഉറച്ചത്‌. പതിനൊന്നാം വയസ്സില്‍, പാട്ടിനായി വീടുവിട്ടിറങ്ങിയ ജോഷി, കള്ള വണ്ടികയറി. തീവണ്ടിയില്‍ ടിക്കറ്റ്‌ എക്‌സാമിനര്‍മാരില്‍നിന്ന്‌ രക്ഷപ്പെടാന്‍ പാട്ടുപാടി. ഗ്വാളിയറിലെത്തിയ ജോഷി ഉസ്‌താദ്‌ഹാഫിസ്‌ഖാന്റെയും വിനായക്‌റാവുപട്‌വര്‍ദ്ധന്റെയും മുമ്പില്‍ സംഗീതത്തിനായി അഭയം തേടിയെത്തി. അവിടെനിന്ന്‌ അബ്ദുള്‍കരീംഖാന്റെ ശിഷ്യനായ സവായ്‌ഗാന്ധര്‍വയുടെ ഗുരുകുലത്തിലെത്തി. കിരാനഘരാനയുടെ പതാകാവാഹകനായ സവായ്‌ഗാന്ധര്‍വ, ഭീംസെന്നിനെ കഠിനപരീക്ഷണങ്ങള്‍ക്കു വിധേയനാക്കി. ഗുരുവിന്‌ വെള്ളംകോരിയും കടുക്‌പാടങ്ങളില്‍ പണിയെടുത്തുംചന്ദനമരച്ചുനല്‍കിയും കഴിഞ്ഞുകൂടിയ ഭീംസെന്‍ കേള്‍വിയിലൂടെ സംഗീതജ്ഞാനം പിടിച്ചെടുത്തു. ഗുരു പിന്നീട്‌ ഭീംസെന്നിനെ ശരിക്കും പഠിപ്പിക്കാന്‍ തുടങ്ങി. പന്ത്രണ്ടുമണിക്കൂര്‍ സാധകം ചെയ്‌ത്‌ ഭീംസെന്‍ ഗുരുവിന്റെ ലോകത്തിലേക്ക്‌ കടന്നു. ഖയാലും ഭജനും ഠുമ്രിയുമൊക്കെ ആ നാദബ്രഹ്മത്തിനു വഴങ്ങി.

1946ല്‍ പൂനയില്‍ സവായ്‌ഗാന്ധര്‍വയുടെ പിറന്നാള്‍ ദിനത്തില്‍ മിയാന്‍ കിമല്‍ ഹര്‍ പാടി ഭീംസെന്‍ സംഗീതപ്രേമികളെ ആനന്ദലോകത്തിലാറടിച്ചു. പിന്നീട്‌ ഗംഗയെപോലെ ആ നാദം ഭാരതഹൃദയത്തിലൂടെ നിറഞ്ഞൊഴുകി. ഗാംഭീര്യമാര്‍ന്ന ആ ശബ്ദത്തില്‍ ഭാവാത്മകത കൈവരുത്തുവാനും ജോഷിക്കു കഴിഞ്ഞു. അമീര്‍ഖാനും കേസര്‍ ഭായി കേര്‍ക്കറും എപ്പോഴും ജോഷിക്ക്‌ സംഗീതത്തിന്റെ ഊര്‍ജമായി നിലകൊണ്ടു. പല ഖരാനകളേയും അദ്ദേഹം ഉള്‍ക്കൊണ്ടു. ജോഷി പാടുമ്പോള്‍, ഭാരതീയസംഗീതം ഭാവാത്മകവും സൗന്ദര്യപൂര്‍ണവുമാകുന്നു. യമന്‍, ലളിത്‌, കാഫി, മാര്‍വ, പൂരിയ, ഭൈരവി, ശുദ്ധകല്ല്യാണ്‍ തുടങ്ങിയ രാഗങ്ങളില്‍ ജോഷി അമരനായ കലാകാരനായി മാറുന്നു. പണ്ഡിറ്റ്‌ വിനായക്‌തോര്‍വിയെ പോലെയുള്ള ശിഷ്യര്‍ അദ്ദേഹത്തില്‍ ഗുരുവിനെയും ഭാരതീയ സംഗീതത്തിന്റെ രക്ഷാപുരുഷനെയും കാണുന്നു. പത്മശ്രീയും, പത്മഭൂഷണും, പത്മവിഭൂഷണിനും ശേഷം, ഭാരതരത്‌നം ജോഷിയിലെത്തുമ്പോള്‍ ആരും വിസ്‌മയിക്കുന്നില്ല.

കടപ്പട്‌ : മാതൃഭൂമി

വോയിസ്‌ ഓഫ്‌ ദ പാറ്‍ക്ക്‌ (Voice Of The Park)

തിരുവനന്തപുരം ടെക്‌നോപാറ്‍ക്കിലെ ഒരു പറ്റം ഐ.ടി. ഉദ്യോഗാറ്‍ത്ഥികള്‍ ചേറ്‍ന്നൊരുക്കിയ ഒരു മനോഹരമായ സംഗീത ആല്‍ബമാണിത്‌. മലയാളം, ഹിന്ദി, തമിഴ്‌, ഇംഗ്ളീഷ്‌ തുടങ്ങി നാലു ഭാഷകളിലായി ഏഴ്‌ മനോഹരമായ ഗാനങ്ങളാണ്‌ ഇതിലുള്ളത്‌. മെലഡിയും ഫ്യൂഷനും റോക്കുമെല്ലാം ചേറ്‍ന്ന ഈ ആല്‍ബത്തിലെ ഗാനങ്ങള്‍ ആരെയും ആകറ്‍ഷിക്കുന്നവയാണ്‌. ഇതില്‍ സഹകരിച്ചിരിക്കുന്ന കലാകാരന്‍മാരുടെ ആദ്യത്തെ ഉദ്യമമാണിത്‌. പക്ഷെ ഗാനങ്ങള്‍ കേട്ടാല്‍ അത്‌ തോന്നുകയില്ല. ഇതിണ്റ്റെ സംഗീതമൊരുക്കിയതും, വരികളെഴുതിയതും മുതല്‍ ആല്‍ബത്തിണ്റ്റെ സി.ഡി കവറ്‍ ഡിസൈന്‍ ചെയ്തത്‌ വരെ ടെക്‌നോപാറ്‍ക്കിലെ ഐ.ടി.പ്രൊഫഷണലുകളാണ്‌. ഈ ആല്‍ബം കഴിഞ്ഞ ജനുവരി 25ന്‌ ടെക്‌നോപാറ്‍ക്കില്‍ വച്ചു നടന്ന പ്രൌഢശബളമായ ചടങ്ങില്‍, ചലച്ചിത്ര നടന്‍ ശ്രീ. ഭരത്‌ മോഹന്‍ലാല്‍ പ്രകാശനം ചെയ്തു. ഏകദേശം 8000ല്‍ അധികം സി.ഡികള്‍ സൌജന്യമായി വിതരണം ചെയ്തു കൊണ്ടാണ്‌ ഈ ആല്‍ബം പുറത്ത്‌ വന്നത്‌. ഇത്‌ ഒരു റെക്കാറ്‍ഡാണ്‌.

ഈ ആല്‍ബത്തിന്‌ ഒരിക്കലുമുണ്ടാകാത്ത വിധം നല്ല പ്രതികരണമാണ്‌ ലഭിച്ചത്‌. ഇത്‌ തിരുവനന്തപുരം കടന്ന്‌ ബാംഗളൂറ്‍, ചെന്നൈ, മുംബെ പോലുള്ള മഹാനഗരങ്ങളില്‍ എത്തിക്കഴിഞ്ഞു. ടെക്‌നോപാര്‍ക്കിലെ ഉദ്യോഗാറ്‍ത്ഥികള്‍ടെ ഈ കൂട്ടായ്മ വിളിച്ചോതുന്നത്‌, കോറ്‍പ്പറേറ്റ്‌ വരമ്പുകള്‍ക്കപ്പുറം എല്ലവരും സംഗീതസ്നേഹികളാണെന്നും, സര്‍വ്വോപരി സാധാരണക്കാരായ മനുഷ്യരാണെന്നുമാണ്‌. ഒരേ ഹൃദയം, ഒരേ ആത്മാവ്‌, ഒരേ സ്വരം എന്ന ആശയത്തില്‍ ഇറങ്ങിയ ഈ ഉദ്യമം ലക്ഷ്യം കണ്ടുവെന്നു തന്നെ പറയാം. ഇതിനു പിറകില്‍ പ്രവറ്‍ത്തിച്ചത്‌ യു.എസ്‌. ടി ഗ്ളോബലിലെ ഉദ്യോഗാറ്‍ത്ഥികളായ അരുണ്‍ നാരയണന്‍, ആനന്ദ്‌ വെങ്കിട്ടരാമന്‍, കിരണ്‍ രാജേന്ദ്രന്‍, ഹരികൃഷ്ണന്‍ നമ്പൂതിരി എന്നിവരാണ്‌. ഇതിണ്റ്റെ രചനയും സംഗീതവും നിറ്‍വ്വഹിച്ചിരിക്കുന്നത്‌ അരുണ്‍.കെ.നാരായണന്‍ ആണ്‌. ഒരു ഗാനത്തിന്‌ ആനദ്‌ കൌശിക്കും സംഗീതം നല്‍കിയിരിക്കുന്നു. പാടിയിരിക്കുന്നത്‌ കിരണ്‍, ആനന്ദ്‌ വെങ്കിട്ടരാമന്‍, ടീന മേരി, ആദറ്‍ശ്‌, നന്ദകുമാറ്‍, നീലിമ, ശ്രീഹരി, മുരളീ രാമനാഥന്‍ (ഐഡിയ സ്റ്റാറ്‍ സിംഗറ്‍ ഫെയിം), ലൂയിസ്‌ എന്നിവരാണ്‌.

ഈ ആല്‍ബത്തിലെ ഗാനങ്ങള്‍...
1. ആംഖോംകി - കിരണ്‍ (ഹിന്ദി)
2. സെല്‍ഫോണ്‍ നിലവേ - ആനന്ദ്‌ വെങ്കിട്ടരാമന്‍ (തമിഴ്‌)
3. സംഗീതമേ - ടീന മേരി, ആദര്‍ശ്‌ (മലയാളം)
4. ഝൂമേ - നന്ദകുമാര്‍ (ഹിന്ദി)
5. കാറ്റ്രേ - നീലിമ, ശീഹരി (തമിഴ്‌)
6. ഏതോ കിനാവില്‍ - മുരളി രാമനാഥന്‍ (മലയാളം)
7. വോയിസ്‌ ഓഫ്‌ ദ പാറ്‍ക്ക്‌ - ലൂയിസ്‌ (ഇംഗ്ളീഷ്‌)
ബോണസ്സ്‌ ട്രാക്ക്‌ - ഝൂമേ - ആനന്ദ്‌ കൌശിക്ക്‌ (ഹിന്ദി)

ആദ്യത്തെ ഗാനം ആംഖോകി എന്നു തുടങ്ങുന്ന ഹിന്ദി ഗാനമാണ്‌. ഇതാലപിച്ചിരിക്കുന്നത്‌ കിരണാണ്‌. സംഗീതസാന്ദ്രമായ ഒരു ഗാനമാണ്‌. വരികള്‍ക്കൊപ്പിച്ചുള്ള സംഗീതം ഇതിനെ ആകറ്‍ഷകമാക്കുന്നു. സെല്‍ഫോണ്‍ നിലവേ എന്നു തുടങ്ങുന്ന തമിഴ്‌ ഗാനം കാതിനിമ്പമുള്ളതാണ്‌. ആനന്ദാണീ ഗാനം ആലപിച്ചിരിക്കുന്നത്‌. ഈ ആല്‍ബത്തില്‍ ദൃശ്യവത്കരിച്ചിരിക്കുന്ന ഏക ഗാനവും ഇതാണ്‌. സംഗീതമെ എന്ന മൂന്നാമത്തെ ഗാനം, സംഗീതപരമായി ഉയര്‍ന്ന നിലവാരം പുലര്‍ത്തുന്നതാണ്‌. ആദറ്‍ശിണ്റ്റെ ആലാപനരീതി ഇതിലെ ശ്രദ്ധേയമായ ഒന്നാണ്‌. ഒരു ഗസല്‍ ടച്ചുള്ള ഗാനമാണ്‌ ഝൂമേ എന്ന നന്ദകുമാറ്‍ ആലപിച്ചിരിക്കുന്ന ഗാനം. ഇതിണ്റ്റെ വരികളുടെ സൃഷ്ടിയും മികച്ചതാണ്‌. അര്‍ത്ഥവത്തായ വരികള്‍ ഇതിലെ സംഗീതത്തെ കൂടുതല്‍ മനോഹരമാക്കുന്നു. കാറ്റ്റേ എന്ന ഗാനം നമ്മെ ആകറ്‍ഷിക്കുന്നത്‌, വ്യത്യസ്തമായ ശബ്ദത്തിലൂടെയാണ്‌. നീലിമയും ശ്രീഹരിയും വളരെ വ്യത്യസ്ത്മായ ഒരു റെണ്ടറിങ്ങാണീ ഗാനത്തിന്‌ നല്‍കിയിരിക്കുന്നത്‌. ഈ ആല്‍ബത്തിലെ ഏറ്റവും മെലോഡിയസായ ഗാനം ഐഡിയ സ്റ്റാറ്‍ സിംഗറ്‍ ഫെയിം മുരളി രാമനാഥന്‍ പാടിയിരിക്കുന്ന ഏതോ കിനാവിന്‍ എന്ന ഗാനമാണ്‌. അനായാസേനയുള്ള ആലാപന ശൈലിയും, മികച്ച സംഗീതവും, അതിലും മികച്ച വരികളൂം ഒത്തു ചേറ്‍ന്നപ്പോള്‍ ഈ ആല്‍ബത്തിലെ ഏറ്റവും മനോഹരമായ ഗാനത്തിനെ ജന്‍മം കുറിച്ചു. ലൂയിസാണ്‌ വോയിസ്‌ ഓഫ്‌ ദ പാര്‍ക്ക്‌ എന്ന ഇംഗ്ളീഷ്‌ ഗാനം ആലപിച്ചിരിക്കുന്നത്‌. ഈ ഗാനവും ശരാശരിക്കു മുകളില്‍ നിലവാരം പുലര്‍ത്തിയിരിക്കുന്നു. ബോണസ്സ്‌ ട്രാക്കിലുള്ള ഗാനം ഝൂമേ എന്ന ഗാനം തന്നെയാണ്‌. പക്ഷെ അതാലപിച്ചിരിക്കുന്നത്‌, ഇതിന്‌ സംഗീതം നല്‍കിയ ആനന്ദ്‌ കൌശിക്കാണ്‌. സംഗീതജ്ഞണ്റ്റെ സ്വരത്തിലത്‌ കേട്ടപ്പോള്‍ കൂടുതല്‍ കൃത്യത തോന്നി. നല്ല ഭാവവും ഗസലിണ്റ്റെ ആ മാധുര്യവും ഈ ഗാനത്തിലാണ്‌ മികച്ച്‌ നില്‍ക്കുന്നത്‌.

ഗാനങ്ങളെല്ലാം മികച്ച നിലവാരം പുലറ്‍ത്തുന്ന ഈ ആല്‍ബം ആള്‍ക്കാരെ ആകറ്‍ഷിച്ചില്ലെങ്കിലെ അത്‌ഭുതമുള്ളു. എന്നിരുന്നാലും ടെക്‌നോപാറ്‍ക്കിണ്റ്റെ ഈ കൂട്ടയ്മയെ ലോകം അറിയണം എന്ന ആഗ്രഹത്തോടെ സൌജന്യമായി സി.ഡികള്‍ വിതരണം ചെയ്ത ഇതിണ്റ്റെ പിറകിലെ വ്യക്തികള്‍ തീറ്‍ച്ചയായും ഒരു നല്ല അഭിനന്ദനം അറ്‍ഹിക്കുന്നു. അവറ്‍ക്ക്‌ എല്ലാ ഭാവുകങ്ങളും നേരുന്നു.... അതിനൊപ്പം ഈ വോയിസ്‌ ഓഫ്‌ ദ പാറ്‍ക്ക്‌ ഉയരങ്ങളിലെത്തട്ടെ എന്നും പ്രാറ്‍ത്ഥിക്കുന്നു...

വോയിസ്‌ ഓഫ്‌ ദ പാറ്‍ക്ക്‌ വെബ്‌സൈറ്റ്‌